Números 13 - Kuna San Blas

Dule-e-ambe-gakabogwad (12) Canaán-yar-argaapmalad

¹ Bab-Jehová Moisésʼga sunmakded, ega sogded:

² “Canaán-yar Israel-dulemarga an ukesokarsoggu, dulemar a-yar arganaega be barmide. Israel-dadgan-warambe-gakabogwad-irba (12), sapin-dummagan-war-wargwen be barmidoed.”

³ Geb degine, Moisés Bab-Jehová-ega-sogsadba nega-dulesulidgan-Paránʼye-nugad-akar dulemar-barmisad. We-dulemarde, bela Israel-dulemar-abargi dule-dummagan gumalad.

⁴ We-dulemarde, wemalad: Dad-dummad-Rubénʼgi-danikidi: Samúa Zacur-e-machi.

⁵ Dad-dummad-Simeónʼgi-danikidi: Safat Horí-e-machi.

⁶ Dad-dummad-Judáʼgi-danikidi: Caleb Jefone-e-machi.

⁷ Dad-dummad-Isacarʼgi-danikidi: Igal José-e-machi.

⁸ Dad-dummad-Efraínʼgi-danikidi: Oseas Nun-e-machi.

⁹ Dad-dummad-Benjamínʼgi-danikidi: Palti Rafú-e-machi.

¹⁰ Dad-dummad-Zabulónʼgi-danikidi: Gadiel Sodi-e-machi.

¹¹ Dad-dummad-Joséʼgi-danikidi, Dad-dummad-Manasésʼsik-danikid: Gadi Susi-e-machi.

¹² Dad-dummad-Danʼgi-danikidi: Amiel Gemali-e-machi.

¹³ Dad-dummad-Aserʼgi-danikidi: Setur Micael-e-machi.

¹⁴ Dad-dummad-Neftalíʼgi-danikidi: Nahbi Vapsi-e-machi.

¹⁵ Dad-dummad-Gadʼgi-danikidi: Geuel Maqui-e-machi.

¹⁶ Moisés dulemar-yar-arganaega-barmisgusadi, weyob nugmalad. Moisés, Nun-machi-Oseasʼgala nug ogwasad, Josuéʼye onugsasad.

¹⁷ Moisés, dulemar-Canaán-yar-arganaega-barmidsokalidga sogded: “Neguevʼgi bemar nasmaloed, geb yalaganse bemar modapoed.

¹⁸ Nue be yar argamalo, negde igidibe, dulemar-agi-bukmalad, bule nollosurmardibe, igi, nollomardibe, bule mergumardibe, igi, ichemardibe.

¹⁹ Dule-bukmaladgi, neg nueddibe, igi neg ichakwadibe. E-neggweburmar-bukwadgi, galu-matusulid-dummagan mamaidibe, igi, galu-matusurmalad mamaisurdibe.

²⁰ Napade, igidibe, gadi ibmar-sanmakdibe, igi, ibmar-geg-sanmakdibe. A-napaginde, sapimar-nikadibe, sapimar satedibe. Melle be dobgumalo. A-yargine sapi-sanmar-nikadi, bemar sedamalo.” A-ibagangi, uva gebe-goroleged-ibad.

²¹ Dule-barmilesmaladi, nega-dulesulidgan-Zinʼye-nugad-akar Hamat-neggwebur-dogedse neg-argaapmalad, Rehob-neggweburse warmakapmalad.

²² Neguevʼgi nasmargu, Hebrón-neggweburse warmaksamalad. Hebrónʼgine, Anac-e-wagan Ahimán, Sesai, degi, Talmai mamaimalad. Hebrón-neggwebur bato birga-guglegus-siid (7), geb Zoán-neggwebur Egipto-yargi bukunonikid.

²³ Dule-barmilesmalad Escol-dianse-modapmargu, uva-dubgi uva-dukgwen-naid siksamalad. Geb dulemar ebo suar-abargi uva-nai searmalad, degi, gusebyob-dakleged-granadoʼmar, degine, higo-sanmar searmarbalid.

²⁴ Israel-dulemar uva-dukgwen-gwachadgine, neg-naid Escol-nebaye onugsasmalad.

Dule-yar-argaapmalad-gannar-nonimalad

²⁵ Dule-neg-argadimaladi iba-dulabogusgu (40), gannar nonimalad.

²⁶ Dule-neg-argaapmalad nega-dulesulidgan-Paránʼse nonimalad, Cadesʼye-neg-nugadse. Agine, Moisésʼga, Aarónʼga, degi, bela Israel-dulemarga, bela neg-argasmaladba sunmaksamalad. Geb degine, sapi-san-senonimalad oyosmarbalid.

²⁷ Deginbali, Moisésʼga weyob sogsamarbalid: —Neg-argaega be anmar-barmisadse anmar modapmalad. Ar nue-napiragwad, inso agi gadi-ibmar-sanmaked, napa-nuedid. Bemar dakegala, sapi-san an bega senonimalad.

²⁸ Degi-inigwele, dulemar-a-yargi-bukwamaladi dutusur nanaed. E-neggweburmar dummagan nanaed, degine, e-neggweburmar nue-sakdigar bukwananabalid. Deginbali, Anac-e-wagan anmar daksamarbalid.

²⁹ Neguevʼgi Amalec-dulemar bukwananaed. Yalaganbali, Het-dulemar, Jebuseo-dulemar, degi, Amorreo-dulemar bukwananaed. Canaán-dulemardi demar-gakaba, degi, Jordán-diwar-gakaba bukwananamalad.

³⁰ Geb degine, Caleb Moisés-asabin dulemar-bar-sunmakega imaksasulid, geb sogded: —Anmar we-yarse ubonae. Anmargadga anmar we-yar-imaknae. Ar an wisid, anmar we-dulemar-bukwadgi nakwemaloed.

³¹ Ar dulemar-Calebʼba-arbimaladdi sogdemalad: —We-dulemar-bukwamaladi anmarba bur dutusursoggu, anmar geg we-dulemarse bila-onogega namalad.

³² We-dulemarde Israel-dulemarga yar-daksamaladgi neg-sunnasurye sogdemalad. Geb sogdemarbalid: —Anmar-negmar-dakapidgi, yarmar-argaapidgi bela dule-bukmaladi bemar-obelogoed. A-yarmargine, anmar dulemar-bukwa-daksamaladi, bela dule-masdummagan-nanaed, dule-bipisurmaladid.

³³ Aginbali, anmar Anac-e-wagan-dule-masdummagan daksamarbalid. Anmar, a-dulemarba sesyob-dakle-nanaed, emar burwii emarba anmar-dakmaloed.