Salmo 12 - Kuna San Blas

Bab-Dummadse bendakleged-egised

We-namakleged, Seminitʼba namaklegoye.

¹ Bab-Jehováʼye, be anmar-bendake. Dule-be-sogedba-nanamalad bergusad. We-napneggine, dule-napiragwad bar-daklesulid.

² Dulemar na muchub-muchub gakangi sunmakmalad, nue-nabiridyob sunmakmalad. Asginbi nued sunmakmalad, ulubgindi, emar-yardakedgi binsamalad.

³ Bab-Jehováʼye, dule-nue-nabiridyob-sunmakmalad, bela be obeloge. Dule-san-dummarba-sunmakmalad, bela be osuloge.

⁴ We-dulemar sogdimalad: “Sunmakedgi anmar dulemargi obinoed. Aga anmar gwabin-duku nikasursi. Anmar-gwabin-duku dule-baidgadsulid. ¿Degite, doa anmargi obinosunna? Dule anmargi-obined sate.”

⁵ Emide, Bab-Jehová, bede soged: “Dule-e-bendaked-satemalad mesagwar-imaklediid-ular, an gwisguoye. Dule ibmar-sate-gudimaladba bela-belad-bodimalad, an bendakoye.”

⁶ Bab-Jehová-gayaburba isedar-swilimakaledid. Igi mani swilimakar-imaklegega, soo-yagi gannar-gannar ilagugle (7) dulege, aba bur bule Bab-Dummad-gayaburba swilidik gued.

⁷ Bab-Jehováʼye, bebi-unnila dule-isganamar-idu, be anmar-edarboed. We-dule-isganamar-idu, degisadegu, be anmar-irwa gwisguoed.

⁸ Dule-isganamar anmar-ebirdiile, bee be anmar-edarboed. We-napneggi igar-isganamar bur yeerdaklealile, bee be anmar-bendakoed.