Miqueas 1 - Kuna San Blas

1. BAB-DUMMAD ISRAEL-DULEMARGA, DEGI, JUDÁ-DULEMARGA IGAR-NABOSAD (1:1–3:12) Samariaʼga, degi, Jerusalénʼga naibi-itosad

¹ Judá-dule-e-reymar Jotam, Acaz, degi, Ezequías, negsemamaid-ibagangine, Bab-Jehová dule-Moreset-neggweburgined-Miqueasʼye-nugadga sunmaksad. Miqueas, Samaria-yalagi-negguoed, degi, Jerusalén-yalagi-negguoed weyob negburgan daksad. Miqueas, Bab-Jehová-ega-sogsadba weyob sogded:

Bab-Jehová-danikoed

² “Dulemar, bela we-yalagi-bukmalad be an-itomar, bela napneggi-bukmalad, nue-bogimakar be itomalo. Bab-Dummad-Jehová-Bela-Gangued-Nika-Maid, ese-goled-neg-akale, bemargi-gwisguega sunmakoed.

³ ¡Dakmala! Bab-Jehová, e-maidgi bato noalid, bato aidealid, yar-mullugan-imbaba gannamakdanikid.

⁴ E-nanaedbali yarmar abin maludoed. Ibmar-gwallu-soo-abin-daluddaedyobi yar gudoed, igi diwar-noedbali, nebagan negabar-argaddae, deyobi, nebagan argadoed.

⁵ Bela we-ibmarmar Jacob-wagan-Bab-Dummadgi-gwisgusadbali guoed. Israel-dulemar-isgued-ular, deyob, guoed. ¿Ar bia Jacob-wagan Bab-Dummadgi gwisgusmala? ¿Ar Samaria-neggweburgi isgusmarsursi? ¿Ar Jerusalén-neggweburgi, Judá-dulemar e-bab-dummaganse-gorleged-neggi isgusmarsursi?

⁶ A-ulale, Bab-Jehová soged: ‘An Samaria-neggwebur akwamarbi dunnumaksii an imakoed. E-akwamar nebaganba an mioed, bela swanga an imakoed. Unnila e-yala uvaʼmar-digega guoed.

⁷ Bela e-bab-dummadyob-imaklemalad bibislegoed. Bela bab-dummagan-neggi-gambasamaladga ibmar-uklesmalad, ogumaklegoed. Bela we-ibmarmar-soblesmalad an obelogoed. Ar ade, galagwensuli-nanamalad-manigi, we-ibmarmar-soblesadi, gannar amar-maniga an imakoed.’ ”

Miqueas, Israel-dulemar-ular, bukib-itosad

⁸ Miqueas sogded: “Agala, an booed, bukib-binsaedba an binnasuli goloed, nag-swili an gudii guoed, uka-swili an gudii guoed. Achu-boeyobi an gordii guoed. Irmonyobi an akigindii guoed.

⁹ Ar ade, Samaria-e-naibigusadi, gege nudakleged. E-naibigusadi, bela Judá-yalase warmaksad. Bela Jerusalén-neggweburse an-dulemar-bukwadse nasgusad.

¹⁰ Melle be bomalo, melle Gat-neggweburgi be ibmar sogmalo. Napayala nunmakedba, Bet-Le-Afra-neg-ukubgi be bindumakmar.

¹¹ Safirʼginmalad, uka-swiri binged-abalagi be-yargi be nomar. Zaanánʼginmaladdi, ainiega sikirmaksamalad. Betesel-neggweburgi ogormakdemalad, bar bemar bendaklegosulid.

¹² Marotʼginmalad, ibmar-nued-gued abebukwad, ar Bab-Jehováʼdi, Jerusalén-neggwebur-dogedse bonigan barmialid.

¹³ ”Laquis-dorgan, bemar ur-bila-onomaladgi moli be nasikmar. Ar ade, be-neggwebur-Jerusalénʼgi isgued noalid, bemargine, Israel-dulemar-e-isgued noalid.

¹⁴ Degisoggu, Moreset-Gat-neggweburga degimaloye be sogmalo. Aczib-neggwebur-e-negmar, Israel-dulemar-e-reymar-yardakega gued.

¹⁵ ”Maresa-dorgan, dule-wargwen be-ibe-yarsuega, an bemargi barmidoed. Adulam-akwasaila-yaa-ollogwadyaba Israel-dule-bulegan dukunamaloed.

¹⁶ Degisoggu, be-mimmigan-sabed-ulale, be bukib-binsae, aku-siga be esie, mula-nono-swirigwadyobi be-nono swiri be imake, ar ade, be-mimmigan yogasaar-gales dikasuli begi seledmaloed.”