Proverbios 3 - Kuna San Blas

Uaya-nikaa-daedgi unaed

¹ Machi, melle an-igar-odurdaked be iego, be-gwage-ulubgi an-igar-maid be sedigu guo.

² Ar deyob be imakele, we-napneggi suitii mai be guoed, weligwar-itodii be guoed.

³ Sabgued-igar melle be iego, napiragwad-igar melle be iebalo. Igi wingwa be-dukargi-naigu be gudidae, deyobi be imako, be-gwage-ulubgi sedigu be imako.

⁴ Deyob be imakele, Bab-Dummad nabir be-dakoed, dulemar nabir be-dakmogoed.

⁵ Melle be-ibmar-wisidba be nanadii guo. Bab-Jehováʼgi bela-belad-ulubgi-bensuli be nanadii imako.

⁶ Bela be ibmar-imakedgi Bab-Jehováʼse idakdii be imako. Deyob be imakele, Bab-Jehová bega igar nueganbi imakoed.

⁷ Mer be binsao, “An ibmar nue-wisye.” Bur be Bab-Jehová dobee nanae, bur be ibmar-isgana-imakedgi bangue.

⁸ Deyob be nanaele, we-igala, bela bega ina-nuedga guoed, bela bega be-abagan ogannogoed.

⁹ Be-ibmar-nikad-Bab-Jehováʼga-ukedgi Bab-Jehová-nug be odummoge. Gebe be-ibmar-sanmaked-Bab-Jehováʼga-ukedgi Bab-Jehová-nug be odummoge.

¹⁰ Deyob be imakele, be-ibmar-gwag-saboged-uu ena sii guoed, be-vino-binigan e-galugi ena sii guoed.

¹¹ Machi, Bab-Jehová sabsur-be-odurdakalile, melle isdar be itogo, melle be urwebalo.

¹² Igi baba na e-mimmi-sabedba sabsur-odurdakdae, deyobi, Bab-Jehová dulemar-sabedi sabsur-odurdakdamogad.

Binsaed-nikagued-odummoleged

¹³ Dule binsaed-nikagued nikunonikile, we-dulegi nued binsalegoed. Dule ibmar-nue-wisi gunonikir, we-dulegi nued binsalegoed.

¹⁴ Binsaed-nikagued maniba bur bule ibnuedid, orba bur bule egi ibmar-nuegan amileged.

¹⁵ Binsaed-nikagued, akwa-nuegan-manisailadba bur ibnuedid. Ibmar-nue-wisigued, ibmar-nueganbina-sogleged-ebo yobsulid.

¹⁶ Ar binsaed-nikagued we-napneggi suitii mai be-imakoed. Deginbali, mani-ibedga be-imakbaloed, nug-nued-nikaguedga be-imakbaloed.

¹⁷ A-igarmarba-nanalegedi, yeer-ito dule-saedid, bela e-igarmar bogidik-gudii dule-imakedid.

¹⁸ Dule binsaed-nikagued-amisale, egi burba-dula-gudigued nikued. Dule binsaed-nuedgi-akas-gudiile, Bab-Dummad, we-dulegi nued binsaed.

Binsaed-nikagued, degi, napneg-nagusad

¹⁹ Bab-Jehová binsaed-nikaguedgi, napneg nasiksad. Nue-ibmar-wisiguedgi, nibneg nasiksabalid.

²⁰ Na ibmar nue-wisidba, diimar bachik-bachik nasiksad, nibneg-akale, dii-wiega imaksad.

Binsaed-nikaguedgi-ibmar-imakedi weligwar dule-imaked

²¹ Machi, nue-binsakwaa be ibmar imako. Itoakwaa-ibmar-imaked melle be iego.

²² Deyob be imakele, burba-dula-gudii be-imakoed. Bega ordubyobi ibnuedga guoed.

²³ Geb agine, bonisuli be nanadii gudoed, be yoledii guosulid.

²⁴ Be megid-sogele, be dobguosulid. Be gabidogu, bogidikidgi be gabidoed.

²⁵ Ukiagwar-bonigan-noardaedi, be dobguosulid, dule-Bab-wissurmaladgi ukiagwar boni-dummagan-noardaedi, be dobguosurbalid.

²⁶ Ar Bab-Jehová beba gudiguoed, dulemar-isganase yardaklegega be-imakosulid.

Igi be dulemargi daergebe

²⁷ Dule-baidga-ibmar-nued-imaked begi siile, ega be imako, melle ega imaksuli be guo.

²⁸ Melle ega be sogo: “Be nagwerye, banedse an be-bendakoye.” Ar emi sunna be a-dule-bendakele, bendaksabin be imako.

²⁹ Melle be-ai-begi-bensuli-gudiidgi be aibino.

³⁰ Melle dule-gwen-be-oakalossulidbo be urwo, ar dule gwen-be-oakalossulid.

³¹ Melle dule-sabsurdamalad-e-ibmar-imakdiidgi be nobguo, melle e-daedba be nanabalo.

Bab-Dummad dule-isgana-isdar-daked, dule-nueddi bendaked

³² Ar Bab-Jehová dule-isganamar nue isdar-dakdaed. Ar dule-nuegan-ebodi walikaa gudidaed.

³³ Bab-Jehová, dule-nued-daed-e-neguyagi nued binsadaed, dule-isgana-e-neguyadi, ukabsadaed.

³⁴ Bab-Jehová, dule-emargi-dododimaladgi dododamogad, ar dule-san-bipi-imakmaladdi, bendakdaed.

³⁵ Dule-binsaed-ibegan-nug odummolegergebed. Ar dule-binsaedsulidamaladdi, egi dodoleddaed.