Salmo 115 - Kuna San Blas

Anmar-Bab-Dummad-nibneggi-maid

¹ Bab-Jehová, be-nug-odummolegega bega namakleged. Anmar-nug-odummolegega namaklesulid. Be dule-wiledakedba, be ibmar-innikigwad-sogedba, a-ular, bega namakleged.

² Ar ibiga dulemar-yar-baid-baidgi-bukwamalad anmarga sogoe: “¿Bia be-Bab-Dummad nadsunna?”

³ Anmar-Bab-Dummad nibneggi maid, ar ibi na imakbigusa, bela imaksad.

⁴ Dule-baigan ibmarmar-e-bab-dummadga-imakbukwadi, manigi sobaled, orgi sobaled, dulemar e-argangi sobsananaed.

⁵ We-ibmardi, gaya nikamalanad, degite, sunmaksurmalad. Ibya nikamalanad, degite, aku-atakmalad.

⁶ Uaya nikamalanad, degite, itosurmalad. Asu nikamalanad, degite, ibmar-yapanned usurmalad.

⁷ Argan nikamalanad, degite, ibmar ebusurmalad. Nag nikamalanad, degite, nanasurmalad. E-dolewar nikamalanad, degite, ibmar-soggwensaar bisurmalad.

⁸ E-sobmalad, deyobi gumarmogad, bela-egi-bengusurmalad, deyobi gumarmogad.

⁹ Israel-dulemar, ¡mer Bab-Jehováʼgi bengumala! Na e be-bendaked gued, be-sigu-abgaedga gued.

¹⁰ Aarón-wagan, dule-irwa-Bab-Dummadse-gormalad, ¡mer Bab-Jehováʼgi bengumala! Na e be-bendaked gued, be-sigu-abgaedga gued.

¹¹ Bab-Jehová-urbali-gudimalad, ¡mer Bab-Jehováʼgi bengumala! Na e be-bendaked gued, be-sigu-abgaedga gued.

¹² Bab-Jehová anmar-ebinsaed, anmargi nued binsaed, Israel-dulemargi nued binsaed, Aarón-wagangi nued binsaed.

¹³ Bab-Jehová, e-urbali-gudimaladgi nued binsaed, dule-nuga-nikamaladgi nued binsaed, dule-binsarmaladgi nued binsabalid.

¹⁴ Bab-Jehová bemarga bur bule mimmigan-mergumai imaksun, be-waganga mimmigan-mergumai imakbarsun.

¹⁵ Bab-Jehová-nibneg-obinnisadi, bemargi nued-binsaena gadin. Bab-Jehová-napneg-obinnisadi, bemargi nued-binsaena gadin.

¹⁶ Nibneg, Bab-Jehováʼgadid. Napnegdi, Bab-Jehová dulemarga uksad.

¹⁷ Dule-burgwarmalad Bab-Jehová-nug odummosurmalad. Dulemar-neg-urba-diglesmamaidi, Bab-Jehová-nug odummosurmalad.

¹⁸ Ar anmardi, emi-akale, Bab-Jehová-nug degisadegu odummodii gumaloed. ¡Aleluya! ¡Bab-Jehová-nug odummolesun!