Salmo 24 - Kuna San Blas

Bab-Dummad napneg-naid-e-ibedid

David we-namaked narmaksad.

¹ Bela we-napneg-naidi, bela egi ibmarmar-bukwadi, Bab-Jehováʼgadid. Bela yalagan-nanaidi, dulemar-egi-bukwadi, bela Bab-Dummadgadbiid.

² Bab-Jehová, demar-naidgi napaneg onakwisad, dii-wilagangi napaneg nasiksad.

³ ¿Doa Bab-Jehová-yarse nakoe? ¿Doa Bab-Jehováʼse-goled-neg-islidikidgi gudiguoe? Unnila weyob-gudimaladbi gudii guoed:

⁴ Dule-ibmar-nueganbi-imaked, dule-gwage-swilidikid, dule-ibmar-bab-dummadyob-imaklemaladse-gordisulid, yamo-ibmar-ise-sogar-imakdisulid, amarbi unnila, Bab-Jehováʼse-goled-negse dogoed.

⁵ Dule-deyob-daedgi, Bab-Jehová ise-nued-binsaoed, Bab-Jehová-e-abonogedid ega nuedgi igar-nabogoed.

⁶ Bab-Dummad, dule-be-amidimaladi, weyob damalargebed, dulemar Jacob-e-Bab-Dummad-dakbi-gudimaladi, weyob nanamalargebed.

⁷ Yawagak-dummagan, be argamarsun, yawagak-degisadegu-gwichimalad, be argamarsun, we-yawagakgi, Rey Gandikidba-Yeerdakleged dogesokalid.

⁸ ¿We doawa, Rey Gandikidba-Yeerdakleged? We-Rey, Bab-Jehová-Dule-Gandikidid, dule-buledid. Bab-Jehová bila-onogedgi dule-buledid.

⁹ Yawagak-dummagan, be argamarsun, yawagak-degisadegu-gwichimalad, be argamarsun, we-yawagakgi Rey Gandikidba-Yeerdakleged dogesokalid.

¹⁰ ¿We doawa, Rey Gandikidba-Yeerdakleged? We-Rey, Bab-Jehová-Bela-Gangued-Nika-Maidid. We, Rey Gandikidba-Yeerdaklegedid.