Proverbios 7 - Kuna San Blas

Binsaed-nikaguedi, ome-negsichigi-nanaedgi be-ollorsaoed

¹ Machi, bega-an-ibmar-sogedba be dae, igargan-an-bega-ukedba be nanae.

² Igargan-an-bega-ukedba be nanaele, be dula gudiguoed. Be-ibyagwag be akweyobi, an-bega-ibmar-sogedba be ibsae.

³ An-be-unaedi, olargan-googi-yoiyobi, be sedii sae, be-gwagegi nue-ebinsadii be imake.

⁴ Binsaed-nikaguedga be soge: “Be an-bunye.” Ibmar-wisiguedga be soge: “Be an-ai-nuedye.”

⁵ Adi, wemar, ome-sui-dikarba-yolediidgi, be-ollor-imakoed, ome-e-agumakedba-emar-binsaed-gaedgi, be-ollor-imakoed.

Ome-emar-binsaed-gaed, degi, sapingwa-binsaedsulidaed

⁶ An-neggi, yawagak-bipigwad-imbaba an atakded.

⁷ An dakalid, sapingana-binsaedsurmalad-abargi, machi-wargwen bur-binsaed-sated gudii.

⁸ We-sapingwade, igar-abingunaidse warmakdapid, agi ome-e-sui-dikarba-yolediid-negse naded.

⁹ Deunni, neg-sedomaid, neg nue-gutuleded, degi, neg nue-mutikguded.

¹⁰ Geb agine, ome e-abin-noalid. Ome gambanuchu-imakedyob mor-yoid. E-daedi, mag-dakleged, macherganbina sognadapid.

¹¹ We-ome neg-gagadidaed, gwinni-gwinni daed, geg neggi siged, galimbabi wisid.

¹² Galimbaba gudidaed, dulemar-bukidar-ambikuedgi gudidabalid. Igi-saele machered-wargwen-yardakodibeye binsadidaed.

¹³ We-ome, sapingwa-daksagua, gadebinne imaksad, ei wagar usa imaksad. Ega bingesuli sogded:

¹⁴ “Gwenatigwar-guega Bab-Dummadga an ibmar-ukoye an sogsad. Deyob an sogsadi, emi deyob an imaksad.

¹⁵ A-ulale, an be-abin noalid. An be-amidii gusad, emide an be-abingunonisunnad.

¹⁶ An-gabedgi atue-nued-yeerdakleged, lino-dubgi-sobaled-Egiptoʼgi-danikid an ogichad.

¹⁷ An-gabedgi ina-wawadikmalad, mirraʼye-nugad, áloeʼye-nugad, degine, canelaʼye-nugad an eosad.

¹⁸ Anba be dage. Anmar nog-gobmai oibodagoed. Oibogedse anmar nog-gobmai imakmaloed.

¹⁹ Ar an-sui neggi gudisulid, dikasuli neggwebur-baidse naded.

²⁰ Mani-ichesuli sesa-naded, geb nii-dalu-naidse gannar negse aibiroed.”

Sapingwa ome-ega-agumakedgi binsaed-galesad

²¹ Weyobi, ome, agumaksadgi, machigwa-binsaed-gasad.

²² Moli-alugwasualedi, e-oburgwilegedse ebipilemaiyobi, machigwa ome-sorba-nai nadapid. Goe-sapur galesgunaidgi sigu egi yolenonikiyobi, machigwa gued.

²³ Igi nuu burgwed-wissuli saki-naidse naddae, machigwa deyobi gued.

Ome-emar-binsaed-gaedgi banguo, degisulile, be burgoed

²⁴ Machi, emigi nue be an-itoge, an-be-unaed nue-itosii be imake.

²⁵ Melle a-omegi-binsadii be sae, melle a-omese be binsaed galege.

²⁶ Ar a-omese bukidar machergan yardaklediid. Machergan-bukidargus ese burgwedanikid.

²⁷ We-ome-negse be nadele, be burgoed. A-igar burgwedse dule-semaid.