Salmo 147 - Kuna San Blas

Bab-Dummad-nug-odummolesun

¹ ¡Aleluya! Bab-Jehová-nug odummolesun. Ar anmar, anmar-Bab-Dummadga-namaked ibnuedid. E-nug-odummoleged yeer-itolegedid.

² Bab-Jehová Jerusalén-neggwebur gannar sobed, Israel-dulemar-e-yargi-onolesmalad gannar senonikoed.

³ Bab-Dummad, dule-gwage-nunmak-itodimalad nudaked. E-wile-itodiid baisur-itoge imaked.

⁴ Bab-Jehová bela wisid igi mergu niisgwamar nai, bela ega nug nasiksad.

⁵ Anmar-Bab-Jehová, dule-dummadid, e-gangued bipisurbalid, e-ibmar-wisid degisadeguad.

⁶ Bab-Jehová dule-wilegana bendaked. Dule-isgana-e-nugdi bipii imaked.

⁷ Bab-Jehováʼga yeer-itogedgi namakmala. Anmar-Bab-Dummadga gar-arpaʼba namakmala.

⁸ Bab-Dummad, nibneggi mogirmar nasiked, napaneggi dii owied, sapurgi gaganmar onied.

⁹ Bab-Dummad, ibmar-durganga mas uked. Sikwisichii-mimmigan mas-abealile, ega mas ukbalid.

¹⁰ Bab-Jehová moli-e-ganguedgi yeer-itosulid, dule-ibmar-bursur-imakedgi yeer-itosurbalid.

¹¹ Bab-Jehová, e-nug-odummomaladgi yeer-itoged, e-sabgued-bensurmaladgi yeer-itobalid.

¹² Jerusalén-neggwebur, Bab-Jehová-nug odummoge. Sión-yar, be Bab-Dummad-nug odummoge.

¹³ Bab-Jehová be-yawagak-bargamalad-e-suarmar bega ogannosad. Dule-be-yargi-gudidimaladgi nued-binsalesad.

¹⁴ Bab-Dummad be-yargi neg-bogidikid nasiked, orosgi-dakleged-trigo-bur-nuedgi immerba be-imaked.

¹⁵ Bab-Dummad napnegga ibmar-soged, e-ibmar-soged yog-imakar imakledaed.

¹⁶ Bab-Dummad ubsan-daklegedyob boo-sibudiki obated. Buru-bateyob boo-gwamakaled obated.

¹⁷ Bab-Dummad dii-gwamakaled akwanyob obated. Dii-gwamakaled-e-dambed, ¿doa baisur-itogoe?

¹⁸ Bab-Dummad-e-ibmar-sogedba dii-gwamakaled diree imaked. Burwa-golega imaked, geb dii gannar suurmakega imaked.

¹⁹ Bab-Dummad Jacob-waganga e-gayaburba uksad, Israel-dulemarga na E-Igar-Maid, E-Igar-Inniki-imaklemalad, uksad.

²⁰ Bab-Dummad dulemar-yar-baid-baidgi-bukwamaladdi, deyob imaksasulid. Amardi, bipisaale E-Igar-Mesisad wisgussurmalad. ¡Aleluya! ¡Bab-Jehová-nug odummolesun!