Proverbios 11 - Kuna San Blas

¹ Bab-Jehová nibir-innikisulid isdar daked. Nibir-innikigwaddina, nued daked.

² San-odummolegedgi, nug-oicholeged danikid. San-bipi-imaklegedgindina, binsaed-nikagued danikid.

³ Dule-innikidaedgala, e-daed e-iduedga gued. Dule-isganadina, na e-isguedgi dukin boni-amied.

⁴ Igar-naboleged-ibagan-nonikile, be-ibmar-bukidar-nikadi be-bendakosurguoed. Ibmar-inniki-imaklegedgindina, burgwed-igar amilesulid.

⁵ Dule-innikidaedgala, e-ibmar-inniki-imakedi ega igar-nuegan oyoged. Dule-isganadina, e-ibmar-isgana-imakdiidgi na dukin wilegoed.

⁶ Dule-innikidamaladi, ibmar-inniki-imakedgi bendaklemalad. Dule-isganamardina, sulibinsa-ibmarbina-sogedgi bipirmakmalad.

⁷ Dule-isgana-burgwidele, na ibmar-edarbediid eba-yoggudoed, na e-nug-dummarba-guedgi-gabdakdiid bela eba-bergudbaloed.

⁸ Dule-innikidaedga, bonigan-noalile, akar-gusulid. Dule-isganadina, boniganse ibitogoed.

⁹ Dule-isgana, e-gwabin-dukugi dule-e-neg-nabamaid wioged. Dule-innikidaeddina, e-binsaed-nued-nikarbadgi na san-onoged.

¹⁰ Dule-innikidaed-nasgudele, bela dulemar wergued. Dule-isgana-burgwiderdina, wergued-dummad nagued.

¹¹ Dule-innikidaedi, e-ibmar-nued-oyogedgi neggwebur-ogannoged. Dule-isgana-e-gwabin-dukudina, neggwebur-wioged.

¹² Dule-inniki-binsasulidi, mesagwar emar-imaked. Dule-itoakwaa-binsaeddina, na e-gwabin-bargaed wisid.

¹³ Dule-yogasaar-sunmakedi, ibmar-soged odukusulid. Dule-na-burba-bargaed-nikaddina, itoakwaa sunmaked.

¹⁴ Negseleged-igar inniki-maisulile, dulemar galagwensuli guddaed. Dule-binsaed-nued-dakmaladgi neg-inniki-seleged danikid.

¹⁵ Be dule-akudaked-mani-gasad-anar, mani be bennukoye sogsale, na be dukin boni-amioed. Be dule-akudaked-mani-gasad-anar, be mani bennukosurye sogsardi, be bonisuli gudii guoed.

¹⁶ Ome gwage-nued-nikad-oyodiile, e-nug ogannoledii guoed. Dule ibmar-imakerbaddi, unnila ibmar-bukidar-nika-gudii guoed.

¹⁷ Dule gwage-nued-nikad-oyodiile, ega ibmar-nuedga gued. Dule-sabsurdaeddina, na dukin nunmaked amied.

¹⁸ Dule-isgana ibmar-isgana-imakedgi-ibmar-amied binsaledid. Dule-ibmar-inniki-imakedgi-ibmar-amied, ega ibnuedga gued.

¹⁹ Dule-innikidaed, burba-dulad-nika gudiid. Dule-ibmar-isganabina-sogdiiddina, burgwed-igar ega ukleged.

²⁰ Bab-Jehová dule-gwage-isgana-nikadi, nabir-daksulid, ar we-dulemar, ibmar-isganaginbi binsadimalad. Bab-Dummad dule-inniki-gudiiddina yeerdaked.

²¹ Dule-isgana, amba sabsur odurdaklegedsegad. Dule-innikidamaladdina, sabsur-odurdaklegosurmalad.

²² Olo-nued-sin-e-asugi-yoiyobi, ome-yeerdakleged-binsaedsulidaed gued.

²³ Dule-innikidaedi, unnila ibmar-nued-imakedbi abeged. Dule-isganamar-e-ibmar-abegeddina, unnila urwedginbi binsadiid.

²⁴ Dule-wilub-obicha-ibmar-ukedi, aka ibmar-bukidar ega ukleged. Dule, mani-ganikid gwen-bennukdisulile, dule-wilegedga gudoed.

²⁵ Dule-wilub-obicha-ibmar-ukedi, ibmar ega nasgued. Dule emar-ogannodiile, ogannoledii gumogoed.

²⁶ Dule ibmargwag-gulleged na ebi gaasa-imakele, dulemar egi isdar sunmaked. Dule ibmargwag-gulleged emarga weligwaledgi manigi-ukdibe, dulemar egi nued binsaed.

²⁷ Dule ibmar-nued-imakedi, aimar-nued amied. Dule ibmar-isganabina-gudiiddi, ibmar-isgana egi aibined.

²⁸ Dule e-ibmar-nikadgi-alakwaa-naidibe, we-dule galakudoed. Dule-innikidaeddina, sapi-durbamakgwichidyob gudoed.

²⁹ Dule dukin e-neguya-oichogedi, na e-neguya-obelogega imaked. Dule-binsaedsulidaeddi, dule-binsaed-ibed-e-maiga gudii gued.

³⁰ Dule-innikidaed-e-ibmar-imakedi, nued-gudii e-imaked. Dule, dule-bamalad-ibmar-nued-imake-saedi, dule-binsaed-ibedid.

³¹ Dule-innikidaedga, we-napneggi ibmar-nued ukleged. Dule-isganamar-bulesunna, ar e-ibmar-isgana-imakdiidba we-napneggi sabsur-odurdaklemaloed.