Números 26 - Kuna San Blas

Moabʼgi-bukwa Israel-dulemar-ebislesad

¹ Bukidar-Israel-dulemar-burgwismalad-sorbali, Bab-Jehová Moisésʼga, degi, Eleazarʼga sunmakded. Eleazarʼde dule-irwa-Bab-Dummadse-goled-Aarón-e-machid. Amarga weyob sogded:

² “Israel-dulemar birga-dulagwen-nikamalad (20), degi, birga-dulagwen-obine-nikamalad (20+) sunna nabir bila-onomalad be ebismalo. Amar be na e-gwenad-e-gwenadganba ebismaloed.”

³ Moisés, dule-irwa-Bab-Dummadse-goled-Eleazarʼbogwa Jordán-diwar-naba Moab-nebagan-naidgi Jericó-neggwebur-asabin, Israel-dulemarga igar-uksamalad. Ega weyob sogsamalad:

⁴ “Machergan birga-dulagwen-nikamalad (20), degi, birga-dulagwen-obine-nikamalad (20+) be ebismaloye, igi-Bab-Jehová, Moisésʼga igar-uksagusa, deyob imakmaloye.” Ebichismargu, Israel-machergan Egipto-yalagi-noarmalad wemalad:

⁵ Israel-machi-sailagined-Rubén, a-wagan e-dadganba-ebislesmalad, wemalad: Enoc-wagan, Falú-wagan,

⁶ Hezrón-wagan, degi, Carmi-wagan.

⁷ Wemala dad-dummad-Rubénʼgi danimalad. Mili-dulabo-gakapaa gaka dulataled-ilagugle gaka dulagwen-gakambe (43,730) mergued.

⁸ Falú unnila machigwa wargwenna nikusad, Eliabʼye nugad.

⁹ Eliab-masmala, wemalad: Nemuel, Datán, Abiram. We-Datán, Abiram-ebogwa Israel-dulemarga binsaed-dakega gusmaladid. Wemala, Coré, Moisésʼgi, Aarónʼgi, degi, Bab-Jehováʼgi gwisgusgu, Coréʼba akas-gusmalad. Wemarde Bab-Jehováʼgi gwisgusmogad.

¹⁰ Degidbali napa-argadgu, Coréʼmala napa-yaba ammurud gusmarmogad. Dulemar-dulataled-ilabo gaka dulabo-gakambe (250) Coréʼba-nanaimalad soogi-gummakar burgwis gusad. Bela Coréʼba-nanaimalad burgwisgusmalad. We-ibmar-gusadi, Israel-dulemar-odurdakega deyob gusad, adi, Bab-Dummad-dobee nanamalagar.

¹¹ Coré-wagandi burgwissurmalad.

¹² Dad-dummad-Simeónʼgi-danimalad-ebislesmalad wemalad: Nemuel-wagan, Jamín-wagan, Jaquín-wagan,

¹³ Zera-wagan, degi, Saúl-wagan.

¹⁴ Wemala, dad-dummad-Simeónʼgi danimalad. Mili-dulagwen-gakabo gaka dulataled-ilabo (22,200) mergued.

¹⁵ Dad-dummad-Gadʼgi-danimalad-ebislesmalad wemalad: Zefón-wagan, Hagui-wagan, Suni-wagan,

¹⁶ Ozni-wagan, Eri-wagan,

¹⁷ Arod-wagan, degi, Areli-wagan.

¹⁸ Wemala, dad-Gadʼgi danimalad. Mili-dulabo gaka dulataled-ilatar (40,500) mergued.

¹⁹ Judá-masmala Canaán-yalagi mimmi-nikussuli-burgwismalad, wemalad: Er, degi, Onán.

²⁰ Dad-dummad-Judáʼgi-danimalad-ebislesmaladi, wemalad: Sela-wagan, Fares-wagan, degi, Zera-wagan.

