Salmo 135 - Kuna San Blas

Bab-Dummad-e-ibmar-dummagan-imaksad

¹ ¡Aleluya! ¡Bab-Jehová-nug odummolesun! ¡Bab-Jehová-e-nug odummomala! Bab-Jehová-e-maimar, Bab-Jehová-nug odummomala.

² Bab-Jehová-e-neggi-gudidimalad, ¡Bab-Jehová-e-nug odummomala! Anmar-Bab-Dummad-neg-imbagi-gudidimalad, Bab-Jehová-nug odummomala.

³ Bab-Jehová-nug odummomala, ar Bab-Jehováʼdi, dule-nuedid. E-nuggi-namaklegedgi namakmala, ar Bab-Jehováʼdi nued-binsaedgi dulemar-bendakedid.

⁴ Ar Bab-Jehová Jacob-wagan-egadga-guega susad. Israel-dulemar na egadga imaksad.

⁵ Nue an wisid, Bab-Jehová, dule-dummadid. Ibmar-bab-dummadyob-imaklemaladba anmar-Bab-Dummad bur bule dule-dummadid.

⁶ Bab-Jehová bela nibneggi, napneggi, muu-billigangi, degi, muu-billigan-wila-dummagangi e-ibmar-abeged imaked.

⁷ Bab-Jehová neg-oagnakwiardaed, dii-owiegala mar-odakarmakardaed, burwa e-galugi-bukwadgi barmiardaed.

⁸ Bab-Dummad Egipto-dulemar-e-machi-sailaginmalad oburgwisadid. Dulemarse-bakale, ibmar-durganse-bakale, oburgwisadid.

⁹ Egipto-dulemar, Bab-Dummad be-abargi Faraónʼga, bela e-maimarga oyosad, ibmar-wilubgan-dummagan, ibmar-dakledisurmalad oyosad.

¹⁰ Bab-Jehová dulemar-yar-baid-baidgi-bukwad bukidar obelosad. We-reymar-gandik-mamaid-oburgwisbalid:

¹¹ Amorreo-e-rey-Sehónʼye-nugad, Basán-e-rey-Ogʼye-nugad, bela reymar-Canaán-yargi-mamaid obelosad.

¹² Bab-Dummad we-reymar-e-yarmar mimisad, e-Israel-dulamarga mimisad.

¹³ Bab-Jehová, be-nug degisadeguad. Bab-Jehová, dulemar degisadegu be-ebinsadii gumaloed.

¹⁴ Bab-Jehová na e-dulamarga igar nabogoed, e-maimar-wiledakoed.

¹⁵ Dulemar-yar-baid-baidgi-bukwamalad na e-bab-dummadyob-ibmar-imakbukwadi, orgi sobaled, manigi sobaled. Dulemar na e-argangi sobsa nanaed.

¹⁶ We-ibmarmar gaya-nikamalanad, degite, geg sunmakmalad. Ibya-nikamalanad, degite, ibmar-daksurmalad.

¹⁷ Uaya-nikamalanad, degite, ibmar-itosurmalad, deginbali, bunnosurmarbalid.

¹⁸ E-sobmalad, deyob gumarmogad, bela a-ibmargi-bengusurmalad deyob gumarmogad.

¹⁹ Israel-dulemar, ¡Bab-Jehová-nug odummomala! Aarón-wagan, ¡Bab-Jehová-nug odummomala!

²⁰ Leví-wagan, ¡Bab-Jehová-nug odummomala! Bab-Jehová-dobee-nanadimalad, ¡Bab-Jehová-nug odummomala!

²¹ Sión-akale, Bab-Jehová-nug odummomala. Bab-Jehová, Jerusalénʼgi maid. ¡Aleluya! ¡Bab-Jehová-nug odummolesun!