Salmo 19 - Kuna San Blas

Bab-Dummad-neg-obinnisad

David we-namaked narmaksad. Namakmalad-e-iduedga soglenaid.

¹ Mogir-naidi, Bab-Dummad-e-gangued-yeerdaklegedgi sunmaknaid. Mogir-billi-aradgi bela-ibmar-naidi, Bab-Dummad-e-ibmar-obinnisad oyonaid.

² Bela-ibmar-naidi, bane-bane ibginedbali, Bab-Dummad-e-gangued-yeerdaklegedgi na sunmaknanaid, Bela-ibmar-naidi, bane-bane mutikidbali, Bab-Dummad-e-gangued-yeerdakleged na barsognanaid.

³ We-ibmarmar duleyob-sunmaksur-inigwele, ibmar-bisurmar-inigwele, e-gaya-goled-itolesur-inigwele,

⁴ we-ibmarmar-naid-e-sunmakedi, napneggi bela itoleged, bela napneg-dirbir-naid-ugakaase warmaked.

⁵ Bab-Dummad dad-ibelerga mogir-billigi neg-nasiksad. Ar igi machered-ome-nikusad neg-oibosale, e-gabedneggi weligwar-noardae, deyobi, dad-ibeler wakudaryalaba noardaed. Ar Igi dule-abarmaked abarmaksokalir, yeer-itodae, deyobi, dad-ibeler nakwiardaed.

⁶ Dad-ibeler mogir-billi-nagagi nakwidagogu, mogir-billi-bergunaidse argwandapdaed. Dad-ibeler-e-ueregedgi ibdula gwen dukuosulid.

⁷ Bab-Jehová-Igar-Maidi, napiragwadid, dule-burba-ogannogedid. Bab-Jehová-Igar-Maidi, sunsogedid, egi geg benguleged. Bab-Jehová-Igar-Maidi, dule-binsaedsulidaed binsaed-ibedga imaked.

⁸ Bab-Jehová-Islidik-Igar-Mesisad innikigwadid, gwage-weligwar dule-saed. Bab-Jehová-e-Igar swilidikidid, magar-ibmar-itoge dule-imaked.

⁹ Bab-Jehová-dobee-nanaed-igar swilidikidid, degisadegu mai guoed. Bab-Jehová-igar-naboged, napiragwadid, bela innikigwadbiid.

¹⁰ Bab-Jehová-e-Igar orba bur bule nuedid, or-nuedba bur bule e-bina sogleged. Bab-Dummad-e-Igar achanisba bur bule ochigwad, achanis-aryomaidba bur bule osidikid.

¹¹ Be-Gayaburba anga iduakwaa ibmar-soged: “Nue salakarye.” Ar dule a-Gayaburbaba ibmar-imakele, bukidar ibmar-nuegan nikuoed.

¹² ¿Doa e-nodiid na magar-itoge? Bab-Jehováʼye, ibugi an begi nodidibe, an na wissulid. Agi be an-ollorsae.

¹³ Deginbali, an yamo-begi-yoledaedgi, be an-ollorsabali. We-isgued mer angi obined be sae. Adi, dulemar bar angi sunmakosulid, bar an isgued-dummad imakosulid.

¹⁴ Bab-Jehová, be an-edarbedid, be an-odukuedid. Degisoggu, an-sunmaked be yeer-itosana gadin, ulubgi-an-binsaed be yeerdaksana gadin.