Proverbios 5 - Kuna San Blas

Abirgunagwarsuli-nanaedgi bangued

¹ Machi, an-binsaed-nikagued an bega-ukedi, nue be itoge, an ibmar-nue-wisidi an bega-sogedi, nue-ise-itogar be imake.

² Adi, be sunmakalile, nue-itoakwaa sunmakegar, nue-ibmar-wisi be guegar.

³ Ome-sui-dikarba-yoleged-e-agumakedi, ibmar-nuediyob sunmaked. E-gwabin-ibmar-biedi, ibmar-nueganbi sogdaed.

⁴ Dule ese-binsaed-galesale, ina-gagbisailadyobi ega gued, es-suid-nugar-darbogwadba bur bule dule-naibi-saeyob gued.

⁵ Dule a-ome-ebogwa negsichidgi nanaele, burgwedse nilemaid. Neg-uanse selemaid.

⁶ A-ome dule-egi-sunmakmalad bai-itosulid. E-sunnasur-daedi, na bargasulid, e-ichakwa-nanadiidi na aku itoged.

⁷ Machi, emigi nue be an-itoge. An-ibmarmar-bega-sogedba be nanae.

⁸ Ome-e-sui-yardakdiidgi, be bangue. Melle e-neg-yawagakse be warmako,

⁹ adi, melle dule-baid-aku-be-dakedga be-arbasadgi-ibmar-nikusad be ukegar, melle be-burba-gandikid dule-baidga be ukegar.

¹⁰ Degiile, dule-baid be-ganguedgi yeer-itogoed. Degiile, be-arbasad-mani dule-baid-negse dogoed.

¹¹ Geb agine, bela binna-binna be-san bergumaidba, be bodii gudoed.

¹² Agi be sogdoed: “Ar wede, ibiga dule-anga-binsaed-uksamalad an itossuli. Ar wede, ibiga dule-sabsur-an-odurdaknaigua, an itossuli.

¹³ Dule-anga-binsaed-daknanai-gusmalad an itossulid. Dule-an-odurdaknanai-gusmaladba an ibsassulid.

¹⁴ Emide, dulemar-abargi, an oitolegednaga gudiid, wis ugak an gudiid.”

Ome-dikarba-yolesulid

¹⁵ Be nog-gobbigualile, be-ome-ebo be nog gobo.

¹⁶ Unnila be-omesebi be golo, melle be-omesulidse be golo.

¹⁷ Be-ome unnila begadbiid, melle dule-baidga be-ome be urmakdii nanao.

¹⁸ Ome-bega-uklesadgi nued-binsalesun. Nuchukwagwadgi bega abirgin-uklesad-ebo be wergudii gusun.

¹⁹ Ome goe-sapuryob, yeer dakleged. Ome wasa-omeyob, yeer dakleged. Bele-bele be-imakar-sogele, egi be wergudii sao. E-sabguedgi be wergudii guo.

²⁰ Machi, melle ome-baidse-binsaed-galedii be guo, melle ome-baid be-werguega, be imako.

Dule-isganamar-e-odurdaklegoed

²¹ Bab-Jehová bela dulemar-e-daed nue-wisid. Dulemar-nanaedi egi gwen yoggumaisulid.

²² Ibmar-isgana, dule-isganagi aibinoed, e-isguedgi ollorguosulid.

²³ Dule-isgana, igar-maidba-nanabisulidbali burgwidoed. Na e-binsaed-satedbali, burgwidsunnoed.