Salmo 119 - Kuna San Blas

Bab-Dummad-Igar-Nued-Maidgi namaked Alef

Alef

¹ Dulemar-inniki-nanadimalad, Bab-Jehová-Igar-Maidba nanadimalad. Amargi, Bab-Jehová, ise-nued binsaed.

² Dulemar-Bab-Dummad-Igar-Maidba-gudimaladi, bela-bela-ulubgi-be-amidimaladi, amargi, Bab-Jehová, be ise-nued binsaed.

³ We-dulemar, bipisaale ibmar-isgana imakdisurmalad, unnila, Bab-Dummad-Igarbarbi nanadimalad.

⁴ Bee be Be-Igar-Islidik-Mamaid mesisad, adi, a-sogedba nanamalagar.

⁵ Be-Igar-Mamaidba an nanadiguega, bitigi bela-bela eba an innikii nanadii gusana gadin.

⁶ Bela Be-Igar-Islidik-Mesisadba an nanaele, an binge-itogosulid.

⁷ Be-Igar-Inniki-Nabolemalad-Mamaid an durdaksale, an innikigwadbali ulubgi be-ogannogoed.

⁸ ¡Be-Igar-Mamaid-Sogedba, an nanaoed! ¡Bipisaale melle be an-iego!

Bet

Bet

⁹ ¿Igi-sapingwa melle-isguega, na nuekwaa nanadii guergebe? Unnila, Be-Gayaburba-Maidbarbi nanadii guergebed.

¹⁰ An gwage-ulubgi bela-belad, an be-amidiid. Be-Igar-Islidik-Mamaidgi, melle aibanega be an-imako.

¹¹ Melle begi-isguegala, Be-Gayaburba an-gwage-ulubgi an na sediid.

¹² ¡Bab-Jehová, be-nug-odummolesun! ¡Be-Igar-Mamaidgi be an-odurdake!

¹³ Igar-Megisadba bela be ibmar-sogsadi, dulemarga an sogsad.

¹⁴ Bela ibmar-nikadba bur bule Be-Igar-Mamaidba-nanadiidgi an weligwar itodiid.

¹⁵ Be-Igar-Islidik-Mamaidgi an binsaoed, Be-Igarbarbi an nue-nanadii guoed.

¹⁶ Be-Igar-Mamaidgi an weligwar itogoed. Bipisaale, an Be-Gayaburba gwen iegosulid.

Guímel

Guímel

¹⁷ An be-mai-guedi, nue-wile be dakdii guo, deyobi, an nabir gudii guoed, be-Gayaburba-sogedba an nanadii guoed.

¹⁸ Be-Igar-Biriginmalad-Mamaid, magar-itogega be an-imake.

¹⁹ We-napneggine, an dule-baid gued, melle angi Be-Igar-Islidik-Mamaid be odukue.

²⁰ Bane-bane an Be-Igar-Nabolemalad bei-durdakbiedbali, an yaisur-itoged.

²¹ Dule-san-dummarba-imakmaladse be urwemaid. Dule-isganamar, Be-Igar-Islidik-Mamaidgi-banguder, ega be sabsur-ibmar soged.

²² Melle we-dulemar isdar-an-dakmalaga, be imako. Melle ibgwensur-an-samalaga be imako, Ar an Be-Igar-Mamaidba an nanadiid.

²³ Dule-gandikmalad angi ichakwa-sunmakmar-inigwele, andi be-mai-guedi, Be-Igar-Mamaidginbi binsadii guoed.

²⁴ Be-Igar-Mamaid, weligwar an-imaked, anga binsaed-ukedid.

Dálet

Dálet

²⁵ An san bela-itoged, Be-Anga-Ibmar-Sogsadba be an-ogannoge.

²⁶ An-gudiidgi an bega sunmaksagua, be an-abin-imaksad. ¡Be-Igar-Mamaidgi be an-odurdake!

