Salmo 30 - Kuna San Blas

An-wile-itoged, weligwaledga be imaksad

David, Bab-Dummadse-goled-neg-nugsalegega namaked narmaksad.

¹ Bab-Jehová, an be-nug ogannoged, ar be an-bendaksad. An-isdarmalad mer angi wergumalaga be imaksad.

² An-Bab-Dummad-Jehová, an bese gochagu, be an-nudaknonikid.

³ Bab-Jehová, an burgwedani-maigu, be an-bendaknonikid. Burba-dulad be anga uksad. Mer burgwarmalad-abargi-megega, be gannar an-ogwisgusad.

⁴ Bemar Bab-Dummad-e-sordagan, Bab-Jehováʼga be namakmar, e-nug-islidikid be ogannomar.

⁵ Bab-Dummad uludele, unnila sikwas-urwed. Ar nued-emargi-binsaeddina, degisadeguad. Ar mutikidba, boed nagunonidibe, neg-oibosardi, wergued nagunonikoed.

⁶ Anga ibmar-nasgumaigu, an weyob sogsagusad: “Bipisaale dule an-osikirmakosurye.”

⁷ Bab-Jehová, ar be-nued-angi-binsaedba, yar-dummad-siidyobi, ganna be an-osisad. Be angi aibategua, suli-suli an itonaded.

⁸ Bab-Jehová, an bese goled, Bab-Dummadye, an bese ise-wilegar goled.

⁹ Ar an burgwisale, ¿ibu-ibmar-nued egi amilegoe? An neg-uanse diglenader, ¿ibu-ibmar-nued egi amilegoe? ¿Ar dule-burgwaledde be-nug odummogoe? ¿Ar dule-burgwaledde be-igar-innikigwad barsogoe?

¹⁰ Bab-Jehováʼye, be an-itoge, wile be an-dake. Bab-Jehováʼye, ¡be an-bendake!

¹¹ Bab-Dummad, an-gwage-naibi-itonaid, be weligwar imaknonikid. An nunmaked-mor-yoid be anga ungenonikid, weligwaled-mor be anga yononikid.

¹² Bab-Dummad, degisoggu, an bega namaked, be-nug-odummoged bar an galegosulid, Bab-Dummad-Jehová, degisadegu, an bega dog-nuedye sogdii guoed.