Salmo 116 - Kuna San Blas

Bab-Dummadga-doggus-nuedye-soged

¹ Bab-Jehováʼbina, an bela-belad soged. An-ese-wilesakwaa-goledi an-itoged.

² Ar Bab-Dummad an-itodasoggu, bane-bane an burgwedse ese gordii guoed.

³ Burgwed-igar nue an-ebiris nagusad. Burgwarmalad-meged-galu anbina nue-itos naid. Degidbali, surbinsa an itoded, gwage-nunmak an itonaded.

⁴ Degidgine, Bab-Jehováʼse an goted: “Bab-Jehováʼye, wis be an-bendakye.”

⁵ Bab-Jehová, wile-dule-dakedid, dule-innikidaedid. Anmar-Bab-Dummad, ise-wile-dule-dakedid.

⁶ Bab-Jehová, dule-belagwadamalad akwemaid. An nue-bela-maidgi, an-abonosad.

⁷ Emigindi, an bar bukib-binsaosulid, gwage-bogidik-gudii guoed. Ar Bab-Jehová angi nued binsasad.

⁸ Bab-Jehová, bee be burgwedgi an-san-burba-onosad, an-ibyanis be elisad, galagwensuli-gudiidgi be an-onosad.

⁹ Degisoggu, dule-bukwamalad-abargi, Bab-Jehová-asabin an gudii guoed.

¹⁰ An nue-bukib-itodiiye an sog-inigwele, amba an Bab-Dummadgi bensulid.

¹¹ An sulibinsa-itogedgi an sogsad: Bela dulemar gakansaedbiiye.

¹² Bab-Jehová bela-belad angi nued-binsasadi, ¿ibugi an bennukoe?

¹³ Unnila abonolesad-ular, Bab-Jehováʼga dog-nuedye-sogega, noggi an vino ukoed. Unnila Bab-Jehová-nuggi an goloed.

¹⁴ Unnila Bab-Jehováʼga an ibmar-imakoye ise-sogar-sogsadi, bela dulemar-asabin an imakoed.

¹⁵ Bab-Jehová dule-eba-nanaimalad-burgwedi bela-bela yeer daked, ega ibnuedid.

¹⁶ Bab-Jehová, ani an be-maiga gued. An be-machi-innikigwadid, an be-maiga gudiid. Galessiidgi be an-ollor-imaksad.

¹⁷ Bab-Jehová, an bega doggus-nuedye-sogega, ibmar-ogumakar-ukleged ukoed. Bab-Jehová, be-nuggi an goloed.

¹⁸ Bab-Jehováʼga an ibmar-imakoye ise-sogar-sogsadi, bela e-dulamar-asabin an imakoed.

¹⁹ Bab-Jehováʼse-goled-neg-imbagi an imakoed, Jerusalén-neggwebur-abargi an imakoed. Aleluya, ¡Bab-Dummad-nug odummolesun!