²⁷ Be-Igar-Islidik-Mamaidi, magar-itogega be an-imake, adi, be-ibmar-gegerdaklemaladgi an binsaegar.

²⁸ An ulubgi wile-itogedba bodiid, degisoggu, Be-Gayaburbagi baisur-itogega be an-imake.

²⁹ Gakan-igarmargi mer-nanaega be an-imake. Be-wile-dule-dakmaidba Be-Igar-Nuegan-Maidgi be an-odurdake.

³⁰ Igar-Napiragwad-Maid an susad. Be-Igar-Mamaid angadga an imaksad.

³¹ Bab-Jehová, Be-Igar-Sogsadgi an alamaknaid, melle bingeguega be an-imako.

³² Be-Igar-Islidik-Mamaidba an gwae ibsaoed, ar gwage-weligwar an-imakdaed.

He

He

³³ Bab-Jehová, Be-Igar-Mamaidgi be an-odurdake, an eba nanadii guoed.

³⁴ Be-Igar-Maidba-nanaegala, Be-Igar-Maid magar-itogega be an-imake. Geb gwage-ulubgi bela-belad eba an nanadii guoed.

³⁵ Be-Igar-Islidik-Mamaidba be an-iduge, ar agi an wergued amied.

³⁶ Unnila Be-Igar-Mamaidbarbi-binsaega be an-imake. Melle ibmar-baiganbina-surbinsa-itoged be an-imake.

³⁷ Melle ibmar-binsarmaladbina-sogega be an-imake. Be-Igar-Maidba-nanaega be an-imake.

³⁸ Igi be dule-be-dobee-nanadimaladga be ibmar imaksa, deyobi, an-be-mai-guedga be Ibmar-Imakoye-Sogsad, be imake.

³⁹ Mesagwar-imaklegedgi an dobe-itodiidgi be an-onoge, ar Be-Igar-Nabogedi, we, ibnuedid.

⁴⁰ Be-Igar-Islidik-Mamaidbina an nue-soged. Be-igar-innikii-imakedba dula-gudii be an-imake.

Vau

Vau

⁴¹ Bab-Jehová, igi na be Sogsa-Gusa, deyob be-sabgued be anse oyoge, deyob dule-bendaked be anse oyoge.

⁴² Deyobi, dule-isdar-an-dakmaladga an sogoed. Ar Be-Ibmar-Sogsadgi an bensulid.

⁴³ An-gwabinduku, ibmar-inniki-soged be imake. Ar Be-Igar-Mamaidgi an bensulid.

⁴⁴ Be-Igar-Mamaidba an degisadegu ibsadii guoed, Deyob degisadegu an imakoed.

⁴⁵ An bonisuli nanadii guoed, ar an Be-Igar-Islidik-Mamaid amisad.

⁴⁶ Be-Igar-Mamaidgi reymar-asabin an sunmakoed, gwen an bingeguosulid.

⁴⁷ Be-Igar-Islidik-Mamaidbina an nue-soged, an egi wergued.

⁴⁸ Be-Igar-Islidik-Mamaid an nue-sabedbali, an-argan an onakoed, Be-Igar-Maidgi an binsaoed.

Zain

Zain

⁴⁹ An-be-mai-guedga be Ibmar-Sogsa-Gusadi be ebinsao, a-Gayaburba-abdakagwar-gudiguega, be an-imaksad.

⁵⁰ An bukib-binsaedba-wile-itodiidgi, a-Gayaburba baisur-itogega an-imaked, Be-Ibmar-Sogedi, an-ogannodaed.

⁵¹ Dule-san-dummarba-imakmalad angi nue-isdar sunmakdimalad, degi-inigwele, andi Be-Igargi bangudisulid.

⁵² Bab-Jehová, be epenne Be-Igar-Nabosadi an ebinsaed. A-Igarmala, an-gwage-baisur-itogega imaked.

⁵³ Dule-isganamar Be-Igar-metemaladi, sae-itogega an-imaked.

