Salmo 139 - Kuna San Blas

Bab-Dummad bela-neg-ugakaase-gudiid

Namakmalad-e-iduedga narmaklesad. David we-namaked narmaksad.

¹ Bab-Jehová, be an-baramied. An-gudiid bela be wisid.

² Sana an sigoe, sana an gwisguoe, be nue-wisimakaled. An begi dikasur-gudi-inigwele, bedi an-binsaed nue-wisimakaled.

³ An-nanaed, an-obunnoged, be nue-wisimakaled, bela an-igarmar be nue-wisid.

⁴ Bab-Jehová, ar amba yoo an ibmar-soge, bato bedi bela wisdaed.

⁵ Bela-belad be an-irwa gwisgudiguad. Be-argan-yaurgi be an-sediid.

⁶ Weyob be ibmar-wisidi, an bela-bela geger-itoged, ¡Bela-bela be ibmar-wisidi, an aku-itoged!

⁷ Bab-Dummad, ¿Ar bia be-Burbagi an banguoe? ¿An bia begi wakinnoe?

⁸ Ar an nibnegse naele, bedi agi maid. Ar an burgwarmalad-meged-galuse an naele, bedi agi gudibalid.

⁹ Ar an dad-nakwedsik naeyesogele, ar an magatiba naeyesogele,

¹⁰ amba be agine an-idu gudiid, be-ganguedgi be an-sedii guoed.

¹¹ An sogdibe: Negsichid an-odukuoye, neg-meegwad anga neg-mutikidga guoye, an binsa-sogsaled.

¹² Ar begardi negasichid negsichidga gusulid, begardi neg-mutikid neg-ibginedyob gued. Begardi negasichidi, neg-meegwadi, emarbi gued.

¹³ Bab-Dummad, bee be bela an-abagangi-ibmar-bukwad obinnisad. Bee be, sapidukugi an-mesisad.

¹⁴ Doggus-nuedye an bega soged, be-ibmar-obinnisadi, andi geger-daked. Be ibmarmar-imaksadi, geger-dakleged, ar we-ibmar an nue-wisid.

¹⁵ Ise-dukuale, an-abagangi arbalenaigu, an-garmardi begi odukulessulid. Ise-dukuale, an sapidukugi-mai angi-arbalenaigu, anga abgan-dubagan gwadilenai gusad.

¹⁶ An sapidukugi-maigua, bedi an-daksad. Amba yoo an we-napnegse aidedage, birgabigwa an dula-gudii guoe, bela bato be-gardagi narmakar maid.

¹⁷ Bab-Dummad, be-binsaed ibiyobi anga doggus-nued gue. ¡Be-binsaedi, ibiyobi mergue!

¹⁸ Ar be-binsaed an ebisye-sogele, bur bule ukubba mergueled. Ar an be-binsaed-ebised an obelo-sogele, amba be an-walik gudiiled.

¹⁹ Bab-Dummad, dule-isganamar be oburgwe. Dule-ablis-eomalad, angi be obangue.

²⁰ Wemar-begi-dodoar-sunmakdimaladi, binsarsunna begi gwisgumalad.

²¹ Bab-Dummad, dulemar-isdar-be-daked, ¿an isdar-daksurmo be insae? Dulemar-be-abingasulid, ¿an sae-daksurmo be insae?

²² An bela-bela isdar-daked, an-isdarmaladga gunonimalad.

²³ Bab-Dummad, be an-baramie, an-gwage-ulub be dake, be an-wilubdake, be an-binsaed dake.

²⁴ An igar-isganaba nadapi be an-dakele, geg-igar-berguedba be an-sede.