Nahúm 3 - Kuna San Blas

Nínive-neggwebur-berguoedgi sunmaklenaid

¹ Neggwebur-dulemar-ablis-eogedbi-siid, be ¡duledar-wiles! Bela begi neg-gakansalegedbi naid, begi bela-bela ibmar-atursalegedbi naid, ibmar-atursaedi gwen be indaksulid. Be deyob gusiidi, be ¡duledar-wiles!

² Molidub-suid-goledi bato itoleged. Ur-napaginmalad-e-nagmar-bipirmaknaid-goled bato itoleged. Moli-nag-goledi bato itoleged, bila-onomalad-ur-napaginmalad e-gollomakedi bato itoleged.

³ Sorda-moli-birgi-sii-bila-onomalad-danimalad itoleged. Es-suid-e-dakarmaked mag dakleged, eswar-dakar-dakar-gaed mag dakleged. Dulemar-burgwarmaladi yaisulid. Muimar odunnumakded, muimar baid-baidsik omileded, dulemar a-muimargi yolenanaid.

⁴ Ar ome-gambasaed macherganga yamo-yamo-gudidaed-ular, deyobi neg-gunonikid. We-omede, dule-binsaed-gaed-buledid. E-gambanuchu-saedgi dulemar-yardaksad, e-inamar-isgana-imakedgi dulemar-yardaksabalid.

⁵ Bab-Jehová-Bela-Gangued-Nikad weyob soged: “¡An bemargi gwisguega danikid! Be-sabure wagarse an be-ibe onakoed, adi, dulemar-yar-baid-baidgi-bukmalad uka-swiri be-dakmalaga, dule-yar-dummaganginmalad be-binge-itoged dakmalagar.

⁶ Begine an ibmar-isgana mioed, an be-nug oichogoed, dulemar-abargi-oyolegega an be-imakoed.

⁷ Bela dule-be-dakmaloedi begi bangudoed. Sogdemaloed: ‘Nínive-neggwebur bergusye. ¿Doa eba wile itogoe? ¿Bia dule-wile-e-daked an ega amioe?’ ”

Nínive-neggwebur-bela-obelolesad

⁸ ¿Ar bede Tebas-neggweburba bur-nuedsi? Ar Tebas-neggweburde diimar-abargi siinad, Nilo-diwar-sukamakmaid-walik siinad, Demar e-napa-odinnogaledyob guenad, diimar e-galu-matusulidyob guenad.

⁹ Etiopía-yar, Egipto-yar, Tebas-neggwebur-bendaksimalanad, bela-bela gangued nikamalanad. Fut-yar, Libia-yar, Tebasʼba naimalanad.

¹⁰ Degi-inigwele, Tebas-dulemar yar-baidse ononnolesmalad, yar-baidse gales-selesmalad. E-mimmigan igar-abingunanaidgi sabsur-omukulenai gusmalad. E-dule-nuga-nikamalad ibmarba-wilubdakar mimilesgusmalad, e-dule-dummagan-negsediid esgoro-dubgi edilles gusmalad.

¹¹ Be, Nínive-neggwebur, be-omumsamarmogoed, neg-itosuli be gudii guoed. Be-isdarmalad-ulale, neg-dukued amidii be gumogoed.

¹² Bela be-neg-gandikmaladi higuera-sapi-san-gordik-siiyobi gued, ar dule osiamakele, dule-gunnega-gwichid-e-gaya-yaba argwaned.

¹³ Be dake, be-isdarmaladbo be bila-ononaidgi, be-sorda-bila-onomalad omeganyobi damalad. Be-neggwebur-e-yawagakmar argasii guoed, ar be-yawagakgi-suar-biir-biir-megmalad soose gummakoed.

Binsa neg-bendaked amimaloed

¹⁴ Nínive-neggwebur, be-isdarmalad be-neggwebur-ebiris-ambikunonimaloed-iduar, dii be enomar, be-neg-gandikmalad be ogannomala. Napa-olli-ollid-birgi be gwisgue, napsa-ginnid-birgi be annae, akwa-napsa-ginnidgi-sobaled be sobe.

¹⁵ Degi-inigwele, soogi be burgwemaloed, es-suidgi be girgumaloed, be-isdarmalad sesmaryobi giir be-imakmaloed. Ses-burwiganayobi be mergumai gumala, sesmaryobi be gwalulemai gumala.

¹⁶ Be-dula ibmar-ukedgi-arbamaladi, bur bule nibneggi-niisgwamar-nanaidba merguded.

¹⁷ Be-dummagan seseyobi gumalad, be-sordamar-e-dummagan ibmar-gukumalad-gar-satedyobi gumalad. We-ibmarmar neg-dambegwadgine galu-matusurmaladgi achaa nagudamalad. Ar dad-nakwialirdi gukuddamalad, bar daklegosulid, dule wissulid bia naddamala.

¹⁸ Asiria-e-Rey, dule-bega-negdakmamaid bela-bela gabmamaid, be-sordamar-ise-welegar-imaklesmalad gabidmalad. Be-dulamar yala-imbaganba aisakis gudidiid, amar-onmakega dule sated.

¹⁹ Be-nailikgusadi gege nudakleged, be-yaa-siid-nudakega ina sated. Dulemar deyob-be-gusadi be-wisgumaloedi, bega yeer-itomaloed. Ar ade, dulemar-yar-baid-baidgi-bukmalad-bukidara be sabsur-imaksa gusad.