Salmo 25 - Kuna San Blas

Bab-Dummad be an-bendake

David we-namaked narmaksad.

¹ Bab-Jehováʼye, an be-bensuli an bese goled.

² An-Bab-Dummadye, an begi bendakleged amied, mer bingeguega be an-imake. ¡An-isdarmalad mer angi-dodoged be imake!

³ Ar begi-bendakleged-amimalad bipisaar bingeguosulid, dulemar igarsuli emargi-gwisgudimaladdi bingegumaloed.

⁴ Bab-Jehová, Be-Igarmar be anga oyoge, Be-Igarmargi be an-odurdake.

⁵ Be-Igar-innikigwadba be an-nide, a-Igargi be an-odurdake. Bedi, an-Bab-Dummad-an-abonogedid, andi, gusgu beginbi bendakleged amied.

⁶ Bab-Jehová, be-ebinsao, be wile-dule-dakedid, be dule-sabguedid. Weyob be-daedi, anga be oyodiguad.

⁷ An sapingwaun isgudigusaddi, an begi-yolesaddi, mer be ebinsao. Bab-Jehová, be-wile-dule-dakedba, wile be an-dako. Bab-Jehová, ar bedi dule-nuedid.

⁸ Bab-Jehová dule-nuedid, dule-innikigwadid, a-ular, dule-isganamarga igar-maid-imakega oyoged.

⁹ Bab-Jehová igar-innikigwadba dulemar-san-bipi-imakdimalad nied, Bab-Dummad e-igargi dulemar-san-dummarba-imakdisurmalad odurdakbalid.

¹⁰ Bab-Jehová-Igar-Mesisadba-ibsadimaladga, Bab-Jehová-Igar-Islidikid-Mesisadba-nanadimaladga, bela Bab-Jehová-e-Igarmar, sabgued-igalad, napiragwad-igalad.

¹¹ Bab-Jehová, na be-nug-sabedba, an-nue-isgusadi, be anga osuloge.

¹² Bab-Jehová, dule-e-dobee-nanadiidga oyogoed, biti-igarba nanaoe.

¹³ A-dule, nued-gudii guoed, e-wagandi nainumar gamaloed.

¹⁴ Bab-Jehová dulemar-e-nug-odummodimaladbo walikaa gued, amarga e-igar-mesisad sogbalid.

¹⁵ Ar Bab-Dummaddi emar-yamoged-igargi an-ollorsaed. A-ular, Bab-Jehováʼginbi an ataked.

¹⁶ Bab-Jehováʼye, be wile-an-dake, andi walagwen gudiid, an wile itodiid.

¹⁷ Bab-Jehováʼye, an-suli-suli-itoged bur bule gangumaid. An-bukib-binsadiid, be anga osuloge.

¹⁸ Bab-Jehováʼye, an-ulubgi-naibi-itoged be dake, an boniganba-galitodiid be dake. Bela an-isgued be anga elie.

¹⁹ Bab-Jehováʼye, be dake, ibiyobi an-isdarmalad mergusa, bela-bela nue-isdar an-dakmalad.

²⁰ ¡We-dulemar-idu be an-odukue! ¡We-dulemargi be an-ollorsae! Mer bingegued be an-imake, ar andi begi bensulid.

²¹ An-ibmar-oakalossulid, an-inniki-daedi, an-bendakedga gued. Ar andi begi bensulid.

²² ¡Bab-Dummadye, Israel-dulemar suli-suli-itogedgi, be bendake!