Nehemías 7 - Kuna San Blas

3. NEHEMÍAS DULE-DUMMAGAN-NUGSASAD (7:1-4) Nehemías dule-dummagan-onugsasad

¹ Jerusalén-galu-matusulid bela nudaklesgua, e-yawagakmar ogwichilesad. Geb e-yawagak-dakmalad onugsalesad, degi, dule-namakmalad onugsalesbalid, degi, Levita-dulemar amilesbalid.

² Geb degine, an-urba-Hanani, Jerusalén-neggwebur-e-dummadga-megega an nugsasad. Degi, Hananíasʼdi, Jerusalénʼgi reyneg-siid-dakedga an nugsasad. Hananíasʼde, dule-napiragwadid, dule-baiganba bur bule Bab-Dummad-dobee nanadiid-duled. We-dulemar-warbogwadga an igar-uksad.

³ Amarga an sogsad: “Dad-nakwialile, Jerusalén-neggwebur-e-yawagakmar argadoed. Geb, dad-argwaned-idu, dule-yawagak-dakmalad amba arbananai, e-yawagakmar sakdiledoed, degi, be urgo iduar-mesoed nue edilegega. ”Deginbali, Jerusalénʼginmalad neggweburgi-nakulegega an onugsasad, amala gwenna-gwenna ega-soglesad bia nakulegoe, abala na e-neg-e-neg-asabin nakulemaloed.”

⁴ Jerusalén-neggweburde bipisursoggu, olloo-dakleged. Ar ade amba yoo negmar gannar soblesoggu, dulemar-ichee bukwad.

4. DULEMAR, ZOROBABELʼBA JERUSALÉNʼSE NONIMALAD (7:5-73) Zorobabelʼba gannar Jerusalénʼse nonimalad

⁵ Geb degidgine, Bab-Dummad an-gwage ebusad, dule-dummagan, dule-nuga-nikamalad, degi, bela dulemar na e-gwenadgan-e-gwenadganba urbega, adi, e-dadgan-e-dadganba amar-ebisega. Geb agine, an garda amisad, dulemar an-idu-nonimalad-e-dadgan-nugmar narmakar-nanai. Agi, narmakar-naid:

⁶ Wemar, Babilonia-e-rey-Nabucodonosorʼse-galesa, Babiloniaʼse-selesmalad. Amar gannar Judá-yarse, degi, Jerusalén-neggweburse-nonimalad-e-nugmar narmakar-nai an dakalid. Wemar, na e-neggwebur-e-neggweburse gannar nonimalad:

⁷ Zorobabelʼba, Jesúaʼba, Nehemíasʼba, Azaríasʼba, Raamíasʼba, Nahamaniʼba nonimalad. Degine, Mardoqueoʼba, Bilsánʼba, Misperetʼba, Bigvaiʼba, Nehumʼba, degi, Baanaʼba nonimalad. Israel-dulemar gannar nonimalad, wemalad:

⁸ Paros-wagan, milibo gaka dulabaabak-gakambe-gakabo (2,172).

⁹ Sefatías-wagan, dulataled-ilapaa gaka dulapaa-gakambe-gakabo (372).

¹⁰ Ara-wagan, dulataled-ilanergwa gaka dulabo-gakambe-gakabo (652).

¹¹ Pahat-Moab-wagan, a sogleged, Jesúa-waganye, degi, Joab-waganye, milibo gaka dulataled-ilabaabak gakambe-gakabaabak (2,818).

¹² Elam-wagan, miligwen gaka dulataled-ilabo gaka dulabo-gakambe-gakabake (1,254).

¹³ Zatu-wagan, dulataled-ilabaabak gaka dulabo-gakatar (845).

¹⁴ Zacai-wagan, dulataled-ilagugle gaka dulapaa (760).

¹⁵ Binúi-wagan, dulataled-ilanergwa gaka dulabo-gakabaabak (648).

¹⁶ Bebai-wagan, dulataled-ilanergwa gaka durgwen-gakabaabak (628).

¹⁷ Azgad-wagan, milibo gaka dulataled-ilapaa gaka durgwen-gakabo (2,322).

¹⁸ Adonicam-wagan, dulataled-ilanergwa gaka dulapaa-gakagugle (667).

¹⁹ Bigvai-wagan, milibo gaka dulapaa-gakagugle (2,067).

²⁰ Adín-wagan, dulataled-ilanergwa gaka dulabo-gakambe-gakatar (655).

²¹ Ater-wagan, a sogleged, Ezequías-waganye, dulabake-gakambe-gakabaabak (98).

