Proverbios 8 - Kuna San Blas

Binsaed-Nikagued dulemarse gornaid

¹ Binsaed-Nikagued, ¿anmarse iseedi gornaisursi? Ibmar-wisigued, ¿iseedi gornaisursi?

² Binsaed-Nikagued, igarba yar-birigwagi gorgwisdaed, igarmar-abingunanaidgi gorgwisdaed.

³ Neggwebur-doged-e-yawagakmar-dikarba ise-gollar gornaidaed. E-yawagak-dogedgine binnasuli weyob-gornaid:

⁴ “Machergan, bemarse an gornaid, bela-dulemar-bukwadse an gornaid.

⁵ Bemar-ibmar-wissurmalad, itoakwaa be gudisamala. Bemar-binsaedsate-gudimalad, ibmar-magar-itoged be amimala.

⁶ Nue an-itomalo, an ibmar-nuegan sogesokalid. An-gwabinduku igar-innikigwadba sunmaksokalid.

⁷ An ibmar-sogedi gakangi sunmakosulid, ar gakanmar an nabir-daksulid.

⁸ An-gayaburbamar, igar-innikigwadbi sunmaked, darbo sunmaksulid, ibmar-isganagi sunmaksulid.

⁹ An-gayaburbamar, dule-magar-neg-itogedgala baisursunna-noed. Dule-binsaed-ibeganga, an-gayaburbamar innikigwadbi ega noed.

¹⁰ Mani-abelegedba an-ibmar-odurdakedbina bur bule be sogmala. Olo-nued-abelegedba ibmar-wisgulegedbina bur bule be sogmala.

¹¹ Ar Binsaed-Nikagued, dimmurgiid-e-akwa-yeerdaklegedba bur bule ibnuedid. Ibmar-bur-nued egi obinsulid, ar ibmar-baid-ebo geg wilub-imakleged.”

Binsaed-Nikagued-e-damalad

¹² “Ani an Binsaed-Nikaguedi, itoakwaa-binsaedbogwa an gudiid. Ibmar-wisigued an nikad, itoakwaadaed an nikabalid.

¹³ Dule, Bab-Jehová-dobekwaa nanadiile, isdar ibmar-isgana daked. Ar san-dummarba-imaked, an isdarsun daked, san-bule-bule-saed, an isdar dakbalid. Sunnasur-daed, galagwensur-sunmaked, an isdarsun dakbalid.

¹⁴ Binsaed-uklegeddi, angi maid, nuekwa-igar-nabolegeddi, angi maibalid. Neg-magar-itolegeddi, angi maid, gargangueddi, angi maibalid.

¹⁵ Ani an Binsaed-Nikaguedi, an-sogedba reymar wis negsedimalad. An-sogedba dule-nug-nikamalad, wis igar-innikii nabodimalad.

¹⁶ An-sogedba dule-nug-nikamalad negsedimalad, an-sogedba dule-negsedimalad napneg-sedimalad.

¹⁷ Dule-an-sabmaladi, an sabmogad. Dule-an-amidimaladi, baisursunna an-amimalad.

¹⁸ Ibmar-bukidar-nikuleged angi danikid, nuga-nued-nikuleged angi danibalid. Nue-nasguleged-degisadeguad angi danikid, igar-inniki-imakleged angi danibalid.

¹⁹ An-binsaed-ukedi, olo-nuedba bur-nuedid. Angi-binsaed-nued-amilegedi, mani-nuedba bur-nuedid.

²⁰ Ani an Binsaed-Nikaguedi, igar-inniki-imaklegedba an nanaed, igar-inniki-naboleged-igarba an gudiid.

²¹ Dule-an-sabesar-gudimalad an onasgudiid, ibmar-nued-bukidar-nikubaliga an imakdiid.”

Binsaed-Nikagued-e-danikid

²² “Bab-Jehová ibmar-obinyed-iduale, bato anga burba-dulad uksad. Amba-yoo ibmar-obinyegua, bato an-obinnisad.

²³ Yoo neg-nagued-iduale, Bab-Jehová an-obinnisad. Napneg amba yoo nagugua, sailanagi an-obinnisad.

²⁴ An gwalulesgua, demar-wilagan amba yoo nagued. An gwalulesgua, suke-dummagan amba yoo megmalad.

²⁵ Yala-dummagan-nagued-idu, an gwalulesad, yala-senigana-ambikued-idu, an gwalulesad.

²⁶ Bab-Dummad amba yoo napneg-nasikgua, amba yoo sapurmar-bukwad-nasikgua, amba yoo napa-buru-napneg-sobsad-obinyegua, bato an gwalulesad.

²⁷ Bab-Dummad mogir-arad-nasiknaigua, a-idu, bato an gudiid. Mogir-demarbo-abingunaid-nasiknaigua, a-idu, bato an gudiid.

²⁸ Bab-Dummad mogirmar-nasiknaigua, a-idu, bato an gudiid. Demar-wiladgine suke-dummagan-ogannonaigua, a-idu, bato an gudiid.

²⁹ Bab-Dummad demar-mer-murega, demargala igar-abingunanaid-ilemaknaigua, a-idu, bato an gudiid. Napneg-e-sailagan-mesnaigua, a-idu, bato an gudiid.

³⁰ Bab-Dummadbogwa bela igar-ilemaknai an gusad. Iba-ilibali weligwar an-itodidaed. Bab-Dummad-asabinni iba-ilibali an wergudidaed.

³¹ Bab-Dummad-napneg-obinnisadgi an wergudiid, dulemar-gudimaladba an wergudiid.”

Burba-dula-gudigued amie, melle burgwedgi binsae

³² Ani an Binsaed-Nikaguedi sogbalid: “Degisoggu, mimmigan, nue an-itomalo: Dule an-igar-maidba-nanadiile, egi ise-nued binsalesad.

³³ An-binsaed-uked be-nue-itomala, binsaed-nikaa be damala, mer baisur-dakmala.

³⁴ Dulemar-nabir-an-itodimalad, bane-bane an-yawagak-naba an-edarbedimalad, we-dulemargi ise-nued binsalesad.

³⁵ Ar dule an-aminonidibe, burba-dula-maid aminonikoed. Bab-Jehová we-dulegi nabir binsanonikoed.

³⁶ Dule an-obandibe, na dukin bonigan-amioed. Dule isdar an-dakdibe, na burgwed-amied.”