Nahúm 2 - Kuna San Blas

Nínive-neggwebur berguoed

¹ Nínive-dorgan, bemargi dule-ibmar-obeloged gwichigudanikid, be-neggandikidgi, be nakulegwichi imake. Be-igarmarba be nakulemala, es-suid be guagwar gamala, bela bemar na niga ogannomala. Danale be ambikumala, adi, na be gargangued nikumalagar.

² Ar Bab-Jehová Jacob-dulemar-e-yeerdakleged gannar obinoged. Israel-dulemar-e-yeerdakleged gannar obinoged. Ar dule-atursamalad e-ibe ibmar susmalanad, bela e-ibe uva-dub obelosmalanad.

³ E-sorda-bila-onomalad-bulegan-e-sigu-abgamalad, ginnitibi magaled, sordamar-bila-onomalad mor-ginnigan yoimalad. E-ur-napaginmalad guagwar bila-onogega-nanaidi, soo-gaeyobi dakarmaknanaid. Sorda-bila-onomalad e-eswarmar-gani-gani, sakwa bipinmakdanimalad.

⁴ E-ur-napaginmalad neg-imbaba gwae-gwae oabarmakdemalad, binnasuli dulemar-danar-bukumaladgi iirmakdidimalad. Acha-gwallu-gaeyobi urmar daklenanaed, mar-gaeyobi dakar-dakar gamalad.

Nínive-neggwebur-bergusad, degi, e-ibe ibmar-sulesad

⁵ Nínive-e-rey e-sordagan-bila-onomalad-buleganse goled, we-sordagan duurmakdegua, na muchub-muchub yolenanai gusad. Egi-ubodanimalad-abin-bukuega, galu-matusulidsik abarmakdemalad,

⁶ degi-inigwele, yawagak-dummagan-diwar-abgamaid argaded, reyneg aimukuded.

⁷ Rey-ome gales selemaid, omegan-ega-arbamaladi nuu-akiginmaiyobi selemamaid, nue-nunmak-itogedbali bonadapmalad.

⁸ Nínive-neggwebur dii-sied-mamarisadyob gued, e-diimar ariomaid. Ese gornanaid: “¡Mer be abarmakmala! ¡Be gannar dagmala!” Ar dule-wargwensaar gwen gannar aibirsulid.

⁹ ¡Mani be sumala! ¡Or be atursamala! Nínive-neggwebur e-ibmar-nuegan yaisulid, manimar bukidar nikad, ibmar-yeerdaklemalad bukidar nikbalid.

¹⁰ Nínive-neggwebur bergus siid, dule-sate siid, napabi-nai nagusad. Dobedbali dulemar nig-argwatemalad, e-yokormar nollomakded. Bela e-abagan wawanmakded, e-wagarmar bela sibudiki daklenaded.

Achumigur-nono-wawaad-obelolegoed

¹¹ Achumigur-nono-wawaad-e-neg, ¿bia nade? Achumigur-e-mimmigan-e-neg, ¿bia nade? A-neggine, achumigur-machered, e-ome, degi, e-mimmigan, dule-e-ogwayed-sate, dobsuli mamaidaenad.

¹² Achumigur-machered na e-mimmiganga san-goa-goa-imakdidaedi, ¿bia nade? Na e-omeganga ibdurgan-oburgwedaedi, ¿bia nade? Na e-megedgi ibdurgan-oburgwisad-urbedidaedi, ¿bia nade? Na e-neggi san-sabodidaedi, ¿bia nade?

3. NÍNIVE-NEGGWEBURGINMALAD WILEDAR-ITOMALOED (2:13–3:19)

¹³ Bab-Jehová Bela-Gangued-Nikad weyob soged: “Emigindi, an bemargi gwisguega danikid. Be-urmar-napagined-bila-onomalad burubi-sii an imakoed, be-achumigur-burwigana an es-suidgi oburgoed. Ibmar-atursamaladi be-yargi an osulogoed, be-dule-gayaburba-barsogmalad bar bipisaale itolegosulid.”