Salmo 27 - Kuna San Blas

Bab-Jehová an-gwallu-meegwadid, an-abonogedid

David we-namaked narmaksad.

¹ Bab-Jehová anga burba-dulad ukedid, an-abonogedid. ¿An doa dobguosunna? Bab-Jehová an-gandikidga gued. ¿An doase gwayosunna?

² Dule-isganamar an-obelogega angi gwisguarmargu, an-isdarmalad an-oburgwega angi gwisguarmargu, aka bur amar burgwismalad.

³ Ar amba sordamar-bila-onoged, an-ebiris-bukwa-inigwele, andi an dobguosulid. Amba angi bila-onolealile, andi an bukib-binsaosulid.

⁴ Bab-Jehováʼse unni ibmar-soggwen an egichisad, abi an abeged: E-neggi-degisadegu-gudigued an abeged. Adi, an Bab-Jehová-e-yeerdakleged dakega, e-neggi ese gordii gubaligar.

⁵ Ar Bab-Jehová, ibagan-bulegangi na ese-goled-neggi an-odukuoed, na e-neg-megedgi an-odukuoed, akwasaila-birgi an-ogwichoed.

⁶ A-sorbali, an-isdarmalad-an-ebiris-bukwamaladgi-nakwega an-imakoed. Ese-goled-neggi, an e-nug odummogoed, Bab-Jehováʼga andi namakoed.

⁷ ¡Bab-Jehováʼye, an bese-goled, be itoge! ¡Be wile-an-dake, be an-abinsae!

⁸ An-gwage anga-soge an itoged: “Be Bab-Jehová-amie.” Bab-Jehová, an be-amied.

⁹ ¡Bab-Jehováʼye mer be angi dukue! ¡Mer be isdar-itogedgi be an-obane! Ar be an-bendakedid. Bab-Jehová an-abonogedye, mer be walagwen an-obege, mer be an-mete.

¹⁰ Ar amba an-bab, degi, an-nan an-obachale, Bab-Jehováʼdi an-suoed.

¹¹ Bab-Jehová, an-oburgwebimalad-ulale, be-igarba be an-nide, igar-nueganba be an-idue.

¹² Bab-Jehová, an-isdarmaladga mer be an-urmake, ar gakansaar-emar-barsogmalad, emar-sabsur-imakmalad, angi gwisgunanaid.

¹³ Degisoggu, an nue-wisimakaled, an we-napneggi-gudiidgi Bab-Jehová-dulemargi-nued-binsamaid an dakoed.

¹⁴ ¡Bab-Jehováʼgi mer be bengue! ¡Be gangue! ¡Be niga-gandik sae! ¡Eye, Bab-Jehováʼgi mer be bengue!