Nehemías 12 - Kuna San Blas

Dule-irwa-Bab-Dummadse-gormalad, degi, Levita-dulemar nonigusmalad

¹ Dule-irwa-Bab-Dummadse-gormaladi, degi, Levita-dulemar, Salatiel-machi-Zorobabelʼba, degi, Jesúaʼba nonigusmalad. Amarde, wemalad: Seraías, Jeremías, Esdras,

² Amarías, Maluc, Hatús,

³ Secanías, Rehum, Meremot,

⁴ Iddo, Gineto, Abías,

⁵ Mijamín, Maadías, Bilga,

⁶ Semaías, Joiarib, Jedaías,

⁷ Salú, Amoc, Hilcías, degi, Jedaías. Amala, Jesúa-ibagangi, dule-irwa-Bab-Dummadse-gormalad-e-dummagan, degi, e-gwenadgan-gumalad.

⁸ Levita-dulemardi, wemalad: Jesúa, Binúi, Cadmiel, Serebías, Judá, degi, Matanías. Amala, na e-gwenadganmala Bab-Dummad-nug-ogannogedgi namakmalad.

⁹ Degine, e-gwenadgan-Bacbuquías, degi Uni, amar-asabin ambikunonidamalad, Bab-Dummad-nug-odummomalagar.

¹⁰ Jesúa-wagan, wemalad: Jesúaʼde, Joiacim-babad. Joiacimʼdi, Eliasib-babad. Eliasibʼdi, Joiada-babad.

¹¹ Joiadaʼdi, Jonatán-babad. Jonatánʼdi, Jadúa-babad.

¹² Joiacim negdakmaigu, dule-irwa-Bab-Dummadse-gormalad e-neg-yaurgi dummaganga gudimalad. Amarde, wemalad: Seraías-gwenadgan-e-dummad, Meraías. Jeremías-gwenadgan-e-dummad, Hananías.

¹³ Esdras-gwenadgan-e-dummad, Mesulam. Amarías-gwenadgan-e-dummad, Johanán.

¹⁴ Melicú-gwenadgan-e-dummad, Jonatán. Sebanías-gwenadgan-e-dummad, José.

¹⁵ Harim-gwenadgan-e-dummad, Adna. Meraiot-gwenadgan-e-dummad, Helcai.

¹⁶ Iddo-gwenadgan-e-dummad, Zacarías. Ginetón-gwenadgan-e-dummad, Mesulam.

¹⁷ Abías-gwenadgan-e-dummad, Zicri. Miniamín-gwenadgan, Moadías-gwenadgan-e-dummad, Piltai.

¹⁸ Bilga-gwenadgan-e-dummad, Samúa. Semaías-gwenadgan-e-dummad, Jonatán.

¹⁹ Joiarib-gwenadgan-e-dummad, Matenai. Jedaías-gwenadgan-e-dummad, Uzi.

²⁰ Salai-gwenadgan-e-dummad, Calai. Amoc-gwenadgan-e-dummad, Eber.

²¹ Hilcías-gwenadgan-e-dummad, Hasabías. Jedaías-gwenadgan-e-dummad, Natanael.

²² Levita-dulemar-neguya-sedimaladi, degi, dule-irwa-Bab-Dummadse-gormalad-neguya-sedimaladi, Eliasib-ibagangi, Joiada-ibagangi, Johanán-ibagangi, degi, Jadúa-ibagangi, Persa-dule-Rey-Darío negdakmaigu, we-dummagan-nug garda-selemaidgi narmaklesad.

²³ Eliasib-machi-Johanán-maigusad-ibase, Levita-dulemar-neguya-dummaganga-gumalad-e-nugmar garda-selemaidgi narmaklesad.

²⁴ Levita-dulemar-neguya-dummagana, wemalad: Hasabías, Serebías, Cadmiel-machi-Jesúa. Amar Bab-Dummadse-goled-neggi-arbaega egad-wachi-omosale, na e-gwenadgan, e-asabin ambikunonidamalad, adi, Bab-Dummad-nug-odummomalagar, degi, Bab-Dummadga dog-nuedye sogmalagar, ar igi David Bab-Dummadga-arbaed-dule, igar-mesisadba.

