Proverbios 14 - Kuna San Blas

¹ Ome-binsaed-ibed e-neguya onasgued. Ome-binsaed-sulidaeddina, na dukin e-neguya obeloged.

² Dule-inniki-nanadiid, Bab-Jehová-sogedba gudiid. Dule-igar-isganaba-gudiiddina, isdar Bab-Dummad-dakdiid.

³ Dule-binsaedsulidaed-e-sunmaked, unnila na san-odummogedgi sunmaked. Dule-binsaed-ibeddina, e-sunmakedgi bendakleged.

⁴ Dule moli-bebe-nikad-satele, e-ob-aila binsa ollo sigoed. Ar moli-bebe-nikad-e-arbaedgi masgulleged nue-amileged.

⁵ Dule-ibmar-gusad-barsoged-innikigwad, wissur-gakansaed. Dule-ibmar-gusad-barsoged-napiragwadsuliddi, unnila gakangi sunmaked.

⁶ Dule-galagwensulidaedi aisaar binsaed-nued nikubi gudidaenad, degi-inigwele, gwen amiosur guoed. Dule-binsaed-nued-nikarbaddina, baisursunna ibmar durdaked.

⁷ Dule-binsaedsulidaedgi be bannaba gudisae, ar a-dulegi, gwen be binsaed-nued amiosulid.

⁸ Dule-itoakwaadaedi, binsaed-nued-nikadba na magar neg-itoge gudiid. Dule-binsaedsulidaeddina, na e-binsaedgi yardaklediid.

⁹ Dule-binsaedsulidaedi, unnila isguedgi burgudiid. Dule-nuedmargindina, Bab-Dummad nued-binsaed.

¹⁰ Dule, na sana-walagwen e-nunmaked magar itoged. E-wergued, dule-baid eba itogosulid.

¹¹ Dule-isgana-e-neguya bela bergudoed. Dule-innikidaed-e-neguyadina, nasgumai gudoed.

¹² Imbagwenale, dule na e-ibmar-imakedi, inniki-imakye bidaed, degi-inigwele, e-ibmar-imakedgine, sunna burgwed-igar amied.

¹³ Imbagwenale, alled-abalagine, gwage-nunmaked itoleged. Imbagwenale, weligwar-itogedgine, nunmak itoledabalid.

¹⁴ Dule-binsaedsulidaedi, na e-igar-isganagi wergudiid. Dule-nued-daeddina, na ibmar-nued-imakedgi wergudimogad.

¹⁵ Dule-baisur-binsaedi, baisursunna binsaed-galeged. Dule-itoakwaa-binsaeddina, ibmar-imaked-iduale itoakwaa binsaed.

¹⁶ Dule-binsaed-ibedi, ibmar-isgana-abin dobekwaa nanaed, igar-isganagi bachikii gudidaed. Dule-binsaedsulidaeddina, na san-buled imaked, gwen-akar-guosurye na binsadabalid.

¹⁷ Dule-baisursunna-urwedi, galagwensuli ibmar imaked. Dule-itoakwaa-binsaeddina, na san-bargaed oyoged.

¹⁸ Dule-baisur-binsaedi, unnila galagwensur-binsaleged abingaoed. Dule-itoakwaa-binsaedgala binsaed-nikarbad uklegoed.

¹⁹ Dule-isganamar, dule-nued-asabin yokorgi-sindigar sigmaloed. Dule-isganamar, dule-innikidamalad-e-igar-itogedgi, gan-bipigi sii gumaloed.

²⁰ Dule-wilegedi, e-aimarbela isdarsunna dakdamalad. Dule-mani-ibeddina, bukidar e-aimar nikad.

²¹ Dule, dule-mesagwar-imakdiile, bato isgusye sogleged. Dule, dule-wileged-sabgudiile, we-dulegi ise-nued binsalesad.

²² Dule-galagwensuli-binsadiid igar-noar imaked. Dule-ibmar-inniki-imakdiiddi, sabgued-igar amied, igar-innikigwad amibalid.

²³ Nue-arbalegedgine, ibmar-nuegan amileged. Binsa-gayaginbi-soglegeddina, wilegedga emar-imaked.

²⁴ Dule-binsaed-ibedi, e-binsaed-nikaguedgi e-nug dungued. Dule-binsaedsulidaeddina, e-binsaedsulidaedgi na e-wileged amied.

²⁵ Dule-ibmar-gusad-barsoged-innikigwadi, burgwedgi nue-emar-bendaked. Dule-ibmar-gusad-barsoged-napiragwadsuliddi, unnila gakansaedba emar-wioged.

²⁶ Bab-Jehováʼgi-dobekwaa-nanalegedgine, bela-bela bendakleged siid. E-mimmigana, Bab-Dummadgi bendakleged nue-amimarmogad.

²⁷ Bab-Jehováʼgi-dobekwaa-nanalegedgine, nued-gudiguleged amileged. Dule-deyob-gudiile, muis burgosulid.

²⁸ Rey-e-garganguedi e-dulemar-bukidarad-nikadba siid. Dule-nuga-nikadi e-dulemar-satedba, bingesaar dakleged, agi nollomaksiid.

²⁹ Dule baisursunna-urwesulidi, magasar neg-itoged. Dule-bargaedsuli-gudiiddina, galagwensuli-binsaed yoga-oyogar imaked.

³⁰ Dule-gwage-bogidik-nikadi, nued-gudii gued. Dule-nobgueddina, bela na san-oichoged.

³¹ Dule-wileged-apor-imakedi, Bab-Dummadgine-yolenaid. Dule-wileged-sabgudiiddina, Bab-Dummad-e-nug odummodiid.

³² Dule-isgana e-ibmar-isgana-imakedgi boni-amied. Dule-innikidaeddina, e-daedgine na san-bendaked amied.

³³ Dule-binsaed-ibed-e-gwagegine binsaed-nikagued naid. Dule-binsaedsulidaeddina, binsaed-nikagued magar-itosulid.

³⁴ Ibmar-inniki-imaklegedgi neggwebur ogannolesiid. Isguedgindina, neggweburmar wiolesiid.

³⁵ Rey, e-mai-itoakwaa-gudiidgi, nued-binsaed oyoged. Dule-e-nuggi-dododiidgardina, e-urwed oyoged.