²² Hasum-wagan, dulataled-ilapaa gaka durgwen-gakabaabak (328).

²³ Bezai-wagan, dulataled-ilapaa gaka durgwen-gakabake (324).

²⁴ Harif-wagan, dulatar-gakambe-gakabo (112).

²⁵ Gabaón-wagan, dulabake-gakambe-gakatar (95).

²⁶ Belénʼginmalad, degi, Netofaʼginmalad, dulabakebak-gakabaabak (188).

²⁷ Anatotʼginmalad, dulanergwa-gakabaabak (128).

²⁸ Bet-Azmavetʼginmalad, dulabo-gakabo (42).

²⁹ Quiriat-Jearimʼginmalad, Cafiraʼginmalad, degi, Beerotʼginmalad, dulataled-ilagugle gaka dulabo-gakapaa (743).

³⁰ Ramá-neggweburginmalad, degi, Geba-neggweburginmalad, dulataled-ilanergwa gaka durgwen-gakagwensak (621).

³¹ Micmas-neggweburginmalad, dulanergwa-gakabo (122).

³² Betel-neggweburginmalad, degi, Hai-neggweburginmalad, dulanergwa-gakapaa (123).

³³ Nebo-neggwebur-baidginmalad, dulabo-gakambe-gakabo (52).

³⁴ Elam-baid-wagan, miligwen gaka dulataled-ilabo gaka dulabo-gakambe-gakabake (1,254).

³⁵ Harim-wagan, dulataled-ilapaa gaka durgwen (320).

³⁶ Jericó-wagan, dulataled-ilapaa gaka dulabo-gakatar (345).

³⁷ Lod-wagan, Hadid-wagan, degi, Ono-wagan, dulataled-ilagugle gaka durgwen-gakagwensak (721).

³⁸ Senaa-wagan, milipaa gaka dulataled-ilabakebak gaka durgwen-gakambe (3,930).

³⁹ Dule-irwa-Bab-Dummadse-gormalad-nonimalad, wemalad: Jedaía-wagan, Jesúa-gwenadgansikid, dulataled-ilabakebak gaka dulapaa-gakambe-gakapaa (973).

⁴⁰ Imer-wagan, miligwen gaka dulabo-gakambe-gakabo (1,052).

⁴¹ Pasur-wagan, miligwen gaka dulataled-ilabo gaka dulabo-gakagugle (1,247).

⁴² Harim-wagan, miligwen gakambe-gakagugle (1,017).

⁴³ Levita-dulemar, wemalad: Jesúa-wagan, degi, Cadmiel-wagan, amala, Hodavías-e-waganad, dulapaa-gakambe-gakabake (74) mergued.

⁴⁴ Dule-namakmalad, wemalad: Asaf-wagan, dulagugle-gakabaabak (148).

⁴⁵ Dule-yawagak-dakmalad, wemalad: Salum-wagan, Ater-wagan, Talmón-wagan, Acub-wagan, Hatita-wagan, degi, Sobai-wagan, dulanergwa-gakambe-gakabaabak (138).

⁴⁶ Dule-Bab-Dummadse-goled-neggi-arbamalad, wemalad: Ziha-wagan, Hasufa-wagan, Tabaot-wagan,

⁴⁷ Queros-wagan, Siaha-wagan, Padón-wagan,

⁴⁸ Lebana-wagan, Hagaba-wagan, Salmai-wagan,

⁴⁹ Hanán-wagan, Gidel-wagan, Gahar-wagan,

⁵⁰ Reaía-wagan, Rezín-wagan, Necoda-wagan,

⁵¹ Gazam-wagan, Uza-wagan, Paseah-wagan,

⁵² Besai-wagan, Mehunim-wagan, Nefisesim-wagan,

⁵³ Bacbuc-wagan, Hacufa-wagan, Harhur-wagan,

⁵⁴ Bazlut-wagan, Mehída-wagan, Harsa-wagan,

⁵⁵ Barcos-wagan, Sísara-wagan, Tema-wagan,

⁵⁶ Nezía-wagan, degine, Hatifa-wagan.

⁵⁷ Salomón-maimar-wagan, wemalad: Sotai-wagan, Soferet-wagan, Perida-wagan,

⁵⁸ Jaala-wagan, Darcón-wagan, Gidel-wagan,

⁵⁹ Sefatías-wagan, Hatil-wagan, Poqueret-Hazebaim-wagan, Amón-wagan.