²⁵ Yawagak-dakmalad, wemalad: Matanías, Bacbuquías, Obadías, Mesulam, Talmón, degi, Acub. Deginbali, amala, yawagak-dogedgi ibmarmar-saboleged-negmargi nakulebukwa-gusmarbalid.

²⁶ Bela amala, Jesúa-machi-Joiacim-ibagangi gudii gusmalad. Joacimʼde, Josadac-wagwad. Degine, amar Nehemías-Saila-Dummadga-maigusad-ibagangi, degi, dule-irwa-Bab-Dummadse-goled-ibagangi gudii gusmalad. Degine, dule-garda-narmaked Esdrasʼye-nugad-ibagangi gudii gusmarbalid.

8. JERUSALÉN-GALU-MATUSULID BAB-DUMMADGA NUGSALESAD (12:27-47) Galu-matusulid-obelolesadga iba-onolesad

²⁷ Jerusalén-galu-matusulid-ogulesadi Bab-Dummadga nug-imaklesokargua, Levita-dulemar-banna-banna-mamaid bela amiapmalad. Geb Jerusalén-neggweburse amar-searmalad, adi, weligwaledba Bab-Dummadga galu-nug-imaklenaidgi werguegar, ega dog-nuedye namaklegedgi sogega, degi, garmar-címbaloʼba, salterioʼba, degine, cítaraʼba Bab-nug-odummogega.

²⁸ Degidgine, Levita-dule-namakmalad, Jerusalén-neggwebur-dikarba-mamaidi, degi, Netofa-neggwebur-dikarba neggwebur-burwiganagi-mamaid bela nonimalad.

²⁹ Deginbali, Gilgal-neggweburginmalad, Geba-neggweburginmalad, degi, Azmavet-neggweburginmalad nonimarmogad. Ar ade, dule-namakmalad Jerusalén-neggwebur-dikarba neggwebur-burwigana sobsamalad.

³⁰ Dule-irwa-Bab-Dummadse-gormalad, degi, Levita-dulemar, bela na san-uruksamalad. Geb a-sorbali, dulemarga san-uruksamarmogad. Degi, yawagakmar, degi, galu-matusulid swilidik-imaksamarbalid.

³¹ Ani, Nehemías, Judá-saila-dummagan Jerusalén-galu-matusulidgi-nakwega an imaksad. Degine, ichesur dule-namakmalad danabo an urbisad. Adi, amar galu-matusulid-birgi namakale Bab-Dummadga dog-nuedye sogegar. Danagwenad-soggwenaddi, galu-matusulid-argan-nuedsik, Ibmar-Isgana-Mied-Yawagak-Noedsik ilekwaa nadapgusmalad.

³² Wemar-sorbali, Osaías Judá-saila-dummaganmala ilekwaa nadapgusmarmogad. Amala, wemalad:

³³ Azarías, Esdras, Mesulam,

³⁴ Judá, Benjamín, Semaías, degi, Jeremías.

³⁵ Amarba, dule-irwa-Bab-Dummadse-gormalad, gar-trompeta sedanigusmaladi, wemalad: Jonatán-machi-Zacarías. Jonatánʼde, Semaías-machid. Semaíasʼdi, Matanías-machid. Mataníasʼdi, Micaías-machid. Micaíasʼdi, Zacur-machid. Zacurʼdi, Asaf-machid.

³⁶ Zacarías-e-gwenadgandi, wemalad: Semaías, Azarael, Milalai, Gilalai, Maai, Natanael, Judá, degi, Hanani. Wemala, Bab-Dummadga-arbaed-David-igar-mesisadba gar-ogormalad semamai gusad. Degine, dule-garda-narmaked-Esdras, we-dulemar-idumai gusad.

³⁷ Dii-Saila-Yawagak-Noed-innikgusgu, David-neggweburse-doged-arsan-maidgi nakwide-gusmalad, galu-matusulidse-nakwileged-birgi nakwide gusmalad. Geb David-neg-niba-nasmargu, Dii-Yawagak-Noedse, dad-nakwedsik modapmalad.

