Salmo 104 - Kuna San Blas

Bab-Dummad e-ibmar-obinnisad akwemaid

¹ Bab-Jehová-nug an odummoged. An-Bab-Dummad-Jehová, duledar-gandikid be gued, gandikidba yeerdakleged-mola be yosad, ibiyobi-mola-yeerdakle be yosa.

² Mola-dummad-yoiyobi nega-ibegwaledi begi ebirnaid, mola-dummad-nallaa-imaklegeyobi mogir-billi be imaked.

³ Diigine, be-nega-dummagan-urbega be imaked, mogirmala, be-moli-ur-bila-onomaladga be saed. Bedi burwa-ooreged-birgi-sii nanaed.

⁴ Burwamala, be-gayaburba-berbegedga be imaked, soo-gwabunyemaladi, be-maiganga be saed.

⁵ Napanega, e-saila-birgi be sisad, e-siidgi, bipisaale gwen bar ainirosulid.

⁶ Napanegga e-mor-dummad-naiyobi, muu-billi egi be nasiksad. Diimala, yalamar-birise nagusad.

⁷ Diimarse be uludedbali, diimala ilided. Be-dolewala-gollomakedbali, diimala uboded.

⁸ Diimala, yalamar-birise engusad, nebagansega diimala ilisbalid. Bia be ega neg-amisa, agi be diimala oambikusbalid.

⁹ Dii melle bar napneg-odogega, ega be igar mesisad, adi, a-igarse galegegar.

¹⁰ Bedi, ibe-diimar-ariogwichidi, dianganbali, oiirmakega be saed. Yalaganbali, suurmakega be imaked.

¹¹ Ibdurgan-sapurbarmaladi, a-dii gobmalad. A-diigine, moli-uayasuid-sapurmar immelemalad.

¹² A-dii-gakabali, sikwimala e-uu urbe damalad. Sapi-anagan-imbabali, nuumala namakbukwa damalad.

¹³ Be-nega-akale, yalamar be ogmaid. Be-ibmar-saedbali, napaneg yeer itoged.

¹⁴ Molimarga gagan-ara-aramalad-oniega be imaked, dulega ibmar-durgan-sanmakega be saed. Adi, agi we-masgunned amiega:

¹⁵ Vino-weligwar-emar-saed-amiega, olivo-gwallu-wagar-daarmakar-imaked-amiega, mas-burba-dula-uked-amiega be imakbalid.

¹⁶ Bab-Jehová e-sapimala-urbisadi, sapi-urwarmala Líbano-yargi urbisadi nue-obagwale gwigwichid.

¹⁷ A-sapimargine, nuumala e-uu sobbukwad, e-anagangine, dabgalamar ambikubukwad.

¹⁸ Yala-dummaganbali, sibad-sapurbarmalad bukwad. Akwa-olloganbali, nubimar dukubukwad.

¹⁹ Bab-Jehováʼye, yolamar-nagumaid-magar-daklegega, bee be nii nasiksad. Bee be dad-ibeler e-doged-wisguega be imaksad.

²⁰ Neg-mutik-imakegala, be negsichidi nasikdaed. Agine, ibmar-durgan sapurba ainiardaed.

²¹ Achumigur-nono-wawaamalad e-masbina uurmakdidaed. Bab-Dummadse na e-masgunned egisdidaed.

²² Dad-ibeler-nakwialile, geb e-neg-olloledyaba gannar dogdedaed.

²³ Geb dulemala, arbaega gwisguardamarmogad, neg-gutulegedse e-arbaed gadapdamalad.

²⁴ Bab-Jehová, ibiyobi be ibmarmar-imaksadi, ichesur mergue. Be ibmar-wisidbali, bela we-ibmarmar be imaksad. Be ibmar-obinnisadi, bela napneggi nanaid.

²⁵ Agine muu-billi-dummadi naid, a-yagine ibmar-durgan-bukidar bukwad. Ibmar-durgan-dummagan, ibmar-durgan-bipigana bukwananaed.

²⁶ Muu-billigine, ulu-dummagan iirmakbukwad, agine, be, baka-dummaganyobid-obinnisadi gudiid, ulu-dummagangi dodogega be obinnisad.

²⁷ Bela we-ibmar-durgana begi gudidiid, ega be sogedba e-masgunned ukmaid.

²⁸ Ega be masgunned ukmaid, emardi be-abin gundidiid. Ega be-argan be oyomaid, nue-immeledidiid.

²⁹ Be wagar-biriar-dakdele, be-abin gwayiddamalad. Be e-annik-mas-susale, burgwiddamalad, gannar napaga binniddamalad.

³⁰ Be-Burba be barmialile, bela gannarse napneg obinoleddaed. Deyob gannarse napneg naguddaed.

³¹ Bab-Jehová-e-gangued-yeerdakleged degisadegusun. Bab-Jehová, e-ibmar-imaksadgi wergusun.

³² Bab-Dummadi napneg-dakdele, ese napneg wawanmakdedaed. Yalamar-ebudele, waa daasa sigisdaed.

³³ An dula-gudiidgine, Bab-Jehováʼga an namakoed. Amba an dula-gudiidgine, namaklemaladgi an-Bab-Dummadga an namakoed.

³⁴ Ulubgi-an-egi-binsaedi, Bab-Dummad yeer-itogoed, Bab-Jehováʼgi an weligwar itoged.

³⁵ Dule-isgudimalad napneggi bergumarsun. Napneggi, dule-isgudimalad bar daklesuli gusun. ¡Bab-Jehová-nug an odummoged! ¡Bab-Jehová-nug odummolesun!