Proverbios 1 - Kuna San Blas

1. BINSAED-NIKAGULEGEDI, BAB-JEHOVÁ-DOBEE-NANAEDGI-DANIKID (1:1-7)

¹ David-machi-Salomón Israel-e-rey, we-binsaed-nuegan narmaksad:

² Adi, binsaed-nikaa guega, igarmar-nuegan-mamaidba nanaega, gayaburba-dummagan-mamaid mamarega,

³ igar-mamaid-wisguega, itoakwaa ibmar-imakega, igar-innikii-mamaidba ibmar-imakega, igar-nabolegedgi igar-maidba imakega, emarbi-dulemar-dake nanaega.

⁴ Dule-nue-ibmar-wissulid ibmar-dukuar-maid-wisi imakega, sapingan nue-ibmar-wisi guega, sapingan mag-neg-itoakwaa nanaegar. Agala, Salomón, we-binsaed-nuegan narmaksad.

⁵ Dule-binsaed-ibedi, dule-nue-ibmar-wisidi, we-binsaed-nued itodaed, adi, gatik binsaed-nikaa guega, egi durdakbaligar.

⁶ Adi, binsaed-nuegan magar-itogega, e-burbagan-mamaid magar-itogega, dule-binsaed-nikaa-e-ibmar-soged magar itogega, oegedgi-sunmakleged magar-itobaligar.

⁷ Binsaed-nikaguedi, Bab-Jehová-dobee-nanaedgi danikid. Dule-binsaedsurmaladi, binsaed-nikagued abesulid, binsaed-nueganba nanabisulid.

2. IGARMAR-UKLENAID, DEGI, BINSAED-NIKAGUED (1:8–9:18) Be-bab-be-unaed be itogo

⁸ Machi, be-bab-be-unaed nue be itogo. Be-nan-be-odurdakedba be dao.

⁹ Be-ibmar-durdaksad bega orgurginyobi ibnuedga guoed, bega ordubyobi ibnuedga guoed.

Dule-isganamarse melle binsaed-galego

¹⁰ Machi, dule-isganamar be-yardakbi-gualile, melle ese binsaed galego.

¹¹ Bega sokarmalale: “Anmarba be dage. Anmar dule-ibmar-oakalossulid oburgwenae. Anmar binsa-nabir-itogedba dule-baisur-binsadiid oburgwenae.

¹² Igi napa dule-burgwaled-doe, deyob, anmar dule-neg-oakalossulid oburgwenamoga.

¹³ Anmar ibmar-nuegan ichesuli sumaloed. Anmar ibmar-sumaloedi, anmar-neggi ichesuli urbemaloed.

¹⁴ Anmarba be akae. Anmar ibmar-suoedi, anmar bega ukmogoed.”

¹⁵ Machi, melle amarba be akao, amar-igar-isganagi be banguo.

¹⁶ Ar we-dule-isganamar, ibmar-isgana bur gwae imakbidamalad, gwae dule-oburgwebidamalad.

¹⁷ Ar sikwimar e-wagab e-gaedsinai daksale, egi gwen dogosulid.

¹⁸ Ar we-dule-isganamardi, na dukin yardakledimalad, emar na dukin oburgwedimalad.

¹⁹ Dulemar-dogdar-maniginbi-binsamalad, deyob gunonidamalad. Dulemar-dogdar-maniginbi-binsamalad, dule-baidse burgwenonidamogad.

Binsaed-nikaguedgi sunmaklenaid

²⁰ Binsaed-Nikaguedi, binnasuli galimbaba goled, dulemar-bukidar-ambikued-abargi isseed sunmaked.

²¹ Binsaed-Nikaguedi, dulemar-igar-itoged-abargi sunmaked, neggweburse-doged-yawagakgi sunmaked. Weyob soged:

²² “Sapingan, bemar-amba-nue-ibmar-wissurmalad, ¿ar sanagwadse, ibmar-wissuli be gudii gumaloe? ¿Ar sanagwadse, be dulemargi-dododiid, bar dulemargi dodosuli gumaloe? Dule-binsaed-satemalad, bemar, ¿sanagwadse ibmar-wisigued-isdar-daked sae be dakmalode?

²³ ¡An-ibmar-sabsur-soged be itomala! An-burba-nued an bega unnitiba ukoed. An-binsaed-wisguega an be-imakoed.

²⁴ An bese gochamar-inigwele, yapa be an-itogusmalad. An bese achasmar-inigwele, gwen be amba ibsassurmalad.

²⁵ Binsaed-nuegan-an-bega-uknaigusmaladi, aka be obachamalad. An-sabsur-bega-ibmar-sogsadi, gwen be itossurmalad.

²⁶ A-ulale, bemar sabsur-odurdaklealile, an bemarga binnasuli alloed. Bemargi dobed nagunonikile, an bemarga alloed.

²⁷ Burwa-dummad-goledyob bemargi dobed nagunonikile, an bemarga alloed. Burwa-ololedyobi bemargi nunmak-itoleged-dummad nagunonikile, an bemarga alloed.

²⁸ ”A-ibagine, geb be anse gordamaloed. Degi-inigwele, andi bemar-abin-imakosulid. Be an-amidii gumaloenad, degi-inigwele, be an-amiosurmalad.

²⁹ Ar bemar binsaed-nikagued abessurmalad, Bab-Jehová-dobee be nanassurmalad.

³⁰ An-bemarga-binsaed-nued-uked be itossurmalad, an-bemarga-sabsur-ibmar-sogsad be abessurmalad.

³¹ Na be-daed begi gannar aibinoed, be dule-yardakdimaladgi, na dukin be yardaklemaloed.

³² Be-isgusadba, be-ibmar-wissulidba, na be dukin berguoed. Be baisur-ibmar-dakedba, na be dukin oburgoed.

³³ Ar dule anba-ibsaerdi, bogidik gudii guoed. Ibmar-isgana-dobsuli gudii guoed.”