Salmo 143 - Kuna San Blas

E-bendakega, degi, e-iduega Babse-goled

David, we-namaked narmaksad.

¹ Bab-Jehováʼye, an bese-goled be itoge, an-wilesakwaa-goled, be itoge. Be-ibmar-soged-imakedba, be an-abinsae. Be-Igar-innikigwadba, be an-abinsae.

² Dummad, mer be anga igar-itoge. Ar be-asabindi, dule-wargwensaale na nuedye sogosulid.

³ An-isdarmalad an-oburgwebied, napayala bikiin an-metemalad. Dule-dikasurgus-burgwismaladyob negasichidgi-megega an-imaksamalad.

⁴ Bar an nue-bunnosurgusad, an-gwage bogiled an-itoged.

⁵ Epenne ibagan-nasmalad an ebinsaded. Belagwable be-ibmar-dummagan-imaksadgi an binsaded. Be-ibmarmar-imaksad, nue an ebinsaded.

⁶ An-argan an besik oyoged, ar igi napa-dinnagwad dii-abedae, deyobi, an bebina soged.

⁷ Bab-Jehová, gwae be an-abinsae, ar an geg-sagusad. Be-wagar mer be angi odukue, ar degiile, dule-napa-yaba-digarmaidyobi, an guoed.

⁸ Wakudaryalaba be-sabgued be anga oyoge, ar andi begi bensulid. Ar andi bese goled, be anga oyoye, ibu-igarba an naoe.

⁹ Bab-Jehová, an-isdarmaladgi be an-ollorsae, ar andi begi dukued amied.

¹⁰ Be-sogedba-ibmar-imakedgi be an-odurdake, ar be an-Bab-Dummadid. Be-Burba-nued neg-bonigan-satedba an-idue.

¹¹ Bab-Jehová, be-nug-ular, dula-gudii be an-imake. Be-Igar-innikigwad-ular, surbinsa-itogedgi be an-onoge.

¹² Be-dule-wiledaked-ular, an-isdarmalad be ogiloge. Bela an-balengindimalad be obeloge, ar andi be-mai gued.