⁵⁴ An we-napneggi sikwas-gudiidgi, Be-Igar-Mamaid, an-namakedga gusad.

⁵⁵ Bab-Jehová, mutikgusale, an be-ebinsaardaed. Be-Igar-Sogedba an nanabied.

⁵⁶ Be-Igar-Islidik-Mamaid-sogedba-nanadiguedi, angi siid, an imakedsegad.

Chet

Chet

⁵⁷ Bab-Jehová, bebi angadga gued, Be-Gayaburbaba-nanaoye an sogsad.

⁵⁸ Bela-bela gwagegi an be-amidiid. Be-Ibmar-Sogsadba ise-wile be an-dake.

⁵⁹ An-daedgi an binsaargua, Be-Igar-Mamaidba an gannar nanaded.

⁶⁰ Be-Igar-Islidik-Mamaid-sogedba nanaegala, an undar-binsadii gussulid.

⁶¹ Dule-isganamar an-gaegala, an-ebirdimalad. Degi-inigwele, Be-Igar-Maidi an gwen-iessulid.

⁶² Be-Igar-Inniki-Maid-nukad, an bega dog-nuedye-sogegala, nega-gabigwenbali an gwichiguardaed.

⁶³ Ani an, dulemar-be-dobekwaa-nanadimalad-e-aid. Ani an, Be-Igar-Islidik-Mamaidba-nanadimalad-e-aid.

⁶⁴ Bab-Jehová, ¡Be-Igar-Mamaidgi be an-odurdake! We-napneg-naidgi bela be-sabgued-nikadi oyolenaid.

Tet

Tet

⁶⁵ Bab-Jehová, bee be, Be-Ibmar-Sogsadbali, be nued an-nidii gusad.

⁶⁶ An Be-Igar-Islidik-Mamaidgi an bensulid. Agala, gatik-ibmar-wisgued be an-imake, ibmar-mag-itoged be an-imake.

⁶⁷ An sabsur-odurdakleged-iduale, an-itolegedba galagwensuli an gudii daed. Emigindi, Be-Gayaburba-Sogedba an nanadiid.

⁶⁸ Bab-Dummad, bedi dule-nuedid. Be, ibmar-nuegan-imakedid. ¡Be-Igar-Mamaidgi be an-odurdake!

⁶⁹ Dule-san-dummarba-imakmaladi angi isdar-sunmakmalad. Degi-inigwele, andi gwagegi bela-belad Be-Igar-Islidik-Mamaid-sogedba an nanaed.

⁷⁰ We-dulemar, gwage-dutusurmaladid. Andina, Be-Igar-Maidgi wergudiid.

⁷¹ Bur-nueddo, an sabsur-odurdaklesgu. Abali, an Be-Igar-Mamaid durdaknonikid.

⁷² Be-Igar-Maidi, olo-mili-milibalidba bur bule ibnuedid. Be-Igar-Maidi, mani-mili-milibalidba bur bule anga ibidar-nuedga gued.

Yod

Yod

⁷³ Bee be, we-napnegse an-barmialid, bee be, anga burba uksad. Be-Igar-Mamaid-durdakegala, nono-nued be anga udage.

⁷⁴ Dulemar-be-nug-ogannodimalad an-dakalile, weligwar-itodmaloed, ar an, Be-Gayaburbagi, bensuli gudiid.

⁷⁵ Bab-Jehová, an wisid, Be-Igar-Mamaidi innikigwadbiid. Degisoggu, nabiridba sabsur-be-an-odurdaksado.

⁷⁶ Be-sabguedi, an-gwage-baisur-itoge imaked. Ar Be-Anga-Sogsagusadba be imaksad.

⁷⁷ Be-wile-dule-dakedi, anse be oyodage. Dula-gudii be an-imakdage. Ar Be-Igala, weligwar an-imakedid.