²¹ Faresʼgi-danimaladdi, wemalad: Hezrón-wagan, degi, Hamul-wagan.

²² Bela wemala, dad-dummad-Judáʼgi danimalad. Mili-dulapaa-gakambe-gakanergwa gaka dulataled-ilatar (76,500) mergued.

²³ Dad-dummad-Isacarʼgi-danimalad-ebislesmalad, wemalad: Tola-wagan, Fúa-wagan,

²⁴ Jasub-wagan, degi, Simrón-wagan.

²⁵ Bela wemala, dad-dummad-Isacarʼgi danimalad. Mili-dulapaa-gakabake gaka dulataled-ilapaa (64,300) mergued.

²⁶ Dad-dummad-Zabulónʼgi-danimalad-ebislemalad, wemalad: Sered-wagan, Elón-wagan, degi, Jahleel-wagan.

²⁷ Bela wemala, dad-dummad-Zabulónʼgi danimalad. Mili-dulapaa gaka dulataled-ilatar (60,500) mergued.

²⁸ Dad-dummad-Joséʼgi-danimalad-ebislesmalad, wemalad: Manasés-wagan, degi, Efraín-wagan.

²⁹ Manasés, wargwenna machi nikusad. A-machigwade, Maquirʼye nugad. Agine, Maquir-wagan danikid. Maquir, wargwenna machi nikusmogad. A-machigwade, Galaadʼye nugad. Agine, Galaad-wagan danikid.

³⁰ Dad-Galaadʼgi-danimalad-ebislesmalad, wemalad: Jezer, degi, e-wagan, Helec-wagan,

³¹ Asriel-wagan, Siquem-wagan,

³² Semida-wagan, degi, Hefer-wagan.

³³ Hefer-machi-Zelofehad masmala-nikussulid, unnila bunamalabi nikusad. A-bunamala-ebislesmalad, wemalad: Maala, Noa, Hogla, Milca, degi, Tirsa.

³⁴ Bela wemala, dad-dummad-Manasésʼgi danimalad. Mili-dulabo-gakambe-gakabo gaka dulataled-ilagugle (52,700) mergued.

³⁵ Dad-dummad-Efraínʼgi-danimalad-ebislesmalad, wemalad: Sutela-wagan, Bequer-wagan, degi, Tahán-wagan.

³⁶ Sutelaʼgi-danimalad, wemalad: Erán-wagan.

³⁷ Bela wemala, dad-dummad-Efraínʼgi danimalad. Mili-dulagwen-gakambe-gakabo gaka dulataled-ilatar (32,500) mergued. Bela wemala sogabobela, dad-dummad-Joséʼgi danimalad.

³⁸ Dad-dummad-Benjamínʼgi-danimalad-ebislesmalad, wemalad: Bela-wagan, Asbel-wagan, Ahiram-wagan,

³⁹ Sufam-wagan, Degi, Hufam-wagan.

⁴⁰ Belaʼgi-danimalad, wemalad: Ard-wagan, degi, Naamán-wagan.

⁴¹ Bela wemala, dad-dummad-Benjamínʼgi danimalad. Mili-dulabo-gakatar gaka dulataled-ilanergwa (45,600) mergued.

⁴² Dad-dummad-Danʼgi-danimalad-ebislesmalad, wemalad: Súham-wagan.

⁴³ Wemala, dad-dummad-Danʼgi danimalad. Mili-dulapaa-gakabake gaka dulataled-ilabake (64,400) mergued.

⁴⁴ Dad-dummad-Aserʼgi-danimalad-ebislesmalad, wemalad: Imna-wagan, Isúi-wagan, degi, Bería-wagan.

⁴⁵ Beríaʼgi-danimalad wemalad: Heber-wagan, degi, Malquiel-wagan.

⁴⁶ Dad-dummad-Aser, bunagwa wargwen nikusbalid, a-bunagwa Seraʼye nugad.

