Salmo 132 - Kuna San Blas

Bab-Dummad Davidʼga ibmar-imakoye sogsad

We-namaked, Jerusalénʼse-nakwe-nadapir, namakleged.

¹ Bab-Jehová, David be ebinsao, e-bukib-binsaedba-wile-itoged bela be ebinsao.

² Bab-Jehová, David bega-ibmar-ise-sogar-imaksad be ebinsae, Jacob-e-Bab-Dummad-Bur-Birigined bega ibmar-imakoye-sogsad be ebinsae, deun, David weyob sogsad:

³ “An-negse an nag-obiosulid, bipisaale an gasgi obunnogosulid,

⁴ gabemai an saosulid, wis-ibya-muruu an imakosulid.

⁵ Bab-Jehováʼga-neg-amiedse, an deyob guoed. Jacob-wagan-e-Bab-Dummadga-neg-amiedse, an deyob guoed.”

⁶ Anmar Efrata-neggweburgi-gudigu, Bab-Dummad-Dulemarbo-Igar-Mesisad-Ulugi dulemar-sunmake an itosmalad. Geb anmar Quiriat-Yearimʼgi Ulu-amismalad.

⁷ Geb anmar sogdemalad: “Anmar Babse-goled-negse namar, e-asabin sindigale anmar signamar.”

⁸ Bab-Jehová, be-obunnoged-negse be dage, be-Ulu-gandikidmala be asega dage.

⁹ Be-dule-irwa-bese-gormalad, e-mor-yomalayobi, igar-innikigwad imakmar. Bega-innikigwadba-nanadimalad, weligwaledba namakmar.

¹⁰ Be, be-mai-David-sabedbali, be-nuggi-nugsalegaled, melle wagar-biriar be dako.

¹¹ Bab-Jehová Davidʼga ibmar-ise-sogar-sogsa-gusadi, bar osulogosulid. Weyob ega sogsad: “Be-wagan-gwensak beyob reyga an omesoye.

¹² An bemarbo-igar-mesisad-sogedba be-wagan nanaele, an-igar-mamaidgi-an-e-odurdakoedba nanaele, e-mimmigan reyga degibi megmarmogoed.”

¹³ Ar Bab-Jehová, Sión-yala-nug-imaksad, egi-megega abesad.

¹⁴ Weyob sogsad: “We, an-obunnoged-negga degisadegu gudii guoed. Wegi an-ologana an sioed, ar an deyob abeged.

¹⁵ E-mas gatik-obinebaka-merguega an imakoed, e-dule-wilegana masgi an oimmogoed.

¹⁶ Amba deyob, e-dule-irwa-Bab-Dummadse-gormaladga bendakleged-mola an ega yooed, e-dule-nuegan, weligwaledba namakmaloed.

¹⁷ ”Wegine, David-e-gangued-gannar-nikuega an imakoed. An-nuggi-nugsalegaled gwallu-meegwadyob negsemai-guega an imakoed.

¹⁸ E-isdarmalad, binged-dummad-nikuega an imakoed. Davidʼdina e-ologurgin-dakarmakaled yooed.”