⁷⁸ Dule-san-dummarba-imakmalad, obingegsalesun, ar binsarsunna an-ogakansadimalad. Andi Be-Igar-Islidik-Mamaidgi bur binsaoed.

⁷⁹ Dulemar-be-nug-ogannodimalad, gannar anbo-atogega be imaksun. Dulemar-Be-Igar-Mamaid-wismalad, gannar anbo-atogega be imaksun.

⁸⁰ An-gwage Be-Igar-Mamaidba innikii nanasun, adi, an melle bingeguegar.

Caf

Caf

⁸¹ Bab-Jehováʼye, bela-belad be-an-bendaked an abdakdiid, Be-Ibmar-Sogsadgi an bensulid.

⁸² Be Anga-Ibmar-Sogsad-abdakdiidbali, an-dala galakuded. An weyob soged: “¿Sana wede gwage-baisur-itogega be an-imaknonikoe?”

⁸³ Bato an seredgus-inigwele, wagar-bapigwargus-inigwele, amba Be-Igar-Mamaid gwen an iedisulid.

⁸⁴ ¿Bule napi an dula gudii guoe? ¿Sana be, dule-an-balegindimalad-sabsur-odurdakoe?

⁸⁵ Dule-san-dummarba-imakdimaladi, an-yardakega igar amismalad. Be-Igar-Sogedba-nanadisurmaladi, an-yardakega igar amismalad.

⁸⁶ Bela Be-Igar-Mamaidi innikigwadbiid. ¡Bab-Dummadye, be an-bendake! Binsarsunna an-balegindimalad.

⁸⁷ Napneggi an-oburgwednaga gusmalad. Degi-inigwele, andi Be-Igar-Mamaidgi gwen bangussulid.

⁸⁸ Be-sabed-dummarba-nikadbali, be anga burba-ogannosun. Be-Igar-Mamaid-sogedba an nanaoed.

Lámed

Lámed

⁸⁹ Bab-Jehová, Be-Gayaburbadi degisadeguad, nibneggi, Be-Gayaburbadi gwen gwagmaisulid.

⁹⁰ Be-innikidaedi, degisadeguad. Napneg be nasiksad, innikigwadba nagusad.

⁹¹ Be-Igar-Uksadbali, emi-iba-akale, we-ibmarmar amba bukwad. Bela we-ibmarmala be-sogedba ibmar-imakbukwad.

⁹² Be-Igar-Maid, weligwar an-imaksasulina, bukib-binsaedba an bato bergusbinnenad.

⁹³ Bipisaale, Be-Igar-Mamaid an gwen iegosulid, ar we-igarbali, be an-san-burba dula imaksad.

⁹⁴ Bab-Jehováʼye, be an-bendake, andi, begadga-gued. Andi, Be-Igar-Islidik-Mamaid ulubse baramidiid.

⁹⁵ Dule-isganamar an-obelobigudimalad. Andi, Be-Igar-Mamaid-magar-itogega alamakdiid.

⁹⁶ Bela ibmarmar e-bergued-nika an dakdiid. Unnila, Be-Igar-Islidik-Mamaidbi gege bergued.

Mem

Mem

⁹⁷ ¡Be-Igar-Maidbina an nue soged! Bane-bane an egi binsadaed.

⁹⁸ Be-Igar-Mamaidi, an-isdarmaladbali bur bule binsaed-nika an-imaked. Ar Be-Igar angadga an imaksad.

⁹⁹ Bela an-odurdakmaladba bur bule an ibmar magar-itoged. Ar an Be-Igar-Mamaidgi binsadigu daed.

¹⁰⁰ Girmarba bur bule an ibmar magar-itoged. Ar an Be-Igar-Mamaid-sogedba nanadiid.

¹⁰¹ Be-Gayaburba-Sogedba-nanaegala, bela igar-isganagi an bangusad.

¹⁰² Be-Igar-Mamaidgi an bangussulid, ar bee be an-odurdaksad.

