Oseas 13 - Kuna San Blas

Bab-Dummad sabsur Israel-dulemar-odurdakoed

¹ Gebeunni, Efraín-dulemar, Israel-yargi nuga-nikarbamaladinad. Ibmar-sogdemalale, dulemar, dobee itodamalad. Emide, Efraín-dulemar, bab-dummad-Baalʼye-nugad-e-nug odummod gusmalad. A-isgued-nukad, Efraín-dulemar burgwenoni gusad.

² Degi-inigwele, amba bur bule isguedgi nanabukmalad. Dulemar-ega-ibmar-sobmaladga sogdedamalad: “Be anga bab-dummagan-imaklegoyob-manibiid be sobye.” Geb a-dulemar na e-dakedba ega sobdamalad. Degi, bab-dummadyob-imaklemalad-e-wagar-uddamalad, degine, dule-ogumakar-ukleged ega ukdedamarbalid.

³ Agala, igi-bolegoe-boo-bate, igi-boo wakudaryalaba-milege, deyob gumaloed. Igi-gagan-dinnagana burwaba-seleddae, igi-waa soogi-ainakwider seleddae, deyob gumaloed.

⁴ Bab-Dummad Israel-dulemarga sogded: “Israel-dulemar, Egipto-yargi be bukwamargua, bato an bemar-Bab-Dummadid. An-imbagi Bab-Dummad-baid be nikuosurmalad, an-imbagi Abonoged-baid be nikuosurbalid. Unnila anbi be-Bab-Dummadga gued.

⁵ Ar ani an nega-dulesulidganba, napa-uedikidba be gudigu be-akwisad.

⁶ An bemarga masgunned uksagusad, agi bemar nue-immeles gusmalad. Degi-inigwele, ar bemardi san-dummarbaa itosgusmalad, degidbali, be an-ies gusmalad.

⁷ Degisoggu, an bemarga achumigur-nono-wawaadyob gumaloed. An bemar-idu achu-sapur-barbadyob dukumaloed.

⁸ Igi wiob-ome ei mimmigan-sulesale, uluardae, deyobi an bemargi gwichigudoed. Be-gwage-dubmar-mamaid an bei itiroed. Achumigur-nono-wawaadyobi an bemar-obelogoed. Ibdurgan-ursilimaladyob an bemar-ichimakoed.

⁹ ”Israel-dulemar, ani an bemar-obelogoed, ar bemar, be-bendakdiidgi be gwisgunanaid.

¹⁰ Ar bemar gordigusmalad: ‘Anga be rey-udaye, dule-negsemalad be anga udabarye.’ Degite, bemar-neggwebur-bendakega, ¿bia be-reymarde? ¿Bia dulemar-bega-negsemaladde?

¹¹ An-urwedgi an bemarga rey-uksad, an-urwedgi an bemar-annik susbalid.

¹² Efraín-dulemar-e-ibmar-isgana-imakmaladi nue-narmakar maid, bela an e-isgumalad semaid.

¹³ Israel-dulemarga gwaluleged-ibagan nonikinad, degi-inigwele, igi sikwi muu-neggi aidegega geg nuekwaa mege, deyobi be binsaedsuli gusmalad.

¹⁴ ”¿Degite, amba neg-uan-e-ganguedgi bemar-bendakbi be an-abede? ¿Burgwedgi an bemar-bendakode? Burgwed, ¿bia be-boni-dummadgande nadsunna? Neg-uan, ¿bia be-dule-obeloged nadsunna? Burgwed, neg-uan, be dagmar, wile bar an wemar-dakosulid.

¹⁵ ”Ar bemar, Efraín-dulemar, be-gwenadgan-abargi be nasgudele, ani an bemar-obelogoed. Igi-burwa-dad-nakwedsikid nega-dulesulidgansik-goledi, dianmaid, degi, diwarmaid dinnaa imake, deyobi an bemar-imakoed. Geb agi, be-isdarmalad be-ibe bela be-ibmar-nuegan sumaloed.

¹⁶ Samaria-dulemar, e-isgusad-nukad, an sabsur-odurdakoed, ar e-Bab-Dummadgi yolesmalad. E-dulemar bila-onogedgi burgwemaloed, e-mimmigan napagi sabsur-omukulenai gumaloed. E-omegan-gurgin-nikamalad-ibe, saban sabsur-egalenai guoed.”