Miqueas 6 - Kuna San Blas

3. ISRAEL-DULEMAR-ISGUSAD, DEGI, BAB-DUMMAD ISRAEL-DULEMAR-WILEDAKSAD (6:1–7:20) Bab-Dummad Israel-dulemarse ulusad

¹ Israel-dulemar, Bab-Jehová-ibmar-sogedi be nue itomar: “Be gwichigumar. Be boni-nikagudiid yarmar-asabin be sognamar. Yar-mullugana be-itogega be imakmar.”

² Yalamar, Bab-Jehová-urwed be itomar, napa-e-saila-gandikmalad, nue be bogimakar itomar, Bab-Jehová, e-dulemarga igar itosokalid, Israel-dulemargi gwisgusokalid.

³ Bab-Jehová sogded: “An-dulamar, ¿igi an bemar-imaksa? Be anga-sogmala, ¿ibigi an begi nosa?

⁴ Ar ani an Egipto-yalagi bemar-onosadid, maigagudiid-yalagi an bemar-ollor-imaksadid. Ani an bemarga Moisés, Aarón, María, barmisgusadid, adi, amar bemar-idumalagar.

⁵ An-dulamar, be-ebinsamala, Moab-dulemar-e-rey-Balac bemar-wiogega bemar-idu igar amisgusanad. Beor-machi-Balaam, igi Balac-abin sogsagusa, a be nue-ebinsamala. Deginbali, Sitimʼye-neg-nugad-akale, Gilgal-neg-nugadse-be-nonigusmaladi, be ebinsabali. Magar be an-dakmala, ani an, Bab-Jehová bemar-onosadid.”

⁶ Emide be sogmalad: “Anmarde, ¿igi Bab-Jehová-walikaa gumalosunna? ¿Igi anmar Bab-Dummad-Bur-Birigined-asabin sindigar sigmalosunna? ¿Moli-bebe-nikad-birgagwenad-ogumakar-ukleged, an ega ukega sedoe?

⁷ An sibad-wawaad-machered miliba (1000) Bab-Jehováʼga uker, Bab-Jehová ¿yeer itogoe? Olivo-gwallu bute-miliambe (10,000) an ega uker, ¿yeer itogoe? An ibmar-isgana-imaksad-ular, ¿an-machi-sailagined an ukoe? An-machi-sunnad, ¿an-isgued-ular, an ukoe?”

⁸ Ar Bab-Jehová bato bega sogsad ibu ibmar-nuedi. Bab-Jehová be-daed-abemaidi, bato bega sogsad: Igar-napiragwad-imaked be-abemaid, dule-wiledaked be-abemaid, e-asabin gwage-eikwadaed be-abemaid.

Jerusalén-dulemar sabsur-odurdaklegoed

⁹ Jerusalén-dulemar, Bab-Jehová-ibmar-soged nue be itomar: Dule Bab-Dummad-dobee-nanadiile, a-dule, dule-binsaed-ibedid. Sabsur-odurdaklenaid nue be itomala. Bega dule-odurdakleged-barmialidi, nue be itomala.

¹⁰ “¡Dule-isganamar! Ande be-ibmar-nuegan ibmar-isgana-imakedba-amisad, ¿baisurdakode? Degi, ande be ibmar-wilubsamalad-isgana, ¿baisurdakode? ¡Adi surbali!

¹¹ Ar ande, dule ibmar-wilubsaed-nuegansulid-ebudiid ¿igi yeer dakosunna? Degi, ibmar-wilubdaked-ebudiid, ¿an igi yeer dakosunna? ¡Geg an yeer daked!

¹² Dule-mani-ibegan, sabsur dule-imakedid. Bela neggweburginmalad, gakansilimalad. Na e-ibmar-sogedi bela gakansaedbiid.

¹³ Emisgine, ani an sabsur-be-imakmaloed, bemar-isgued-ular, an bemar-obelogoed.

¹⁴ Na be mas-gunmalo-inigwele, gwen be immelegosurmalad, amba ukudmaada be gudii gumaloed. Be ibmar-gwag weemaloe-inigwele, be-ibe berguoed. Ar be ibmar-soggwensaar-gaoedi, ani an bila-onolegedgi be-ibe obelogoed.

¹⁵ Be ibmar-digmaloedi, gwen be weosurmalad, degi, be olivo-gwallu-egurmaloedi, gwen be ebugosurmalad. Vino-onogega uva-nis-egurusadi, be gobosurmarbalid.

¹⁶ ”Rey-Omri-igar-mesisadba be nanadimalad, bela Rey-Acab-e-wagan-ibmar-isgana-imaksadba be ibmar-imakdimalad. Amar-ibmar-imaksadyobi be nanadiid. A-ulale, an bemar-obeloged imakoed. Be-dulemar bingedar-itogega an saoed. Dulemar-begi-dodoedi, an imakoed.”