Salmo 37 - Kuna San Blas

Dule-isganamar bergumaloed

David we-namaked narmaksad.

¹ Dule-isganamar-nasgumaidba mer be sae itoge, Dule-isganamargi mer be nobgue.

² Ar we-dulemar gaganyobi emiskwaa bergudmaloed, gagan-dinguddaedyobi emiskwaa surgudmaloed.

³ Bab-Jehováʼgi mer be bengu, ibmar-nuegan be imake. We-napneggi galakusuli be gudii guoed.

⁴ Bab-Jehováʼgi be nue-wergudii sae. Ar be ibmarbina-sogdiid, Bab-Dummad bega ukoed.

⁵ Be-ibmar-imakbied, Bab-Jehováʼga be uke. Mer be Bab-Jehováʼgi bengue, ar Bab-Jehová bega ibmar imakoed.

⁶ Igar-maidba be-ibmar-imakedi, Bab-Dummad bega dad-ibeleryob odalogoed. Deyobi dule bela magar daknonikoed, bede, dule-napiragwadid, bede, igar-maidba ibmar-imakedid.

⁷ Bab-Dummad-asabin bogidik-gudii be imake. E-bega-ibmar-imakedse edarbedii be sae. We-dule-ibmar-isgana-imaked nasgumai be dakele, mer be sae-itogo.

⁸ Be-isdar-itoged na be bargae, be-sae-itoged be iege. Melle be urwe, abakalegi be neg-oichoalile.

⁹ Ar dule-isganamar burgwemaloed. Dule-Bab-Jehováʼgi-ibmar-edarbedimaladdi, neg-nued-bonisulid ega uklegoed.

¹⁰ Dule-isganamar napi-ichee gudidimalad. Ar a-dulemardi be-amidigumaloen-inigwele, gwen be-amiosurmalad.

¹¹ Ar dule-san-dummarba-imaksurmalad neg-nued-bonisulid egadga guoed, amala bela nue-nasgumaidbali, weligwar itomaloed.

¹² Dule-isgana dule-nuedgi sunnasur binsadaed. Dule-isgana dule-nued-dakdele, bela-bela nue-sae dakdaed.

¹³ Degi-inigwele, Bab-Jehováʼdi dule-isganaga alloed, ar wisid, we-dulemar-bergued bato ese warmaksad.

¹⁴ Dule-isganamar, dule-wilegana-oburgwega, dule-nued-nanamalad-ogilogega, e-es-suid ononanaid, e-sigumar guagwar ebisbukwamalad.

¹⁵ Degi-inigwele, e-es-suid e-gwagegi yolegoed, e-warsimardi ei bibislegoed.

¹⁶ Dule-nued ibmar-ichee-nikale, dule-isgana-ibmar-bukidar-nikadba, bur nuedid.

¹⁷ Ar Bab-Jehová, we-dule-isganamar-e-gangued ei osulogoed. Dule-igar-inniki-imakmaladdi bendakoed.

¹⁸ Bab-Jehová, dule-inniki-nanadimalad-edarbediid. A-dulemarga ibmar-uklegoedi, degisadegu egadga guoed.

¹⁹ Dule-inniki-nanadimaladga ibagan-bulegan-noni-sogele, akar-guosulid. Ukud-dummad nagunonikile, mas-nika guoed.

²⁰ Dule-isganamardi, bergudmaloed. Bab-Jehová-isdarmaladdi, gagan-burgweyobi burgwidmarmogoed. Waayob bergudmaloed.

²¹ Dule-isganamar aimargi mani-gasale, bar bennukdasulid. Dule-nueddi dule-wiledakedba aimarga ibmar ukdedaed.

²² Dulemar Bab-Jehováʼse-nabir-binsalesmaladi, neg-nued egadga guoed. Dulemar Bab-Jehováʼse-ukabsalesmaladdi, girgumaloed.

²³ Dule-wargwen e-daedgi Bab-Jehová-yeer-ito imakele, Bab-Dummad we-dule-nued-nanadii imaked.

²⁴ Dule-nued gwatirnoni-sogele, deyob degisadegu gudii guosulid, ar Bab-Jehová we-dule-bendakoed.

²⁵ An sapingwa-danikid-akale, an seredgusadse, an dakdisulid, dule-nuedi nue-dummad-wiledii, e-mimmigan mas-egisdii an dakdisulid.

²⁶ Dule-nuedi aimarga ibmar-ukalile, nuedgi yeer-itogedba ukdedaed. E-mimmigan ega ibnuedga gued.

²⁷ Ibmar-isganagi be bangu, ibmar-nueganbi be imakdii gue. Ar deyob be imakele, Bab-Dummad bega-yar-ukoye-sogsadgi degisadegu be gudii guoed.

²⁸ Ar Bab-Jehová igar-inniki-imakleged yeer dakdaed, dule-eba-nue-nanadiidgi, bangusulid, Bab-Jehová amar-nue-edarbedidaed. Dule-isganamardi, bergumaloed, gwen wagan-nikuosurmalad.

²⁹ Dule-nuegan-damaladdi, Bab-Dummad ega yar-ukoye-sogsadgi degisadegu mai gumaloed.

³⁰ Dule-nued sunmakdele, nue-binsaed-nikaa sunmakdedaed, Dule-nued sunmakdele, igar-inniki-maidba sunmakdedaed.

³¹ E-Bab-Dummad-igar-maid e-gwagegi sedidaed. A-ulale, isgusurdaed.

³² Dule-isgana dule-nued-oburgwega arbakee dule-nued-argadidaed,

³³ Degi-inigwele, Bab-Jehováʼdi dule-isganaga dule-nued-urmakosulid. Dule-nuedga igar-itolear-sogele, egi isgusye-sogega imakosulid.

³⁴ Bab-Jehová-abdakdii be gue, a-sogedba be nanadii gue. Bab-Jehová be-nug-odummogoed, neg-nued begadga-guegala, bega ukoed. Dule-isgana-bergumaloedi, be-sunnad be dakoed.

³⁵ An dule-isgana daksad, urwar-sapi-dummad-neg-ganikidyob, na san dummarba imaked.

³⁶ Degi-inigwele, we-dulemar emiskwaa bergudoed. We-dulemar bato sulibinne dakledagoed. Be amialile, be dakosurguoed.

³⁷ Dule-nuegan-damalad be dake, dulemar igar-maidba-damalad be dake. We-dulemar-nueddamaladga igar-nued ega maid.

³⁸ Ar dulemar igar-maidgi-yoledimaladdi, bela burgwemaloed, Dule-sunnasur-damaladdi, bela bergudmaloed.

³⁹ Dule-nuegan-damalad-e-bendakleged Bab-Jehováʼgi danikid. Ibagan-suli-suli-itogedgi, Bab-Jehová dule-nuegan-bendakedga gued.

⁴⁰ Bab-Jehová bonigangi dule-nued-bendakoed, ar Bab-Jehováʼgi bensuli-gudii gusad. Bab-Jehová dulemar-isganagi we-dule-onogoed, dulemar-isganagi bendakoed.