Salmo 109 - Kuna San Blas

Bab-Dummad an-bendake

David, we-namaked narmaksad. Namakmalad-e-iduedga soglenaid.

¹ Bab-Dummad, an be-nug ogannoged. Melle be an-abin-imaksuli gue.

² Dule-isganamar, dule-gakansamalad, angi gakansaar sunmakdimalad. Gakansaedgi an-nug oichodimalad.

³ Sae-an-dakmaladbali, sunnasur angi sunmakdimalad. Binsarsunna angi yolenanaid.

⁴ Andi, we-dulemar-nue-sabed, degite, emardi angi yolenanaid. Bab-Dummad, andi emarga bese gorsii daed.

⁵ Andi, ibmar-nued ega imaked, emardi, ibmar-isgana anga imaked. Andi, wemar-sabed, emardi, sae-an-daked.

⁶ Bab-Dummad, we-dulemarga-igar-nabogega, dule-isgana ega be ogwiche, dule-e-bendaknaid egi aibined be imake.

⁷ Ega igar-nabolealir, we-dulegi isgusye-sogleged be imake, bese-goledse-bakar, ega isguedga-guega be imake.

⁸ Gwae be oburgwe. Dule-baid ei arbaed-sued be imake.

⁹ E-mimmigan, bab-sate be imake. E-ome, suisuli be imake.

¹⁰ E-mimmigan, neg-sate be imake. Dule-baiganse mani-egisdii be imake. E-neg-bibisgar-siidgi ononnoged be imake.

¹¹ Dule-ega-idu-mani-ukdidaed, bela ei ibmar-seled be imake. Na e-ibmargi-arbasad, ei dule-baigan-suega be imake.

¹² Dule-baigan we-dule-wiledaksuli be imake. Dule-baid bipisaale e-mimmigan-sergan-sated, melle wiledaked be imake.

¹³ E-wagan bela be ogiloge. Dulemar we-dulemar-bela-ieged be imake.

¹⁴ Bab-Jehová, e-bab-ibmar-isgana-imakdigusad, mer be iego, e-nan-isgudigusad, melle be iebalo.

¹⁵ Bab-Jehová, melle e-isgued be iego. We-napneggi, dulemar we-dule-ieged be imake.

¹⁶ Ar we-dulede, dule-baigan-baisur-daksa gusad. Dule-wilegana-baregindii gusad, dule-ibmarbina-sogdimalad-baregindii gusad. Dule-gwage-naibi-itodiid-baregindii gusad. We-dulemar-oburgwedse baregindii gusad.

¹⁷ Ar aimar-ukabsaed yeer itodasoggu, dulemar-baigan e-ukabsamosun. Ar egi nued-binsaed abessursoggu, melle egi nued binsamarsun.

¹⁸ Dule, emar-ukabsaedi na e-mor-dummadyob ega gusun. Emar-ukabsaedi, dii-goblegeyob egi ubosun. Emar-ukabsaedi, ina-abagalaganse-ubogeyob ega gusun.

¹⁹ We-ukabsaedi, e-mor-dummadyobi gusun. Sadergi-molidub-guur-naiyob egi nagubarsun.

²⁰ Weyobi, Bab-Jehová an-isdarmalad imaksun, weyobi, dulemar-sunnasur-angi-sunmakdimalad imaksun.

²¹ Bab-Jehová, bee be an-Dummadid, Be-nug-dummarba-nikadba wile be an-dake, dule-angi-sunmakdimaladgi be an-onoge, ar be-sabgued dummarba gued.

²² An wilegedid, an ibmar-sate gudiid, ulubgi ise-nue-naibi an itoged.

²³ Binna-binna neg-gutulemaiyobi, an nolloo gumaid, ses burwa-goledba-seled-daedyobi, an selemaid.

²⁴ An mas-gunsulidba an gaaragusad. An mas-gunsulidba an-yokor nue-nollogusad.

²⁵ Dulemar an-dakalile, angi dodoardamalad, anga alliardamalad.

²⁶ An-Bab-Dummad-Jehováʼye, be an-bendake. Sabgued-dummarba-nikadba be an-bendake.

²⁷ Bab-Jehováʼye, magar-itogega be dulemar-imake, ar bee be we-ibmar imaksad.

²⁸ Be angi ise-nued binsae. Ar emardi an-ukabsaele, akarsulid. An-isdarmaladdi be obingegsae, andi be-maiga-guedi, weligwar-itoge be an-imake.

²⁹ ¡An-isdarmaladdi be dummad-obingegsae! ¡Bela-belad-bingeguega be imake!

³⁰ Bab-Jehová-e-nug an-gayagi an odummogoed. Dule-bukidar-abargi be-nug an ogannogoed.

³¹ Ar dule-isgana dule-wilegana-oburgweye-sokalile, bee be dulemar-wilegana bendakdaed. A-ulale, be-nug an odummogoed.