Salmo 20 - Kuna San Blas

Boni-dummagangi-obinega Bab-Dummadse goled

David we-namaked narmaksad. Namakmalad-e-iduedga soglenaid.

¹ Dobedba be suli-suli itogele, Bab-Jehová be-itogena gadin. Jacob-e-Bab-Dummad-nuggi, be bendaklegena gadin.

² Bab-Jehová e-neg-islidikid-akale, bega bendakleged barmidagena gadin. Bab-Dummad Sión-yar-akale, be-bendakena gadin.

³ Ega be ibmar-ukedi, Bab-Dummad bela insaena gadin, ega be ibmar-ogumakar-ukedi, be-abin nuedgi abingaena gadin.

⁴ Be ibmar-abediidbali, Bab-Dummad bega ukena gadin. Be ibmar-imakedgi-binsaedi, bega bela nueganbi guena gadin.

⁵ Boni-dummagangi be obichale, anmar weligwar-itogedba oimakdemaloed. Anmar-Bab-Dummad-nuggi, olo-bander omemmermakdemaloed. Bab-Jehováʼse be ibmar-egichisadi, bela bega sogedba imakena gadin.

⁶ Ar emigindi an wisdo, Bab-Jehová, e-nuggi-rey-nugsalegaled bendakoed. Bab-Jehová e-ganguedgi, bila-onolegedgi, rey-nakwemai-guega imakoed. Bab-Jehová e-nibneg-islidikid-akale, rey-abinsaoed.

⁷ Dulemar gwenna-gwenna unnila moli-ur-bila-onomaladginbi bensurmalad, baigandi e-molimarginbi bensurmarmogad. Anmardina, unnila anmar-Bab-Dummad-Jehováʼgi bensurmalad.

⁸ We-dulemardi nue geg gugus galakudmalad. Anmardina, amba Bab-Jehováʼgi-bensulidba ganna gudimalad.

⁹ Bab-Jehováʼye, sorda-bila-onomaladgi, rey-nakwega be imako. Bab-Jehováʼye, anmar bese gotele, be anmar-abinsao.