⁶⁰ Dule Bab-Dummadse-goled-neggi-arbamalad, degi, Salomónʼga-arbamalad-wagan, dulataled-ilapaa gaka dulabake-gakambe-gakabo (392).

⁶¹ Baigandi: Tel-Melaʼgi, Tel-Harsaʼgi, Querubʼgi, Adónʼgi, degi, Imer-neggweburmargi noarmarmogad. Amarde, geg oyogusmalad, doamar e-dadganmala, degi, emar Israel-dulemar-gumarbardibe.

⁶² Amardi, wemardo: Delaía-wagan, Tobías-wagan, degi, Necoda-wagan, dulataled-ilanergwa gaka dulabo-gakabo (642).

⁶³ Dule-irwa-Bab-Dummadse-gormaladmoga, geg oyogusmarmogad, emarde Israel-dulemar-gumardibe. Amardi, wemardo: Habaía-wagan, Cos-wagan, degi, Barzilai-wagan. Barzilai-wagwa-gwensakde, Barzilai-sisgwa-wargwen nikusad. We-Barzilaiʼde, Galaadʼginedid. Abali, na e-nug susad.

⁶⁴ Wemala, na e-dadgan-nug amidmargu, amissurgusmalad. Degisoggu, dule-irwa-Bab-Dummadse-goledga bar gussurmardo, ar ade, swilidikidsuryenik soglesad.

⁶⁵ Degidgine, saila-dummadga-maid igar-uksamogad, we-dulemar melle Bab-Dummadga-ibmar-uklegaled gunnamaloye. Geb dule-irwa-Bab-Dummadse-goled-wargwen Urimʼba, degi, Tumimʼba Bab-Dummadse-egisedse nabir we-dulemar mas-swilidikid gunmalodibe, surdibe.

⁶⁶ Bela dulemar-danar, mili-dulabo-gakabo gaka dulataled-ilapaa gaka dulapaa (42,360) mergu ambikunonimalad.

⁶⁷ Wemar-abargi, e-mai-machergan, degi, e-mai-omegan obarilenaisulid. Emarbi, miligugle gaka dulataled-ilapaa gaka durgwen-gakambe-gakagugle (7,337) mergued. E-namakmalad-machergan, degi, e-namakmalad-omegan, dulataled-ilabo gaka dulabo-gakatar (245) mergu nikad.

⁶⁸ Molimar weyob mergued: Dulataled-ilagugle gaka dulagwen-gakambe-gakanergwa (736) mergu nikad. Moli-uaya-senigwadmardi, dulataled-ilabo gaka dulabo-gakatar (245) mergu nikad.

⁶⁹ Moli-yargan-muremaladdi, dulataled-ilabake gaka durgwen-gakambe-gakatar (435) mergued. Moli-uayasuiddi, milinergwa gaka dulataled-ilagugle gaka durgwen (6,720) mergumogad.

⁷⁰ Bukidar babgan-na-neguya-sedimalad, Bab-Dummadga arbaed-imakega ibmar uksamalad. Jerusalén-neggweburgi dummadga-maid ibmar-uksad: Or-nibirambe-gakabakebak (19) uksad, nogmar gwadulabo-gakambe (50) uksabalid, degine, dule-irwa-Bab-Dummadse-gormalad-e-mor-yomalad, goadulataled-ilatar gaka dulagwen-gakambe (530) uksabalid.

⁷¹ Babgan-na-neguya-sedimalad, Bab-Dummadga weyob-arbaed-imakega ibmar-uksamarmogad: Or, nibir-dulataled-ilapaa gaka dulapaa-gakambe-gakatar (375) aidiku uksad. Mani, nibir-milibo gaka dulataled-ilagugle (2,700) aidiku uksabalid.

⁷² Dule-baiganmoga: Or, nibir-dulataled-ilapaa gaka dulapaa-gakambe-gakatar (375) aidiku uksamarmogad, Mani, nibir-milibo gaka dulataled-ilabo gaka dulabo-gakambe (2,250) aidiku uksamarbalid. Degine, dule-irwa-Bab-Dummadse-gormalad-e-mor-yomalad, goadulapaa-gakagugle (67) uksamarbalid.

⁷³ Degine, dule-irwa-Bab-Dummadse-gormalad, Levita-dulemar, dule-yawagak-dakmalad, dule-namakmalad, dule-neggweburginmalad, dule-Bab-Dummadse-goled-neggi-arbamalad, degi, bela Israel-dulemar, na e-neggwebur-e-neggweburse megnadmalad. Nii-walaguglegusgu (7), bela Israel-dulemar na e-neggwebur-e-neggweburgi bato mamaimalad.