³⁸ Dule-namakmalad-danabogwaddi, obakar nadapgusmarmogad. Ani, an a-sorba, degi, dulemar-neggweburginmalad-negabaladbo galu-matusulid-birgi, neg-matusur-warakwagwad-Soo-Yaaye-nugad-akar, Galu-Matusulid-Matardummadse, anmar nadapgusmalad.

³⁹ Anmar Efraín-Yawagak-Noedgi nasmalad, Yawagak-Sered-Noedgi, Ua-Yawagak-Noedgi nasmalad. Geb neg-suid-Hananeelʼye-nugadgi, degi, neg-suid-Hameaʼye-nugadgi nasmarbalid. Sibad-Wawaad-Yawagak-Noedgi nasmargu, geb Esgarya-Yawagak-Noedse anmar ambikudapmalad.

⁴⁰ Geb degidgine, dule-namakmalad-danabogwadi Bab-Dummadga dog-nuedye-sogsamargu, Bab-Dummadse-goled-negse modapmalad. Geb e-gwisgudapmaloedgi gwisgudapmalad. An deyob dummagan-abargi anba-gudimalad-abargi gwisgudapmogad.

⁴¹ Degine, dule-irwa-Bab-Dummadse-gormalad, gar-trompeta ogorgwismalad, wemalad: Eliacim, Maaseías, Miniamín, Micaías, Elioenai, Zacarías, Hananías,

⁴² Maasías, Semaías, Eleazar, Uzi, Johanán, Malquías, Elam, degi, Ezer. Dule-namakmaladdi, binnasuli ise-namakar bukwa-gusmalad, Izrahías amar-idu gwichi gusad.

⁴³ A-ibagine, Bab-Dummadga ichesuli ibmar-ogumakar uksamalad. Degine, ar Bab-Dummad, nue-weligwale amar-imaksasoggu, nue wergusmalad. Omegan, degi, burwigana nue wergusmarmogad. Jerusalén-neggweburgi-wergubukmalad dikasuli itolesad.

Dule-irwa-Bab-Dummadse-gormaladga, degi, Levita-dulemarga ibmar-ukleged uklegoed

⁴⁴ A-ibagine, dulemar-onugsalesad: Mani-weleged-daked, Bab-Dummadga-ibmar-weleged-daked, ibmar-gebe-welemalad-ukleged-daked, ambegi-gwensak (10%) ibmar-ukleged-daked. We-dulemar-onugsalesmalad ibmarmar nainu-baid-baidgi neggwebur-dikarbarmaladgi-danikidi, ibmar-sabomalad-neggi sabomalaga. Adi, Igar-Maidba dule-irwa-Bab-Dummadse-gormaladga, degi, Levita-dulemarga ibmar-ukegar. Ar ade, dule-irwa-Bab-Dummadse-gormalad, degi, Levita-dulemar ibmar-nuegan-imaknanaidgi Judá-yargi-bukmalad ber weligwar-itosmalad.

⁴⁵ Dule-nugsalesmaladi, Bab-Dummadga-arbaedgi arbananai gusmalad, degi, dule-isgusmalad-anar Bab-Dummadga-ibmar-ogumakar-ukleged imaknanai gusmalad. Amba deyob, dule-namakmalad, degi, dule-yawagak-dakmalad eba arbananai gusmarmogad, ar igi David, degi, e-machi-Salomón igar-uksadba.

⁴⁶ Ar ade, dikasurgus, David-akar, degi, Asaf-akar, bato dule-namakmalad-e-idued-nika danikid. Bab-Dummadga-namakleged-namakmalad-nika danibalid, degi, Bab-Dummadga-dog-nuedye-sogdimalad-nika danibalid.

⁴⁷ Degine, Zorobabel-ibagangi, degi, Nehemías-ibagangi, bela Israel-dulemala, dule-namakmaladga, dule-yawagak-dakmaladga mas ukdamalad. Degine, amarga ibmar-uklemalad na e-iba-maidgi ega ukdedamalad. Deginbali, amba Levita-dulemarga deyob ibmar-ukdamarbalid. Geb, we-Levita-dulemar, Aarón-waganga ukdedamarmogad.