Salmo 34 - Kuna San Blas

Bab-Dummad emar-bendakmaid

A-ulale, David we-namaked narmaksad.

¹ An bane-bane Bab-Jehová-e-nug-odummodii an guoed, an ega namakdii guoed.

² Bab-Jehováʼba an nug-dummarba itoged. Deyob dule-na-san-dummarba-imakdisurmalad itononimaloed, agi Bab-Jehováʼgi wergudmarmogoed.

³ Bemar an-balikwaa Bab-Jehová-e-nug odummomar, anmar bela danakwaa e-nug odummomar.

⁴ An Bab-Jehová-amidigua, an-abin-imaknonikid. An ibmar-dobgudiidgi, an-ollor-imaknonikid.

⁵ Dulemar Bab-Jehováʼse-idaksamaladi, egi gangunonimalad, bipisaale bingeguosurmalad.

⁶ Ani, an dule-wileged, an Bab-Jehováʼse-gochagu, an-itononikid, agine, bela bonigangi an-ollor-imaknonikid.

⁷ Bab-Jehová-e-baliwitur dule-e-nug-odummodiid-bendakegala, ese nonidaed.

⁸ Bemar-sunnagwad be dakdamala, Bab-Jehová-ibidar-nuedid be dakmala. Dule, Bab-Jehováʼgi-bensurgudiid, egi nued binsalediid.

⁹ Bemar Bab-Jehová-sordamar, Bab-Jehová-dobekwaa nanamar. Dule-Bab-Jehová-dobekwaa-nanadimaladi, ibmarsuli-gudii guosurmalad.

¹⁰ Dule-mani-ibmala, dule-wilegedga nadmaloed, ukud-itodii gudmaloed. Dule-Bab-Jehováʼgi-bensur-gudimaladdina, ibmarsuli-gudii guosurmalad.

¹¹ Mimmigan, dagmala, an-itodamala: Bab-Jehová-dobekwaa-nanaedgi an be-odurdakmaloed.

¹² Ar dule na wergudii gubiele, iba-nuegangi weligwar nanadii gubiele,

¹³ ibmar-isganagi-sunmaked na bargaergebed, gakansaar-sunmaked iegergebed.

¹⁴ Ibmar-isgana-imaked iegergebbalid, ibmar-nuedbi imakergebed. Neg-bogidikidbina gudiguergebed, neg-bogidik-imakdii gubalirgebed.

¹⁵ Bab-Jehová dule-inniki-gudimalad akwediid, wemar-ese-goled nue-itodaed.

¹⁶ Dule-ibmar-isgana-imakmaladgindina, egi yoleged. Bab-Jehová a-dulemargi yoleged, adi, we-napneggi mer bar egi binsalegegar.

¹⁷ Dule-inniki-gudimalad Bab-Jehováʼse-gotele, Bab-Jehová abin-imaked. Bab-Jehová bonigangi dule-inniki-gudimalad nue-bendaked.

¹⁸ Bab-Jehová dule-naibi-itodimaladba gudiid, dule-bukib-binsadimalad nue-bendakbalid.

¹⁹ Dule-inniki-gudiid, bonigan-bukidar nikued, degi-inigwele, Bab-Jehováʼdina, bela a-bonigangi ollor-imakoed.

²⁰ We-dule-e-garmar akarguega imakosulid, gwen wargwensaale e-ibe-bibislegega imakosulid.

²¹ Dule-isganamar ibmar-isgana-imakdimaladba na dukin wioged. Ar dulemar dule-innikidamalad-isdardakdimaladi, odurdaklegedsemalad.

²² Bab-Jehová dule-ega-arbadimalad nue bendaked, Bab-Jehováʼgi-bengudisurmalad, sabsur-odurdaklegosurmalad.