Proverbios 27 - Kuna San Blas

¹ Melle be san-dummarba-imakedgi binsao, ar be wissulid, ibagan begi igi-daniki.

² Melle be dukin san-dummarba-imako, dule-baigan be-nug-odummogedi, bur nabirid.

³ Akwa ukusulid, ukubbela ukusurbalid, dule-binsaedsulid-e-urweddi, aba bur bule yeer-gangued.

⁴ Urwedi, yeer-gangued. Sae-itogedgi-urwedi, dule-wioged. Nobeddi, geg bargaleged.

⁵ Arbakee-sabgulegedba, bur nuedid, bakar-bega-ibmar-soged.

⁶ Be-isdarad-yamo-be-wagar-uedba, bur nuedid, be-ai-nued sabsur-bega-ibmar-soged.

⁷ Dule, nue-immeles-gudiile, bar ibmar abedasulid. Achanisse-bakar, budar madaed. Dule, ukudmaada-gudiirdi, ibmar-gagbiregedse-bakar gunned, ochigwayobi itodaed.

⁸ Dule, dikasuli aineba gaamakdiidi, dikasuli nuu e-uugi gaamakdiyobid, neguyagi sate daed.

⁹ Gwallu-wawadikmaladi, ina-wawadikmaladi, e-yapanned weligwar dule-saed, debayobi, ai-nued-binsaed-ukedi, dulega niga-ogannoged.

¹⁰ Melle be-ai-obanedgi be binsao. Melle be-bab-e-ai-obanedgi be binsabalo. Melle be-boni-itodiidi, be-gwenad-negse be sedo. Bur be-gwenad-bebo-urwediidba, bur nabirid, dule-be-neg-dikarba-maidse be naed.

¹¹ Machi, dule-binsaed-nikaa be dae, weligwar be an-imake. Adi, an deebali, mesagwar-an-imakdimalad-gayamakoed.

¹² Dule-itoakwaa-binsaedi, boni-noed bato daksabindaed. Degisoggu, mer boni-noega imakdaed. Dule-binsaed-sateddi, boni-noalir akudakdaed. Degisoggu, egi nue wileddasunnad.

¹³ Dule, dule-baid-ular mani-gasad-bennukoye-sogsale, mani-bennuksulile, e-ibe be mor weenao, dule-baid-mani-gasad-ular, be e-mor sioed.

¹⁴ Dule bolegoedba binnasuli e-aise nuedgi-goler, e-ai-gabmaidga ukabsalegedyob gued.

¹⁵ Ome-ursili, dii-wied-ibagi, dii-gargarmaknaiyobi gued. Urwedbi wisdaed.

¹⁶ Dule, e-igar-gaye-sogele, geg gaed, burwayobid, burwadi geg galeged. Argangi ibmar-gwallu-geg-abingalegeyobid.

¹⁷ Esgoro, esgoro-baidgi oswiswimakleged. Dule na ebo-idakmalale, igar-nuedse onomalad.

¹⁸ Dule, sapi-nue-akwele, e-san gunnoed, dule, e-dummadga nue-nakulediile, e-nug odummolegoed.

¹⁹ Igi diigi, magar wagar dakledae, deyobi, dule e-binsaedbali, na magar-daklesimogad.

²⁰ Igi-neg-uan ollorgusisuli, degi, burgwed-igar galemaisuli, debayobi, dule ibmarbin-gadisogedi, napi-ibmar abedaed.

²¹ Bormo-crisolʼgi mani wilubdakleged, soogi or wilubdaklemogad, duledi, e-nug-odummolegedgi mag-daklemogad, igid-dule gue.

²² Dule-binsaedsulid be nagele, amba uki be nagbalile, degi, ibmar-gwagyob be osarwele, amba e-binsaed-sateddi, e-ibe be osulogosurguoed.

²³ Be-sibad-wawaadmar nue be dakdii sao, be-molimar gatik nue be akwedii sao.

²⁴ Ar ibmar-nuegana, degisadeguadsulid. Manimala, degisadeguadsurbalid.

²⁵ Sapur emilesale, gagan-aradik ainidagoed. Sapurgi gagan-dutugana weledagoed.

²⁶ Sibad-wawaadmar bega mor-yoed ukoed. Sibaddi, bega nainu-bakega guoed.

²⁷ Sibad-e-nunis bukidar be nikuoed, adi, bedi, be-ome, be-mimmigana egi nabir itomaloed, degine, bela-bega-arbamaladi, yeer-itomarmogoed.