¹⁰³ Ibibayobi Be-Gayaburba anga ochii gue. Achanis-maedba bur bule anga ochii gued.

¹⁰⁴ Be-Igar-Mamaidbali, an binsaed-nuegan amidiid. A-ulale, bela gakan-igarmar an isdar daked.

Nun

Nun

¹⁰⁵ Be-Gayaburba gwallu-meegwadyobi an-iduedga gued. Neg-ibegwalebayobi anga igar oyoged.

¹⁰⁶ An bega ibmar-ise-sogar-sogsadi, an imakedsegad. Be-Igar-Mamaid-sogedba an nanadii guoed.

¹⁰⁷ Bab-Jehová, an bela-bela bato nue dummad-wilediid. ¡Be-Gayaburba-sogedba be an-ogannoge!

¹⁰⁸ Bab-Jehová, an bega ibmar-sogedi be abingasana gadin. Be-Igar-Mamaidgi be an-odurdake.

¹⁰⁹ Bonigan-abargi an-sandi gudiid, degi-inigwele, Be-Igar-Maiddi an iedisulid.

¹¹⁰ Dule-isganamar an-yardakbimalad, degi-inigwele, Be-Igar-Mamaidgi andi bangudisulid.

¹¹¹ Be-Igar-Mamaidi, degisadegu angadga-guega an susad, ar an-gwage-weligwar imakdaed.

¹¹² Degisadegu, an-burgwedsega gwage-ulubgi Be-Igar-Mamaid-sogedba nanadioye an sogsad.

Sámec

Sámec

¹¹³ Dule-wagar-darbo-damaladi, an isdar daked. Be-Igar-Islidikiddi, an nue-sabed.

¹¹⁴ Bab-Dummad, bedi an-odukuega gued, bedi an-sigu-abgaedibayobi anga gued, Be-Ibmar-Sogsadi, an edarbediid.

¹¹⁵ “¡Dule-isganamar, be angi bangue! An-Bab-Dummad-Igar-Mamaidba an nanabied.”

¹¹⁶ Be-Gayaburba-Maidbali, be an-ogannoge, agi an dula gudiguoed. An-ibmar-edarbediidgine, melle bingeguega be an-imake.

¹¹⁷ Be an-bendake, adi, an bendaklegoed. Be-Igar-Mamaidgi, an weligwar itodiguoed.

¹¹⁸ Dulemar-Be-Igar-Mamaidgi-nodimaladi, be isdar dakdaed. Ar gakansaedginbi binsadidamalad.

¹¹⁹ Napneggi dule-isganamar-bukwadi, ibmar-isgana-milediidyob be daked. A-ulale, an Be-Igar-Mamaidbina nue-soged.

¹²⁰ An be-dobedbali, be-asabin an wawanmakgwichid, Be-Igar-Nabolemalad-dobee an itoged.

Ayin

Ayin

¹²¹ Igar-inniki-imaklemalad an imakdiid. Melle dule-mesagwar-an-imakdimaladga be an-urmako.

¹²² An-be-mai-guedga, igar-nueganbi-guega be imako. Melle dule-san-dummarba-imakmaladi mesagwar-an-imakega be imako.

¹²³ Be an-abonogega, an be-abdakdiidba an-dala mommoleded. Be-Igar-Sogsad anga-guedi, an edarbediid.

¹²⁴ Sabed-dummarba be nikadbali, be-mai be sabguo. Be-Igar-Mamaid be an-odurdake.

¹²⁵ Andi be-mai gued. An Be-Igar-Mamaid-durdakega, Be-Igar-Mamaid mag-itoge be an-imake.

¹²⁶ Bab-Jehová, ar Be-Igar-Mamaidba nanasurmarsoggu, be-ibmar-imakbied be imaksunna.

¹²⁷ Bela ibmarmar-baiganba bur bule Be-Igar-Mamaid bur an sabed. Be-Igar-Mamaidbina olobali bur bule an bina soged. Olo-sunnadbali bur bule an bina itoged.

