Proverbios 6 - Kuna San Blas

Emar-anar-mani-bennukedgi mer be binsao

¹ Machi, dule-mani-gasad-anar, be bennukoye sogsale, igidibe, dule-baidga, be bennukoye igar mesisale,

² na be imakoye sogsadgi, na be dukin yardaklesdo.

³ Degisoggu, machi, emidi be-aise be yardaklesad. Ar agi be ollorgubiele, weyob be imaksunna: Ese be nae, egi be wilenae, ega be sognae, an-bega-bennukoye-sogsadi, be anga osuloye.

⁴ Melle be ogabe, melle be banega saboge.

⁵ Igi goe-sapur, dule-e-makbied-idu wakinne, deyobi, dule-be-yardakbiedgi be wakinmoga. Igi nuu dule e-gabied-idu wakinne, deyobi, dule-be-yardakbiedgi be wakinmoga.

Melle dule-wiegalaga guo

⁶ Dule-wiegala, nue be igli dake, e-ibmar-imaked nue be dake, binsaed-nikaguega eba be durdake.

⁷ Igli, ega-igar-uked sated, e-dummad sated, e-idued satebalid.

⁸ Degi-inigwele, dii-wisulidgine na e-mas onmaked, ibmar-durba-weleged-ibagine na e-mas onmakdaed.

⁹ Dule-wiegala, be meremaidi, ¿sanadse gwisguoye be soge? ¿Sanadse gabmaid be atakoe?

¹⁰ Be gabsiile, nono-yakumaksiile, sikwas napi-gabele, sakwa-bipirmakar wis obunnosiile,

¹¹ ukiarmakale, dule-atursaeyobi, begi wileged nonikoed. Ukiarmakale, dule-negsuligudiidyobi, begi ibmarsuligued yolenonikoed.

Dule-isganamar-e-odurdaklegoed

¹² Dule-isgana, dule-galagwensuli-nanaed, dule-gakansaedginbi-gudiid,

¹³ dule-yardakega, ibya-biri-emar-daked, dule-yardakega googi sunmaked, naggi sunmaked.

¹⁴ We-dulemar unnila ibmar-isgana-imakedginbi binsadidaed, aimar-ourwed yeer-itodaed.

¹⁵ A-ulale, ukiagwar egi bonigan yolenonikoed, ukiagwar berguoed.

Bab-Dummad ibmar-sogagugle (7) isdar-daked

¹⁶ Bab-Jehová ibmar soganergwa (6) sae-daked, napi-ibmar-sogagwenad-baid bur-bela-bela isdar daked. We-ibmarmar-sogagugled (7) isdar daked:

¹⁷ Dule-na-san-dummarba-imaked, dule-gadi-gakansaed, dule-binsarsunna-aimar-gindaked,

¹⁸ dule-galagwensuli-dule-baidgi-binsaed, dule-ibmar-isganabi-imakdidaed,

¹⁹ dule-ibmar-daksad-gakansaar-ibmar-soged, gwenadgan-gwenadgan-ourwed-dule. We-ibmarmar, Bab-Jehová isdar daked.

Be-sergan-bega-sunmakedba be ibsae

²⁰ Machi, be-bab-be-odurdakedba be ibsae. Be-nan-be-unaedba, be dae.

²¹ Be-gwagegi-sedigu, be imake, ordub-be-dukargi-naiyob, be imake.

²² We-binsaed-nuegan, be bia nadele, be-idumai guoed. Be gabidele, be-edarboed. We-binsaed-nuegan, be atakar-sogele, bega sunmaknai guoed.

²³ Igarmar-Mamaidi, gwalluyobi gued, ibmar-odurdakleged neg-meegwadyobi gued. Igar-nuegan-mamaidba-nanalegedi, be-odurdakoed igi be nanaergebe.

Abirgunagwarsuli-nanalegedgi bangued

²⁴ We-binsaed-nuegan, melle be ome-isganabo galagwensuli nanadiguega be-imakoed. Melle be ome-sui-dikarba-galagwensuli-gudiidbo nanaega be-imakoed. Melle we-ome-e-ibmar-nued-sogedgi be binsaed-galediguega be-imakoed.

²⁵ Melle ome-isgana-e-yeerdaklegedbina be sogo. Ome-isgana be-dakedgi, melle ese be-binsaed galego.

²⁶ Ar ome-gambanuchu-imaked unnila masbina gudiid. Ome-sui-dikarba-yolegeddi, bela be-sanbina sogdiid.

²⁷ Ar dule na e-nukugi soo-sisale, ¿ei mor gummaksasulir be insae?

²⁸ Ar dule soo-birgi nanaele, ¿ei nag gummaksasulir be insae? Ei gummaksale.

²⁹ Dule, dule-baid-ome-ebo negsichigi nanaedi, soogi-gummakeyob boni-amiedsemogad.

³⁰ Dule-atursaed ukudmaada-itogedba ibmar-atursasale, ¿isdar dakdamarsursi?

³¹ Dule-atursaed daklesardi, ilagugle (7) ibmar-atursasad bennukoed. Sulirdi, bela e-neggi-ibmar-nikad ukoed.

³² Dule ome-baidbo negsichidgi nanaele, we-dule, binsaed-satedid. Dule deyob-daedi, na dukin san-wioged.

³³ Unnila binged-amiedid, na dukin naibid-amiedid. E-nug-gagalesad gwen ega alliosulid.

³⁴ Ar we-ome-e-sui nobedba uludele, na san gwen bargaosulid, igi-barsaye gwen sogosulid.

³⁵ Dule amba ome-e-suiga ibmar-ukye sogele, gwen abingaosulid. Ar amba ega ibmar-dummarba-ukye sogele, igi-barsaye gwen sogosulid.