Salmo 102 - Kuna San Blas

Dule-naibi-itodiid Bab-Dummadse-goled

Dule-naibi-itodiid, gege-bar-gugusadgi Bab-Jehováʼse ise-boar gornaid.

¹ Bab-Jehováʼye, an bese-gornaid be itoge, wilesagwar-an bese-gornaid bese mosana gadin.

² Bonigan angi-yolenonikile, mer be an-idu dukuo, nue be an-itogo. An bese-gornaile, gwae be an-abin-imako.

³ An-ibagande, waayob bergudedaed. An-garmardina, soogi-gummaknaiyob itoleged.

⁴ An-gwage ber nollomakded, gaganyob dinguded, ukuddi bar an itosurgusad.

⁵ An binnasuli-akiginnedbali, an-garmardi daledgusad.

⁶ Noo-negsulidganba-gukudiidyobi, an wargwen itoged. Irmon-neg-ayaraledgangi-gudiidyobi, an wargwen garmakdiid.

⁷ Bar an gabdisulid, sikwi-walagwen-uas-birgi-gudidaedyobi, an gudiid.

⁸ An-isdarmalad bane-bane mesagwar an-imakdimalad, yogasaar an-nug-oichogega an-nug-gadimalad.

⁹ Degisoggu, sooburu an madisunnad. An-ibyanisde, an-gobedba-mesa an gobdisunnad.

¹⁰ Bab-Dummad, be sabsur-uludedbali, sabsur-an-imaksa gusad. Sabsur-nakwaa be an-imaksagu, be an-barmeted. Deyob be an-wiosad.

¹¹ An-ibagande, negsichiledanikiyobi, bato bergudanikid. Gagan-dinguddaedyobi, an guded.

¹² Bab-Jehová, ar bedina, degisadegu be negsemai guoed. Be-nugdina berguosulid, degisadeguoed.

¹³ Be, Sión-dulemar bendaknonikoed, be-sabgued ega be oyononikoed. Ar a-ibagan bato nagunonikid.

¹⁴ Anmar-be-maimar, Jerusalén-neggweburbina nue-sogmalad. E-negmar-ayarar-bukwadi, nunmaked-dummad anmarga uked.

¹⁵ Bela dulemar-yar-baid-baidgi-bukwamaladi, Bab-Jehová-nug-dobe-nanadii gumaloed. Bela-yar-baid-baidgi-reyga-mamaid, Bab-Jehová-e-gangued-yeerdakleged magar-dakmaloed.

¹⁶ Ar Bab-Jehová, Sión-neg-ayarar-siid gannar soboed, e-gangued-nikad oyononikoed.

¹⁷ Dule-ibmar-suli-gudimalad-ese-goledi itogoed, dule-ese-wilesagwar-gornaidi itogoed.

¹⁸ Wagan-danimalad wisgumalaga, we-ibmar narmaklego. Dulemar-gwalulemaloed, Bab-Jehová-nug-odummomalaga, we-ibmar narmaklego.

¹⁹ Ar Bab-Jehová, dulemar-gales-gorbukwad-itogega, e-neg-islidikid-akale, napneg-naid nue-dakded.

²⁰ Bab-Jehová, dulemar-oburgwilegega-galesbukwad-onogegala, napneg-naid nue-dakded.

²¹ Bab-Jehová, dulemar Sión-yargi-e-nug-barsogmalagala, napneg-naid nue-dakded. Jerusalén-neggweburgi e-nug-odummomalagala, napneg-naid nue-dakded.

²² Bab-Jehová-nug-odummomalagala, bela we-dulemala danakwaa ambikudmaloed, reymar-negsemamaidi, bela ambikudmaloed.

²³ An gudiidgine, Bab-Dummad, an-ibe an-niga onollomaksad, an-ibagan osikirmaksad.

²⁴ Agala, an ise-wilegar ega sogded: “An-Bab-Dummadye, mer be an-ibe an-ibagan osikirmakye. Bab-Dummad, ar begardina ibagan geg bergued.

²⁵ Gebesailaunni, napneg be nasiksad, degi, nibneg-naid be-argangi be nasiksabalid.

²⁶ We-napnegdina, berguoed, nibnegmoga bergumogoed. Bedina berguosulid. Igi mormar serguddae, deyobi, bela nibneg, degi, napneg, sergudoed. Mormar-ogwalegeyob be ogwaoed. Mormar-milegeyob be imakoed.

²⁷ Bab-Dummad, bedina amba gannar maid, be-ibagan gwen berguosulid.

²⁸ Be-nug-odummodimalad-e-mimmigandina, nued-gudii gumaloed. E-waganmala, be-asabinni gudii gumarmogoed.”