Rut 1 - Kuna San Blas

1. ELIMELEC E-GWENADMALA MOAB-YARGI MAIGUSMALAD (1:1-5) Noemí gudii-gusad-igar

¹ Deunni, igar-nabomalad-dummagan Israel-yar-semamaid-ibagangi, ukud-dummad Judá-yargi nagunonikid. Agala, dule-gwensak Judá-yargined Belén-neggweburgined, na e-ome, degi, e-masmala-warbogwadmala Moab-yarse nadegusmalad.

² A-dule, Elimelec nugad. E-omedi, Noemí. E-machi-wargwen Mahlón-nugad, baiddi Quelión-nugmogad. A-dulemar, Efrata-dulemalad, Belén-neggweburginmaladid. A-neggwebur Judá-yargi-siid. Wemar, Moab-yarse modapmargua, agi megidapmalad.

³ Agi, Noemí-e-sui-Elimelec burgwenonikid. Geb Noemí e-sui-sorba na e-masmala-warbogwadmala wargwen besmalad.

⁴ We-masmala-ebogwad Moabʼgined ome-nikunonimalad. Gwensak, Orfaʼye-nugad, baiddi Rut-nugmogad. Geb Mahlón, degi, Quelión birgambe (10) ome-nika-gudii gusmalad. Agi, burgwenonimarmogad.

⁵ Degisoggu, Noemí na e-bendaked-sate gunonisunnad, ei-sui burgwis, degi, ei-masmala burgwisbar.

2. NOEMÍ, E-BALA-RUTʼBOGWA, GANNAR BELÉN-NEGGWEBURSE NONIKID (1:6-22)

⁶ Degine, Noemí wisgunonikid, Bab-Jehová e-dulemargi nued binsanoniye, ukud-dummad-naid bergusye, Bab-Jehová mas-bukib ukdeeye. Geb degidbali, Noemí e-balamarmala, Moab-yargi-mai armarsunnad.

⁷ Degisoggu, Noemí, degi, e-balamarmala Moab-yargi-e-neggi noargusmalad. Na e-warbaa Judá-yarse nagab nadegusmalad.

⁸ Geb degine, Noemí igarba-nadapgua, e-balamarga sogded: —¡Na bemar gannar be-nangan-negse namalo! Ar igi bemar dule-burgwismalad na be wiledaksamala, degine, igi be wile an-daksamarmoga, bitigi deyob Bab-Dummad wile-bemar-dakmogana gadin.

⁹ Bitigi Bab-Jehová gannar-sui-nikuega bemar-imaksana gadin, adi, bemar neguya-nuedgi wergudii-gumalagar. Geb degine, Noemí, na-e-balamar-wagar usad, adi, sogegar, degimaloye. Geb agi, e-balamar bela-bela bodmalad.

¹⁰ Degine, geb Noemíʼga sogdemalad: —Anmar beba be-dulemarse namarmogoed.

¹¹ Noemí gannar amarga sogded: —Na be-negse be namala. ¿Ar ibiga be anba namalosunna? ¿Ar ande gannar mimmigan-nikubalosi, be-suimarga gumalagar? Ar geg deyob gued.

¹² Bunamala, gannar be namala. An seredgus, an sui-bar-nikuosulid. Ar amba an bemarga sogdibe: ‘An emi-mutikidba sui-nikuoye, an mimmigan-nikubaloye,’

¹³ ¿ar bemarde, we-masmala-dunguedse abitomalosi? ¿Ar amar-ular, bemarde suisuli gudii gumalosi? Suli, geg bemar deyob gudii gumalad. Ar an bur bule bemarba nunmaked itonaid, ar Bab-Jehová bela-bela angi yolenaid.

¹⁴ Degine, e-balagan gannar bela-bela bodmarbalid. Geb Orfa e-saka-wagar napi-usad, adi, ega sogegar, degimaloye. Rutʼdi e-sakagi-bangubisulidba besad.

¹⁵ Agi, Noemí Rutʼga sogded: —Be-aisu-omega-gusadba be namoga, ar edi e-dulemarse naded, e-bab-dummaganmarse naded. Eba be namoga.

¹⁶ Rut ega sogded: —¡Mer be anga soge, an be-mete naye, be angi banguye! Ar bia be nadesogele, an beba naoed, ar bia be megidapoe, agi an megidapmogoed. Ar be-dulemar, an-dulemarga gumogoed. Ar be-Bab-Dummad, an-Bab-Dummadga gumogoed.

¹⁷ Ar bia be burgoe, agi an burgwemogoed, agi an diglemogoed. Ar unnila burgwedsega anmar na bangudmaloed. Ar degisulile, bitigi Bab-Jehová sabsur an-odurdaksunnana gadin.

¹⁸ Noemí deyob dakdegua, Rut eba nue-naye soge, agi, bar ega akar-sogsasulid.

¹⁹ Degine, geb Noemí, Rutʼbogwa nadmarsunnad, geb deyob Belén-neggweburse nonimalad. Belén-neggweburse nonimargua, bela dulemar-aginmalad geger dakdemalad, geb sogdemalad: —¿Wede, Noemíʼsursi?

²⁰ Geb Noemí amar-abin sogded: —Mer bar Noemíʼye be an-bimalo, ar Bab-Dummad-Bela-Gangued-Nikad nunmaked-dummad anga uksasoggu, a-ular, be an-bimarsunno, Maraʼye.

²¹ An bela-ibmar-nika nadegusanad. Emisgindi, aka Bab-Jehová, ibmar-sate gannar an-obirisad. Ar Bab-Jehová-sogedba-gusad, degisoggu, ¿ibiga Noemíʼye anse bar gormalosunna? Ar emisgindi, Bab-Jehová sabsur an-odurdaksad. Ar Bab-Dummad-Bela-Gangued-Nikad boni-dummad angi barminonikid.

²² Deyob Noemí, e-bala-Rutʼmala Moab-akale, Belén-neggweburse nonimalad. Deunni, orosgisaar-dakleged-cebada gebe-weleded, a-ibagangi nonimalad.