¹²⁸ A-ulale, Be-Igar-Mamaidbali an nanaed. Bela Be-Igar ibmar-baiganbali nueganbi an daked. Bela gakan-igarmardi an isdar daked.

Pe

Pe

¹²⁹ Be-Igar-Mamaidi doggus-ibnuedid. A-ulale, an e-sogedba nanadiid.

¹³⁰ Be-Gayaburbagi sunmakledele, magar ibmar-itogega anmar-imaked. Dule-ibmar-wissulid magar-ibmar-itogega imakbalid.

¹³¹ An bela-bela Be-Igar-Mamaid-durdakbiedbali, Be-Gayaburbabina an nue soged.

¹³² Bab-Dummad, wile-be-an-dake. Igi be gusgu dule-be-nug-odummodimaladi wile be dakdae, deyobi, be an-dakmoga.

¹³³ Be-Igar-Sogsadba-nanaega be an-imake. Melle igar-isgana angi obinega be imake.

¹³⁴ Dule-ibmar-sabsur-imakedgi be an-ollor-imake, ar an Be-Igar-Mamaidba an nanabied.

¹³⁵ Be-ise-nued-binsaedi be-maiga be oyoge. ¡Be-Igar-Mamaidgi be an-odurdake!

¹³⁶ Be-Igar-Mamaidba bar nanasurgusmalad-ulale, an-ibyanis suurmakemaid.

Tsade

Tsade

¹³⁷ Bab-Jehová, bedi dule-innikigwadid, innikigwadba bedi igarmar nabogedid.

¹³⁸ Be-Igar-Mamaid-be-uksadi, bela innikigwadbiid. Be-Igar-Mamaidgi bengulesulid.

¹³⁹ An-isdarmalad Be-Gayaburba-Maid-iedmaladbali, an bela-bela nue sae-itoged.

¹⁴⁰ Be-Gayaburba isedar-swilidikidid, a-ulale, an Be-Gayaburba nue-sabed.

¹⁴¹ Andi san-bipi-imakdiidbali, ibgwensur daklediid, degi-inigwele, Be-Igar-Mamaidi, an iedisulid.

¹⁴² Be Igar-Inniki-Imakedi, degisadegu innikigwadbiid. Be-Igar-Mamaidi, napiragwadid.

¹⁴³ Surbinsa an itononikile, Be-Igar-Mamaiddi weligwar an-imaked. Suli-suli an itononikile, Be-Igar-Mamaiddi weligwar an-imaked.

¹⁴⁴ Be-Igar-Mamaiddi, gusgu innikigwadbiid. A-igarba nabir gudiguega, a-igar-magar-itoge be an-imake.

Cof

Cof

¹⁴⁵ Bab-Jehová, bela-bela gwagegine an bese goled. Be an-abinsae. Be-Igar-Mamaid-sogedba an nanabied.

¹⁴⁶ An-bendakye an bese goled. Ar Be-Igar-Mesisad-sogedba an nanabied.

¹⁴⁷ Bese bendakleged egisegala, wakudaryalaba an gwisguardaed. An Be-Gayaburbagi bensulid.

¹⁴⁸ Be-Igar-Mamaidgi-binsaedba, mutikidbali, an gabdasulid.

¹⁴⁹ Be dule-wile-nue-dakdasoggu, be an-itoge. Bab-Jehová, Be-Igar-Innikigwadba be an-ogannoge.

¹⁵⁰ Dule-isganamar-an-balegindimaladi, an-walikgudanikid. Amar, Be-Igar-Mamaidgi bangus gudimalad.

¹⁵¹ Bab-Jehová, be an-walikaa gudiid. Be-Igar-Mamaidi, belagwable napiragwadbiid.

¹⁵² Dikasurgus, an Be-Igar-Mamaid wisi gudiid, ar gusgu be a-Igar omesisad.

