Salmo 45 - Kuna San Blas

Rey-ome-nikunaidgi namakleged

Coré-wagan we-namaked narmaksad.

¹ An-ulubgi ibmar-nued sogbie an itoged. An reyga an-namaked-narmaksad soged. An-gwabin garda-suar-yeer-narmakeyobi gued.

² Rey, be bur dulemar-baiganba yeerdakleged, be bur yeer-sunmaked, ar Bab-Dummad degisadegu begi ise-nued binsasad.

³ Rey, be-ganguedgi, be-yeerdaklegedgi, be-es-suid be-saderba be nasike.

⁴ Be-gangued-yeerdaklegedgi nakwemai be imake. Igar-napiragwadbina urwedii be sae. Dule-wileganaga ibmar-innikigwad-imakdii be gue. ¡Rey, be-ganguedgi ibmar-dummagan-imakdii be nanae!

⁵ Be-sigu-swiswidikmaladgi, be-isdarmalad-bese-galakudii be imake. A-sigumar, rey-e-isdarmalad-gwagegi yoledapoed.

⁶ Bab-Dummad, be-negsemaid degisadeguoed. Be-negsemaid, igar-maidba be imaked.

⁷ Igar-innikigwad-imaked be yeer-itodaed, ibmar-isganadi, be isdar-daked. A-ulale, Bab-Dummad-be-Bab-Dummadi, be-aimar-baiganba be-susad. Be-Bab-Dummad, ina-wawadikidgi be-wawamaksad, weligwar-ito be-imaksad.

⁸ Be-mola, we-ina-wawadikmaladbi yapanned: Mirraʼye-nugadbi, áloeʼye-nugadbi, canelaʼye-nugadbi yapanned. Reyneg-marfilʼgi-ise-nudakaled-akale, gar-bega-ogorlenaidi weligwar be-imaked.

⁹ Yagana-be-ebilidmaladi, reymar-sisgan nanaed. Be-ologana-argan-nuedsik rey-ome siid. We-rey-omede, Ofir-or-nuedgi ise-nudakar siid.

¹⁰ Bunagwa, an bega-ibmar-sogoedi, nue be an-itogo. Be-dulemar be iege, be-gwenadgangi mer be bar binsae.

¹¹ Be-yeerdaklegedba rey nue-be-abeged. Rey be-dummadid, degisoggu, eba be ibsae.

¹² Tiro-dorgan binsa-ibmar-uklemalad bega sedagoed. Dule-mani-ibgan ega-ibmar-nued-imakbi be-abemaloed.

¹³ Rey-e-sisgwa e-gabedyaba nue-nudakar maid. E-mor ber olobi dakleged.

¹⁴ E-mor-ise-nue-sobaled-yoi reyse seledoed. E-aimar-yagana e-sorba-nai nadapmaloed.

¹⁵ Weligwar itonadapmaloed, Rey-e-negse weligwaledgi dogdapmaloed.

¹⁶ Rey, be-masmala be-dadgan-negsemai-gusad-ganagi sigmaloed. Amar bela bemar-yala-semamai gumaloed.

¹⁷ An bega we-namaknaidgi, dulemar-be-iegega an imakosulid. Bela neggwebur-baiganginmalad be-ebinsadiguega an imakoed.