Salmo 46 - Kuna San Blas

Bab-Dummad anmarba gudiguad

“We-namaked-Alamotʼgi-namaklegoye.”

¹ Bab-Dummad anmar-niga-ogannogedid. Bab-Dummad anmar-irwa-gwisguedid. Bab-Dummad wilubdaklegedgi, anmar-bendaked-sunsogedid.

² Degisoggu, ar neg giglimakde-sogele, anmar dobguosulid. Yala-dummagan demar-wilagangi-dogdedibe, amba anmar dobguosulid.

³ Demar-dummagan-urwedbali, yala-dummagan giglimakdedibe, amba anmar dobguosulid.

⁴ Diwar-iirmakemaidi, weligwar Bab-Dummad-e-neggwebur imaked. Weligwar Bab-Dummad-Bur-Birigined-e-neg-Islidikid imaked.

⁵ Bab-Dummad e-neggwebur-abargi gudiid, degisoggu, e-neggwebur akar-guosulid. Bab-Dummad, neg-oibosale, na e-neggwebur-bendakoed.

⁶ Bab-Dummad-sunmakdele, dulemar-yar-baid-baidgi-bukwamalad dobguddamalad, neggweburmar-bubukwad giglimakdedaed.

⁷ Bab-Jehová-Bela-Gangued-Nikad anmarba gudiid, Jacob-e-Bab-Dummad an-dukuedga gued.

⁸ ¡Dagmala! Bab-Jehová-e-ibmar-imaksad be dakdamala. We-napneggi-ibmar-dakledisulid-imaksad be dakdamala.

⁹ Bab-Dummad we-napneg-ugakaase bela bila-onoleged obelosad. Warsimar bibisgisad, eswarmar bibisgisbalid, moli-urmar soogi ogumaksabalid.

¹⁰ “Boo be ambikumalo, magar be an-dakmalo, ani an Bab-Dummadid. Dulemar-yar-baid-baidgi-bukwamalad-abargi an-nug odummolegoed, we-napneggi an-nug odummolegoed.”

¹¹ Bab-Jehová-Bela-Gangued-Nikad anmarba gudiid, Jacob-e-Bab-Dummad an-dukuedga gued.