Salmo 108 - Kuna San Blas

Dule-isgudimaladgi an-bendakye Bab-Dummadga soged

We-Namaked, David narmaksad.

¹ Bab-Dummad, an-gwage guagwar-naid, an bega namaklemaladgi an namakoed, ar we, an-gandikidga gued.

² ¡Gar-arpa, gar-salterio be atakmala! Iba-gwapid-onodedga ogolega an imakoed.

³ Bab-Jehová, an be-nug neggweburmar-abargi odummogoed. Dulemar-yar-baid-baidgi-bukwad-abargi an bega namaklemaladgi namakoed.

⁴ Be-sabgued nibneg-naidba bur-dummarba gued. Be-innikidaed nibnegse warmaknaid.

⁵ Bab-Dummad, bedi nibneggi maid. Gandikidba-be-yeerdakleged bela napneg-ebilis naid.

⁶ Bab-Dummad, be-neggwebur-be-nue-sabed-bendakega, be anmar-bendake, be anmar-abinsae.

⁷ Bab-Dummad e-neg-islidikid-akale sogsad: “Weligwaledgi an Siquem-neggwebur mimioed, weligwaledgi an Sucot-neba-naid ilemakoed.

⁸ Galaad-yala, angadi gued, Manasés-yala, angadi gued, Efraín-yala, an-bormo-gurginga gued, Judá-yala, an-gaapoledga gued.

⁹ Moab-yala, an-argan-enukedga gued, Edom-yargi, an-sapat bikiin an metoed, Filistea-sordamargi-nakwisadba, gandikidba an gormakoed.”

¹⁰ ¿Doa, neggwebur-gandikidse an-idugoe? ¿Doa, anga Edom-yarse-aibillemaid oyogoe?

¹¹ Bab-Dummad, ¿bee be anmar-obachagussursi? Bab-Dummad, bar be anmarga sorda-bila-onomalad-bendakdisurgusad.

¹² Dule-isdarmaladgi-nakwega be anmar-imake. Ar dulemar anmar-bendakele, gwen anmarga igarga guosulid.

¹³ Unnila, Bab-Dummadbali, anmar, anmar-isdarmaladgi nakoed. E anmarga, anmar-isdarmalad obelogoed.