Resh

Resh

¹⁵³ An-wile-itodiidi be dake, bonigangi be an-ollor-imake, ar an Be-Igar-Mamaidi gwen an iedisulid.

¹⁵⁴ Be an-irwa gwisgue, be an-bendake. Be-Gayaburba-sogsadba be an-ogannoge.

¹⁵⁵ Dule-isganamargi, burbar-bendakleged-igar dikasur naid, ar Be-Igar-Mamaidi gwen-amisurmalad.

¹⁵⁶ Bab-Jehová, be-dule-wiledakedi dummarbaa gued. Be Igar-Nabomaidba, burba-dulad be anga uke.

¹⁵⁷ Dule-an-balegindimalad bukidarad, an-isdardakmalad bukidarad, degi-inigwele, Be-Igar-Mamaidgi an bangudisulid.

¹⁵⁸ An dule-yardakdimalad-dakalile, an sae-dakdaed, ar Be-Gayaburba-sogedba gwen nanadisurmalad.

¹⁵⁹ ¡Bab-Jehová, be dake! Ibiyobi Be-Igar-Mamaid an sabe. Be sabgued-dummarba-nikadbali, burba-dulad wis be anga uke.

¹⁶⁰ Bela Be-Gayaburba-Mamaidi napiragwadid, Be-Igar-Maidi bela innikigwadba degisadegu maid.

Sin

Sin

¹⁶¹ Ar binsarsunna dule-gandikmaladi an-balegindiid, an-gwage-ulubgine an Be-Gayaburba-dobekwaa nanadiid.

¹⁶² Be-Gayaburbagi an weligwar-itoged, dule-ibmar-nuegan-gargerbamalad-amisadyobi, an egi wergued.

¹⁶³ Gakan-igar an sae-daked, an nue-isdarsunna-dakdaed. Degi-inigwele, Be-Igar-Maiddi an nue-sabed.

¹⁶⁴ Be-Igarmar nue-napiragwad-guedbali, an bali-bali be-nug odummoged.

¹⁶⁵ Dule-Be-Igar-Mamaid-sabgudimaladi, gwagegi bogidik itodimalad. Wemar igar-isganaba gege selemalad.

¹⁶⁶ Bab-Jehováʼye, wis be an-bendakena gadin. Ar Be-Igar-Mamaidbali an ibmar imakdiid.

¹⁶⁷ Bela-belad an Be-Igar-Mamaid-sogedba nanadiid, ar an Be-Igar nue-sabed.

¹⁶⁸ Bela Be-Igarmar-Mamaidba an nanadiid, ar bela be an-ibmar-saedi wisid.

Tau

Tau

¹⁶⁹ Bab-Jehováʼye, gandikidba an bese-goledi, bese warmaksun. Be-Gayaburba-Maidba magar-ibmar-itogega be an-imake.

¹⁷⁰ An bese ise-wilesakwaa-goledi bese warmaksun. Be-Ibmar-Sogsadba be an-bendake.

¹⁷¹ Be-Igarmar-Mamaidgi be an-odurdaksad. A-ulale, an-gwabinduku be-nug ogannoged.

¹⁷² Ar bela Be-Igar-Mamaid innikigwadbisoggu, Be-Ibmar-Sogsadgi an namaked.

¹⁷³ Bab-Jehováʼye, Be-Igar-Mamaidi angadga an imaksasoggu, gwae be an-bendakdage.

¹⁷⁴ Bab-Jehováʼye, wis be an-bendaked an be-abeged. Be-Igar-Maidi weligwar an-imakedid.

¹⁷⁵ Be-nug-odummogega, dula-gudii be an-imake, Be-Igar-Nabolemaladi, an-bendakega gusun.

¹⁷⁶ Sibad-wawaad-yoggus-gudibayobi, an gudiid. An-be-maiga-gudiid be amidage, ar Be-Igar-Mamaidi an gwen iedisulid.