Proverbios 24 - Kuna San Blas

19

¹ Melle be dule-isganamargi nobgue, melle be eba-akaedgi binsabali.

² Ar e-gwagegi unnila emar-sabsur-imakedgi binsamalad, unnila ibmar-isgana-imakedgi sunmakmalad.

20

³ Nue-binsaed-nikaguedba neg sobleged. Nue-ibmar-wisidba neg-e-sailamar mesleged.

⁴ Itoakwaa-binsalegedba e-gabednegmaryaba ibmar-gargermaladi, degi, ibmar-yeerdaklemaladi enoleged.

21

⁵ Dule-binsaed-ibedi, dule-gandikidid. Dule-nue-ibmar-wisidi, dule-dutusulidid.

⁶ Nue-igar-amiale, bila onoleged. Bukidar-dulemar-binsaed-dakmaladgi nakwileged siid.

22

⁷ Dule-binsaedsulidaedi, dule-binsaed-ibedga gwen guosurguoed. Igar-itolegedgi sunmakosulid, ar aku-itoged na ibi obaroe.

23

⁸ Dule unnila ibmar-isganaginbi-binsaedi, egi-soglegoed: “Dule-isganaye.”

⁹ Dule-binsaedsulidaedi, unnila isguedginbi binsaed. Bela dulemar dule-emargi-dododiid isdar-dakmalad.

24

¹⁰ Ar be bonigan-abin sikirmakele, amba be-gangued nollogwad.

25

¹¹ Dulemar-burgwed-igarse-nadapmalad be ollor-imake, dulemar e-burgwed-modanimalad be bendake.

¹² Ar amba be sogele: “An wissulinye.” ¿Dule-gwage-wilubdakedi, gwen wisguosur be insae? Dule-begi-nakulegedi gwen wisguosur, ¿be insae? Bab-Jehová dulemar-e-daedba dulemarga ibmar-uked.

26

¹³ Machi, achanis be mae, ar yeer-maleged, achanis ochii maleged.

¹⁴ Binsaed-nikaguedi, achanisyob bega ochii gumogoed. Binsaed-nikagued be amisale, yoedse bega ibmar nueganbi guoed, be-ibmar-edarbediid be nikudapoed.

27

¹⁵ Dule-isgana, melle be dule-nued-oakalogedgi binsae. Melle be e-neg-obelogedgi binsabali.

¹⁶ Dule-nuedi, amba ilagugle (7) aimukuele, gannar gwisgubaloed. Dule-isganamardi aimukusale, geg bar gannar gwisgued.

28

¹⁷ Be-isdaradi aimukusale, mer be yeer-itogo. Be-isdarad akar-gusale, mer be wergubalo.

¹⁸ Ar Bab-Jehová egi-be-wergue be-dakalile, be-daed nabir-dakosulid. Ar egi be werguele, Bab-Jehová be-isdarad bar sabsur odurdakosulid.

29

¹⁹ Melle be dule-isganamarba akae. Melle be egi nobgubalo.

²⁰ Ar dule-isgana nuedgi berguosulid. Dule-isgana gwallu-akitedaedyob bergudoed.

30

²¹ Machi, Bab-Jehová-dobekwaa be nanae, rey-nug be odummoge. Uayasulidamaladba mer be akae.

²² Ar wemar ukiagwale, sabsur-odurdaklemaloed. Ar dule wissulid, ibi-bonigan egi danikoe.

5. BINSAED-NUEGAN-BAIGAN (24:23-34)

²³ Dule-binsaed-ibegan amba we-ibmar sogsamarbalid: Igar-nabirolegedgi dule-wargwenbarbi-nagued nuedsulid.

²⁴ Dule-igar-naboged, dule-ibmar-oakalosad ibmar-oakalossuliyob dakele, neggweburmarse ukabsalegoed, dulemarse isdar daklebaloed.

²⁵ Ar dule-igar-nabogedi, dule-ibmar-oakalosad-sabsur-odurdakerdi, dulemar yeer dakmaloed, dulemar egi ise-nued binsamaloed.

²⁶ Napiragwadgi dule-abinsaed, yeer-itole dule-imaked.

²⁷ Ibmar-digoed guakwa be urbe, ibmar-digega be-nainumar guakwa be nasike, geb a-sorbali, be-neg be soboed.

²⁸ Melle be ibmar-daksasuli dule-baidgi sunmako, melle be egi gakansabalo.

²⁹ Melle be sogo: “Igi be an-imaksa, deyob an be-imakmogoed. An deyopira imaked nikamoga.”

³⁰ Dule-wiegala-e-nainu-dikarba an nasad, dule-binsaedsulidaed-e-uva-digaled-dikarba an nasad.

³¹ A-nainugine, ikomar yaisur an daksad, e-nainu bula-moodo-nai an daksabalid, e-galu-emakaled-nainu-ebiris-naidi aimukumai an daksabalid.

³² An weyob ibmar-daksadi bipisaale, an iessulid. We-ibmargine, ibmar-soggwen an durdaksad:

³³ Ar be sikwas gabele, ar be sikwas megele, ar be sikwas obunnogele, unnila be sakwa-obirmasmaile,

³⁴ wilegedi, dule-atursaedyob begi nonikoed, ibmar-sate-guedi, dule-gingi-nikadyob begi nonikoed.