Salmo 10 - Kuna San Blas

Bab-Dummadse bendaklegega goled

¹ Bab-Jehováʼye, ¿ibiga be angi yoggus gudii? ¿Ibiga be an-idu dukue? An bonigan-abalagi-gunaidgi, aisaar an bebina bela-bela gudidaenad.

² Dule-isgana na-san-bule-bule-imakedgi, sabsur dule-wileged-baregindaed. Degi-inigwele, we-dule-isgana, na dukin e-ibmar-isgana-imakedgi yoleged.

³ Dule-isgana, sulibinsa-ibmarbina-sogedgi na san-ogannodiid. Dule-isgana, dule-ibmarbina-suli-suli-itodimalad-e-nug ogannoged, Dule-isganadi, isdar be-daked.

⁴ Bab-Dummadye, dule-isgana bule-bule-san-imakedbali, be-amisulid. Bipisaale begi binsasulid.

⁵ Bela-ibmar-imakdele, ega ibmar-nueganbi naddaed. Bab-Dummad, we-dule-isgana, Be-Igar-Mamaidgi gwen binsadisulid, ar akusunna daked. Ar dule-isgana, mesagwar e-isdarmalad-imakdaed.

⁶ E-gwagegi weyob binsadaed: “Dulemar gwen-an-oakalogosurye, bipisaale an boni nikuosurye, unnila, an weligwar gudii guoye.”

⁷ E-sunmakedi, unnila dule-ukabsaedginbi sunmaked, gakansaedginbi sunmaked, dulemar-sabsur-imakedginbi sunmaked. E-gayaburba unnila emar-oakalogedginbi sunmaked.

⁸ Dule-isgana emar-naibi-imakega, galimbaba gudidaed. Arbakee dulemar-argadidaed, emar-idu dukusidaed, adi, ukiar emar-oburgwegar.

⁹ We-dule, igi achumigur dule-baisur-binsadiidgi-ichomakegala, e-dukued-yaba-dukusidae, dule-ganonikir, ebipiddae, deyobi, we-dule-isgana, emar-naibi-imakega gudiid.

¹⁰ Ar deyobi, dule-e-bendakedsuli-gudiidi, dule-isganase-galenonikile, ese nue sabsur-ibitoged.

¹¹ We-dule-isgana ulubgi binsaed: “Bab-Dummad we-ibmargi gwen binsamaisurye. We-ibmar-mer-dakegala, e-wagar biir imakdaye. Ar Bab-Dummad neg-gunaid gwen dakmaisurye.”

¹² ¡Bab-Jehováʼye, be dake! ¡Bab-Dummadye, be-gangued be oyoge! ¡Melle be dule-wilediid iege!

¹³ ¿Ibiga we-dule-isganade, e-sunmakedgi mesagwar be-imakosunna? ¿Ibiga we-dule-isganade, ulubgi binsaosunna: “Bab-Dummad gwen anga akar sogosurye?”

¹⁴ Bab-Jehováʼye, ar bedi bato neg-gunaid daksad, sabsur-ibitonanaid bato be daksad, nunmakedba-galitonanaid be daksad. Ar bedi, sogedba be we-ibmar nudakoed. Dule-ibmar-suli-gudimaladi, begi bensur gudimalad. Ar be, dule-sergan-sated-bendakedid.

¹⁵ ¡Bab-Dummadye, dule-isgana-ibe be e-gangued-osuloge! ¡Dule-isgana e-isgued-imakedba be sabsur odurdake! ¡We-dulemar we-napneggi-obelogedse be imake!

¹⁶ Bab-Jehováʼye, be degisadegu Reyga maid. Dulemar-aku-be-dakmaladdina, be-yargi bela obelolemaloed.

¹⁷ Bab-Jehováʼye, dule-wilegana-bese-goled be itodaed. Dule-wilegana-e-niga be ogannodaed. Bese ibmar-egisder ega be ukdaed.

¹⁸ Bab-Jehová dule-sergan-satedga, degi, dule-wiledimaladga, igar-innikigwad imakdaed, adi, dule-we-napnegginmaladi, melle bar emar-wiodii gumalagar.