Salmo 35 - Kuna San Blas

Bendaklegega, Bab-Dummadse-goled

David we-namaked narmaksad.

¹ Bab-Jehováʼye, angi-gwisgudimaladgi be gwichigue. Angi-bila-onodimaladgi be bila-onoge.

² Bab-Jehová, be-sigu-abgaed-suid be sue, an-bendakega be dage.

³ An-balegindimalad-abin eswar be gae, akan be gae. Ani an be-abonogedye be anga soge.

⁴ An-oburgwebimalad, bingegumarsun, neg-aku-ito gumarsun. An-oakalobimalad, gannar sorsik namarsun, bingegus namarsun.

⁵ Amala, oros-e-uka burwa-abin-mileddaedyob gumarsun, Bab-Jehová-e-baliwitur amar-baleginne.

⁶ E-igar-nanaedi, ega negsichidyob gusun, e-igar-nanaedi, ega gware-gwareyob gusun. Bab-Jehová-e-baliwitur amar-baleginne.

⁷ Gwen an ibmar-oakalossuli, an-oburgwega, an-idu yaa akwismalad, an-idu saki nasiksamalad.

⁸ Boni egi ukiagwar yolesunna, na emar-yardakdiidgi, na dukin yardaklege. Na yaa-akwismaladgi, na dukin argwanmala.

⁹ Degidbali, Bab-Jehováʼgi an yeer itogoed, an e-abonogedgi weligwar itogoed.

¹⁰ Weyobi, binnasur an gotoed: “Bab-Jehováʼye, ¿doa beyobi, dule-nollogwad dule-dutusulidgi bendake? ¿Doa beyobi, dule-wileged dule-e-ibe-ibmar-suedgi bendake? ¿Doa beyobi, dule-ibmar-abediid, dule-e-ibe-ibmar-suedgi bendake? Dule beyobid sated.”

¹¹ Dule-barsogmalad-isganamar angi gwisguarmalad, an-ibmar-wissulid anse egismalad.

¹² Andi wemargi nueddaed, emardi, angi ichakwadamalad. Weyob-damalad ulubgi nunmak an-imaked.

¹³ Ar wemar uellemaigusgu, andi nue-bukib eba itodii gusad, andi wile-itoged-mor-yoi gudii gusad. Ulubgi-naibi-itogedba an mas guchasulid, an ega Babse-goled gwen bogigussulid.

¹⁴ An-ai-burgwisayobi, an-gargwenad-burgwisayobi, an bukib-itodii gusad. An-nan-burgwisayobi, an bodii gusad. An ulubgi-naibi-itogedba, an bukib-binsadii gusad.

¹⁵ An sabsur-wilesgu, emardi yeer-itosmalad, na atosmarbalid. Dule-isganamar aku-an-dakmaladyobi, angi aibinmalaga na atosmalad, an-san goa-goa imaknaidbi gusmalad.

¹⁶ Sabsur-an-imaknanai gusmalad, angi dodonanai gusmalad, isdar-an-dakmaladba anse uludmalad.

¹⁷ Bab-Jehová, ¿sanagwadse be we-dulemar yeerdakoe? Dulemar-an-gindakbiedgi be an-bendake, dulemar achumigur-nono-wawaadyob an-obelobiedgi be an-bendake.

¹⁸ Dulemar-bukidarad-abargi, an bega dog-nuedye sogoed. Dulemar-bukidarad-abargi, an be-nug odummogoed.

¹⁹ An-isdarmalad-angi-aibindimaladi, mer angi wergumala. Binsa-isdar-an-dakdimaladi, mer angi dodomala.

²⁰ Ar wemar neg-bogidik-nasikedgi sunmaksurmalad, unnila dulemar-gwage-eikwaa-damaladgi gakansaar sunmakmalad.

²¹ Anga ise-allar allemalad, sogmalad: “¡Anmar-sunnad anmar e-isgusad daksamarye!”

²² ¡Bab-Jehová, bela be daksad! ¡Mer be gayamaklege! ¡Mer be angi bangue!

²³ An-Bab-Dummad-Jehováʼye, anga igar-innikigwad-imakega be dage, an-arsogega be dage.

²⁴ An-Bab-Dummad-Jehováʼye, be-igar-innikigwadba be anga igar naboge. ¡We-dulemar mer angi dodomalaga be imake!

²⁵ Mer weyob binsamalaga be imake: “¡Anmar weyopira dakbigusye!” Mer weyob sogmalaga be imake: “¡Anmar we-dule obelosye!”

²⁶ An-sabsur-wilesadgi bela yeer-itodimaladi, bingegumala, neg-aku-itodii gumala. Dulemar angi bur san-dummarba-itodimaladi, bela-bela bingegumala, nug-bipii gumala.

²⁷ Anba-nanaimalad, binnasur namakmar, wergumar. Sogdii gumarsun: “Bab-Jehová-e-nug odummolesunye, Bab-Jehová e-mai-gwage-bogidikid yeerdakye.”

²⁸ Be-igar-innikigwadgi an sunmakoed, bane-bane an be-nug-odummodii gudoed.