Salmo 142 - Kuna San Blas

David Bab-Dummadse bendakleged-egisnaid

David we-namaked-Masquilʼye-nugad narmaksad. David akwasailayaba-dukusigu, Bab-Dummadse gornai gusad.

¹ Bab-Jehováʼse ise-gollar bendakleged an egised, Bab-Jehováʼse ise-wilegar an e-sabgued egisnaid.

² Bab-Dummadga naibi-itodiid, an sogoed, an-sulibinsa-itodiid, an ega sogoed.

³ Bab-Dummad, an geggus-itogele, bato be an-daksabinnedaed. An bia nadele, abala dulemar an-yardakega, an-iduar ibmar-sisadamalad.

⁴ An-argan-nuedsik an atakdele, dule-an-bendaked wargwensaale gwen daklesurdaed. Neg-dukued an sulid, dule-wargwensaale angi binsasulid.

⁵ Bab-Jehová, be-an-bendakegala, an bese gochad. An bega sogsad: “Bebi unnila an-bendaked maid. We-napneggi dulemar-bukwad-abargi bebi unnila anga gudiid.”

⁶ Bab-Dummadye, an-gornaid be itoge, an sulibinsa itoged. An-bareginnanamaladgi be an-bendake, ar anba bur bule gangumalad.

⁷ An be-nug-odummogega, wegi-an-galessiidgi be an-onodage. Ar be-sabed be anga oyononikile, dule-inniki-gudimalad weligwar an-ebiris ambikunonimaloed.