Salmo 41 - Kuna San Blas

Nailikgued-anga-osuloye Bab-Dummadga soged

David, namakmalad-e-iduedga we-namaked narmaksad.

¹ Dule, dule-wileged-bendakedgi binsaele, Bab-Jehová, a-dulegi nued-binsaed. Ar ade, ibagan-isgana ega nagunonikile, Bab-Jehová we-dule-bendakoed.

² Bab-Jehová we-dule-edarboed, we-napneggi dula-gudii imakoed, we-napneggi we-dulegi nued-binsalegoed. E-isdarmaladga we-dule-urmakosulid.

³ We-dule nailikgumaile, Bab-Jehová bendakoed. Bab-Jehová we-dulega nailikgued osulogoed.

⁴ Bab-Dummadga, an sogsad: Bab-Jehováʼye, wile be an-dake. Ar an begi nos-inigwele, an-nailikgumaid be anga osuloge.

⁵ An-isdarmalad angi isdar sunmakmalad, sogmalad: “¿Wede sana burgoe? ¿Wede sana berguoe?”

⁶ Anse atakdanimalale, gakansaar anga sunmakmalad. Geb nadmalogua, angi sunmakdedamalad.

⁷ Dule-isdar-an-dakmalad danar ambikunonimalogu, angi urwebukdamalad. Angi isdar binsabukdamalad, sogbukdamalad:

⁸ “We-dule-nailikgumaidi gwisguosulid, burgoed. Boni-dummad egi naid.”

⁹ Ar an-ai-nued-anba-masgundiid, an-egi-bensur-gudiid, a-bela angi aibitemogad.

¹⁰ Bab-Jehováʼye, wile be an-dake. An-nailikgumaidi, be anga nudake, adi, an-isdarmaladgi an gwisguegar.

¹¹ An-isdarmalad-angi-nakosulidba an magar dakoed, yeer-ito an be-imaksad.

¹² Bab-Dummad, an isgussulidba, be an-ogannodii guoed, be-asabin-gudigu be an-imakoed.

¹³ ¡Israel-e-Bab-Dummad-Jehová, be-nug odummolesun! Birga-birgaba degisadegu be-nug odummoledii gusun. ¡Deyob gusunno!