Proverbios 4 - Kuna San Blas

Be-bab-be-unaed be itoge

¹ Machimala, bab-be-unaed nue be itomala, ibmar-nue-wisiguega nue-ise-itogale be imakmala.

² Igar-nuegangi an be-odurdakgwelo, melle an-ibmar-odurdaked be itosuli guo.

³ An bipigwaunni, an-babba-an-gudigusgua, an-nana anbina bela-belad-sogdigusgua,

⁴ an-bab an-odurdaksad, weyob anga sogsad: “An-bega-ibmar-soged, ulubgi be nue-sedii imako. An-bega-ibmar-soged be imako. Deyob be imakele, we-napneggi suitii be gudiguoed.

⁵ Binsaed-nikagued be amie, ibmar-nue-wisigued be amie. Melle be an-gayaburba iego, melle egi be banguo.

⁶ Binsaed-nikaguedgi melle be bangue, ar a, be-bendakdii guoed. Binsaed-nikaguedbina bur be soge, ar a, be-edarbedii guoed.

⁷ Ibmar-baigan-idu, nue-binsaed-nikagued bur be amie. Bela ibmar baiganba, ibmar-nue-wisigued bur be amie.

⁸ Binsaed-nikaguedbina bur be soge, ar a, be-nug-odummogoed. Binsaed-nikagued bur be sabgue, ar a, be-nug-ogannogoed.

⁹ Binsaed-nikaguedi bega akwa-nuegan-ologurgingi-sigeyob gued. Ologurgin-nonogi sigeyobi bega gued.”

Binsaed-nikaguedi burba-dulad-uked, nued-gudii be-imakbalid

¹⁰ Machi, we-napneggi suibaksaar be gudiguega, an bega-ibmar-soged, nue be itoge.

¹¹ Binsaed-nikagued-igarba an be-semaid, igar-innikigwadba-nanaega an be-imaked.

¹² Be binnaa nadapsogele, bega ibmar-nueganbi guoed. Amba be gwae-gwae nadapsogele, bega ibmar-nueganbi gubaloed.

¹³ An be-odurdaked mer be iego, melle be indako, nue be sedio, we burba-dulagudiguega be-imaked.

¹⁴ Dule-isganamarba melle be akae. Amar-igarba melle be nanae.

¹⁵ A-dulemargi be bangue. Melle a-dulemar-walikaa be gudigue.

¹⁶ Dule-isganamar ibmar-isgana-imaksurmalale, geg gabdamalad, dule-oakalosurmalale, geg gabdamalad.

¹⁷ Ibmar-isgana-imaked mas-gunnedba bur-yeer itodamalad. Sabsur-emar-imaked, vino-gobedba bur-yeer itodamalad.

¹⁸ Igi bolegoe neg-ainakwiardae, deyobi, dule-nuegan-e-nanaedi gued. Dule-nuegan-e-daedi, neg ibegwaledse-nasgumai-nasgumai-daeyobi gued.

¹⁹ Dulemar-isgana-e-nanaeddi negsichid-naidyobi gued, wissurmalad, ibigi na yoledimala.

An-be-unaed nue be itogo, ina-nuedga bega guoed

²⁰ Machi, an bega binsaed-uked, nue be itoge, ibmar-bega-an-soged, nuekwaa be itoge.

²¹ An be-odurdakedgi melle be bangue, gwage-ulubgi nue-sedii be imake.

²² Ar dule binsaed-nikagunonikile, ega burba-duladga gued, we-dulega ina-nuedga gubalid.

²³ Bela ibmar-sunsogmalad-baiganba, be-binsaedi nue-itoakwaa be ebugo. Ar we-binsalegedgine, gudiguleged danikid.

²⁴ Gaya-isgana-sunmaked be indake, melle bar be gakansadii nanae.

²⁵ Ibmar-nueganginbi be atake, yoo ibmar-danimaloedgi-atakdii be sae.

²⁶ Be-nanadiid nue be dake. Bela be-ibmar-imakedi innikigwadbi be imake.

²⁷ Melle igar-nuedgi be aibane. ¡Igar-isganagi be bangue!