Oseas 6 - Kuna San Blas

2b. Israel-dulemar-sabsur-odurdaklegoed (6:1–10:15) Israel-dulemar Bab-Dummadse-gannar-dagedgi sunmaked

¹ Israel-dulemar sogdemalad: “Dagmar, gannar anmar Bab-Jehováʼse namalo. Bab-Dummad an-ichimaksa-inigwele, amba anmar-nudakoed. Anmar-onaglik-imaksad-inigwele, anmar-nudakoed.

² Ibabogwad-sorbali, anmarga burba-dulad ukoed, ibapaagine, gannar anmar-ogwisguoed. Geb, anmar e-asabin deyob gudii gumaloed.

³ Anmar magar Bab-Jehová-dakmarsun, e-Igarmar-Mamaidi anmar durdakmarsun. Igi dad-ibeler-noedyobi, Bab-Dummad anmarse magar-guoed, dii-wiedyobi anmarse nonikoed. Igi gebe-dii-argwaned napa-nudakdae, deyobi anmarse nonikoed.”

Bab-Dummad Israel-dulemar-abinsaded

⁴ Bab-Jehová sogded: “Efraín-dulemar, ¿igi-an bemar-saergebe? Judá-dulemar, ¿igi-an bemar-imakergebe? Ar bemar-an-sabed, mogir bolegoedba-ainakwialir-berguddaedyob guddaed, boo wakudaryalaba-ainakwialir-berguddaedyob guddabalid, deyobi, be-an-sabgued berguddaed.

⁵ A-ulale, an-gayaburba-barsogmaladbali, an bemar-wiosad. An-sunmakedgine an bemar-onaglik-imaksad. An-igar-naboged mar-aidegeyob bemar-oitononikoed.

⁶ Ibmar-uklemalad an abemaisulid, bur an-sabgued an bemar-abemaid. Ibmar-ogumakar-uklemalad an abemaisulid, unnila dulemar magar-an-dake-gumalad an abemaid.

⁷ Bemar Adánʼyobi gumalad: Bemar, anbo-igar-mesisad bichismalad. Ar bemar, angi aibichamalad.

⁸ Galaad-neggwebur dulemar-ibmar-isgana-imakmalad-neggweburad. E-dule-ibmar-imakmaladi, bela ber ablis-eogedbi gudinanaed.

⁹ Dule-irwa-anse-gormaladi, Siquem-neggwebursik igar-nalemaidbali, emar-atursaega danagwen bin itos-bukwadamalad. Igi dule-ibmar-atursamalad, yogasaar ibmar-isgana-imakmala, deyobi, dule-irwa-anse-gormalad ibmar-isgana imakdamalad.

¹⁰ Israel-yala-naidgi, ibmar-gwen-nabirsulid an daksad: A-yalagine, Efraín-dulemar galagwensuli negsichigi-nanabukmalad, Israel-dulemar bela isgus bukmalad.

¹¹ ”Judá-dulemar, be-isgued-nukad, bemar sabsur-odurdakleged abdakdiid.”