Proverbios 20 - Kuna San Blas

¹ Inna-gagbidi, bingedsuli dule-imaked. Sisa neg-gagaega dule-imaked. Dule, wemar-gobsale, binsaedsuli naddaed.

² Rey-urwedi, achumigur-nono-wawaad-uurmakedyob gued. Dule rey-ourwega-imakedi, na dukin boni amied.

³ Dule-e-urwedgi-banguedi, bur nug-dummarba gued. Dule-binsaedsulidaeddi, urwed-amied.

⁴ Dule-wiegala yorgi neg imaksulid, ibmar-gwag-weleged-ibagangi ibmar-gwag weosulid.

⁵ Dule-binsaedi, dii-wiladyob gued, dule-ibmar-nue-wisiddi irgwensuli dule-binsaed-baramied.

⁶ Dule-bukidar sogdamalad, ede dule-nuedye. Degi-inigwele, dule-inniki-ibmar-sogeddi, ¿doa amioe?

⁷ Dule-nuedi, innikigwadba nanaed. E-mimmigan e-bab-nanaedba-nanadimarmogadi, egi ise-nued binsalesad.

⁸ Ar rey igar-nabogega e-ologanagi sigisale, unnila e-atakedgi bela ibmar-isgana baramied.

⁹ Dule geg soged: “Andi gwage swilidik-nikaye, andi isgued sateye.”

¹⁰ Bab-Jehová ibmar-sogbogwad nabir daksulid: Nibir-noaled, wilubsaed-noaled.

¹¹ Machigwa e-ibmar-imakedba magar dakleged, e-daed innikigwadid, degi, nuedbalid.

¹² Bab-Jehová ibmar-sogbo yeerdakle obinnisad: Uaya, ibmar-itogegar. Ibya, ibmar-dakegar.

¹³ Mer be dule-wilegedga-guega, mer be gabedginbi binsae. Bur be arbaedginbi binsae, adi, mas obinebaka be nikuoed.

¹⁴ Dule-ibmar-bakedi, yamo sogdedaed: “¡Wedi nuedsuli! ¡Wedi ibmar-isgana!” Ar we-ibmar-baksad-sorbardi, weligwar itodaed.

¹⁵ We-napneggi, ormar-nika-inigwele, akwa-nuegan-nika-inigwele, dule-binsaed-ibed-e-sunmakeddi, we-ibmarmarba bur nuedid.

¹⁶ Dule-akudaked-anar dule-mani-bennukoye-sogsad-ibe, ibmar-nued be sue. Mani-bennukegala, dule-e-ibmar-nued be gae.

¹⁷ Dule, emar-yardakedgi masgunned-amiedi yeer-itoged, degi-inigwele, a-masgunnedi durgan-gunneyob gued.

¹⁸ Igarmar-nuegan-amilegedi, binsaed-nued-dakedba amileged. Bila-onolegegala, igar-nikaa imaklegergebed.

¹⁹ Dule-galagwensuli-sunmakedi, ibmar odukusulid. Degisoggu, dulemar-gadi-galagwensuli-sunmakmaladba mer be akae.

²⁰ Dule e-bab-ukabsaele, e-nan-ukabsaele, nuchukwaa burgoed.

²¹ Gebegi ibmar-irgwensursunna-nikulegedgi, be yeer itogosulid.

²² Mer be sogo, an buged-mai imakoye. Mer be Bab-Jehováʼgi bensuli gue, ar e be-bendakoed.

²³ Bab-Jehová nibirmar-noaled isdar-daked, ibmar-wilubdaked-noaled abesulid.

²⁴ Bab-Jehová, dule-iduega gued. Degisoggu, dule na yoedse igi-guoed wissulid.

²⁵ Nue-binsassuli Bab-Dummadga-ibmar-imakoye-soged bonidar-dummadid. Geb sogsad-sorba, binsadele, an ibiga deyob sogsadibeye. Deyob-binsaedi, bonidar-dummadid.

²⁶ Rey-binsaed-ibedi, dule-isganamar-oaisakied. Ob-ubigwar-imaklegeyob ese ubigwar gumalad.

²⁷ Dule-burba, Bab-Jehová-anmarga-uksadi, bela gwage-ulubse binsaed-baramied. Ar a-burba, gwallu-meegwadyob dulega uksad.

²⁸ Wile-dule-daklegedi, degi, napiragwadgi-ibmar-soglegedi, rey-bendakega gued. Rey-e-negdakmaidi, wile-dule-daklegedgi gangumaid.

²⁹ Sapingan-e-werguedi, e-garganguedgi siid. Sergan-e-werguedi, e-ibmar-wisidgi simogad.

³⁰ Bibyolegedgi, degi, naibisalegedgi, dule-isgana nudakleged. Sabsur-imaklegedgi, galagwensur-binsaleged nudakleged.