⁴⁷ Bela wemala dad-dummad-Aserʼgi danimalad. Mili-dulabo-gakambe-gakapaa gaka dulataled-ilabake (53,400) mergued.

⁴⁸ Dad-dummad-Neftalíʼgi-danimalad-ebislesmalad, wemalad: Jahzeel-wagan, Guni-wagan,

⁴⁹ Jezer-wagan, degi, Silem-wagan.

⁵⁰ Wemala, Dad-dummad-Neftalíʼgi danimalad. Mili-dulabo-gakatar gaka dulataled-ilabake (45,400) mergued.

⁵¹ Belamakar-machergan-ebislesmaladi weyob mergued: Mili-dulataled-ilanergwa gaka gwensak gaka dulataled-ilagugle gaka dulagwen-gakambe (601,730) mergued.

Yar-mimilesokalidga igar-uklenaid

⁵² Bab-Jehová Moisésʼga sunmakded, ega sogded:

⁵³ “Be dulemar-ebichismaladga, na e-dula-mergumaladba we-yarmar be mimioed.

⁵⁴ Na dadgan-wargwengi dulemar-bur-melu-nikale, amarga yala bur dumma be ukoed. Na dulemar-bur-ichee-nikardi, amarga yala senii be ukoed. Na emar-mergu-ebislesmaladba ega yala be ukoed.

⁵⁵ Degi-inigwele, wilubdakar ega yarmala be mimioed. Na e-dad-dummaganba-ebislesmaladba yarmar nikumaloed.

⁵⁶ Dulemar-mergumaladba ega yarmar wilub-daklear uklegoed.”

Leví-wagan-ebislesmalad

⁵⁷ Dad-dummad-Levíʼgi-danimalad-ebislesmalad, wemalad: Gersón-wagan, Coat-wagan, degi, Merari-wagan.

⁵⁸ Dad-dummad-Leví-wagangi-danimarmogad, wemarmogad: Libni-dulemar, Hebrón-dulemar, Mahli-dulemar, Musi-dulemar, degi, Coré-dulemar. Coat, machi-wargwen-Amramʼye-nugad nikusad.

⁵⁹ Amramʼde Leví-wagwa-Jocabedʼye-nugad nikusad. Jocabedʼde, Egipto-yalagi gwalulesad. Amram, Jocabedʼbo mimmigan warbaa nikusmalad. Amala, wemalad: Aarón, Moisés, degi, e-bun-María.

⁶⁰ Aarón masmala-nikunonimogad. Amar, wemalad: Nadab, Abiú, Eleazar, degi, Itamar.

⁶¹ Degi-inigwele, Nadab, Abiú-ebogwa Bab-Jehová-ega-igar-uksasulidba soo-isgana Bab-Jehováʼga-ogasmargu, burgwismalad.

⁶² Wemala Dad-dummad-Levíʼgi danimalad, mili-dulagwen-gakapaa (23,000) mergued. Nii-wargwen-nikamaladse-bakar ebislesad. Wemardi, Israel-dulemar-baiganba bular ebislessulid. Ar we-dulemargardi yar uklessulid.

⁶³ We-nugmala Moisés, dule-irwa-Bab-Dummadse-goled-Eleazarʼbogwa ebichismaladid. Deunni, Jordán-diwar-naba Moab-nebagan-naidgi Jericó-neggwebur-asabin-bukwamargu ebislesad.

⁶⁴ Degine, Moisés, dule-irwa-Bab-Dummadse-goled-Aarónʼbogwa, Sinaí-nega-dulesulidgangi, gebe-dulemar-ebichisgusad-nugmardi wemar-ebislesmalad-imbagi naisulid.

⁶⁵ Ar ade, Bab-Jehová sogsagusad: We-dulemala, nega-dulesulidganba burgwemaloye. Unnila Jefone-machi-Calebʼbi, degi, Nun-machi-Josuéʼbi dula-gudii gusad. Baigandi bela burgwisad.